شوف اللى بيحصل!!

كلمة منى

السكوت لا يضر فالأفواه المقفلة لا يدخلها التراب! (أنيس منصور) ولكننى إخترت التعامل مع التراب .. نورت بيتى الصغير ^_^

(الفرحة متستاهلنيش)

14 اللى إتكلموا

 
مخنوقة جداً ومتدايقة من كل حاجة ،مش عايزة أشوف حد ولا أتكلم مع حد ولا أسمع صوت حد .. ولا حد يقولى مالك ؟؟ لإنه مفيش حاجة مزعلانى على قد ما مفيش حاجة مفرحانى ..
دايماً لما بكون مبسوطة بقلق وأقول يارب خير وبتكون الفرحة مرتبطة دايماً بمشكلة جايه بعدها على أساس إنك بتاخد حتة من الدنيا بفرحتك .. ومفروض عليك إنك تردها لها تانى من أعصابك وراحه بالك وضحكتك فى المستقبل على رأيى المثل "إحيينى إنهاردة وموتنى بكرة "..
إنما لما بنزعل بيكون طبيعى جداً ودة العادى والله ينور مرتبطين بكل وسائل النكد من عياط ولويه بوز وسدة نفس عن كل حاجة ،والغريب إننا لما بنفرح بردوا بنعيط .. يعنى سبحان الله أمال هنضحك إمتى ؟؟
وإمتى بقى الفرحة هتسعنا .. ونبطل نقول  "أصل الفرحة مش سيعانى " ،وإمتى بقى لو سعتنا الفرحة ممكن كدة نحب نزنق حد جنبنا ؟!! يعنى منفكرش إنه لو فرحت أنا وفلانه فرحتى مش هتكمل .. لا .. دنا لازم أفرح لوحدى ..
مش هستناها تانى .. ولا هفرش لها الأرض ورد .. لإنى ببساطة أكتشفت
إن الفرحة متستاهلنيش

(مش أختها الأنتيم >_<)

8 اللى إتكلموا
(اى والله معرفش أختها الأنتيم ،أنا لسه بعقلى متجننتش ،ووالله ياإخوانا المرة دى شفت بعينى محدش قالى .. وبينما أنا فى رحلتى اللى فاتت فى اسكندرية .. كنت فى اتوبيس فى شارع خالد بن الوليد المزحوم على طول .. ولجل الحظ كنت فى الدور التانى .
فى وقت متأخر لقينا صوت عالى وجرى فى الشارع وحاجات بتتكسر .. الفضول فرض نفسة إن الناس كلها تسأل هو فيه إيه ؟!!
وكان الرد والله بالظبط "العرب مسكوا فى بعض " .. يعنى إيه طيب .. واحدة جنبى قالت لى " كل يوم والتانى كدة بنشوفهم من البلكونة بيضربوا بعض لحد ما يموتوا بعض وضرب نار وغيره ومحدش بيعمل لهم حاجة "
الحقيقة فتحت بؤى ومعرفتش اقفله من الذهول .. كان الموقف والله مروع .. كانت الخناقه بين المصريين و4 ليبيين على حسب معلوماتى الغير موثوق فيها وانا آسفه إنى بقول كدة ..
كانوا 3 رجاله وواحدة وكانوا سكرانين .. وبطول الشارع كانوا بيتلفظوا بألفاظ مش كويسه لكل واحدة فى الشارع ويتحرشوا بأى واحدة قريبة من عربيهم ..
وبعدها فضلوا يشتموا فى المصريين بقى ومصر والكلام اللى بنسمعه على طول دة وساعات احنا نفسنا بنقولة للأسف ،وبعدين المصريين بقى فاض بيهم قاموا هاجموا العربية و 3 بما فيهم البنت هربوا من العربية والراجل الفاضل جرى بالعربية .. نسيبه ؟!! لا طبعا ورااااه .. بالعصيان والسكاكين وغيرهم .
العربية كانت فتافيت .. والراجل بعد ما تعب نزل منها وجرى .. نسيبه ؟!! لا طبعا ورااااه .. وفعلا جابوة وتحت رجليهم لحد ما الراجل .... مات .
طبعاً كل اللى شوفته يومها من الأتوبيس كان تكسير فى كل التكسيات فى الشارع وخراب جامد وفزع والأحلى بقى من دة كلوا إن الشرطة اختفت وفص ملح وغار ..
رجعت تانى يوم لكافيه كان قدامه كل دة لإنى كنت هموت وأعرف ايه حصل تفصيلاً مفصلاً .. الراجل قالى إيه بقى " يا آنسه مانتى عارفه موضوع الصيادين اللى حصل فى ليبيا زى ما تقولى كدة الناس على آخرها .. ودول جايين يزودوها .. "
قلت له " الراجل فعلا مات ؟؟ " قال " والله الإسعاف جه شاله من هنا غرقان فى دمه .. يستاهل "
سبته ومشيت وأنا بفكر فى يستاهل دى .. مين اللى يقرر إنه يستاهل ولا لاء ؟؟ إحنا ؟؟ .. هو فرخه يعنى ؟؟
اللى أعرفه اللى غلط يتعاقب .. والقانون فوق الكل .. ومجرى القانون .. وشعارات كدة مبتأكلش عيش .. ،بس نحنا طبعاً عارفين إن " القانون لا يحمى المصريين " .. قوم ايه بقى .. المصريين بيحموا روحهم .
الحقيقة والله معرفش مين الغلطان ولا عارفه أحدد .. لإن الوضع من الأول مش واضح .. نص الناس مصدقة الصيادين أصلهم غلابة وإتبهدلوا وإتاخدوا بملابسهم الداخليه واتلف بيهم فى الشوارع الليبيه ..
والنص التانى بيقول لا دة كلام مبالغ فيه ومحصلش.. ده سجون ليبيا 7 نجوم .. ومحصلش أى حاجة من دى .
نرجع ونقول .. ليبيا الشقيقة .. بس مطلعتش أنتيم .
بمناسبة الصيادين .. إلا إيه اخبار الصيادين اللى قراصنه الصومال طمعت فيهم .. قال يعنى مصر هتدفع وتشترى .. " وايش ياخد الريح من البلاط " ، وقال إيه بذكاء مصر والأمن فيها والخطط المحكمة رجعوا الصيادين وبردوا ببلاش تحت شعار .. " ليه تدفع لما ممكن متدفعش " .. ومتشلش يا عم من حد وخلى قلبك أبيض .
نرجع ونقول ..الصومال الشقيقه ..بس مطلعتش أنتيم .
ولا الراجل قاسى القلب القاتل الوحش .. اللى راح لبنان مخصوص وقتل أربعه فحكمت عليه الأهالى بالموت تقطيعاً وتمزيعاً وتعليقاً على عمود نور .. وبعدين فرجة وزغاريد على أساس إنه يستاهل كل اللى يجرى له .. طب الراجل غلط دة لو اعتبرنا إنه قتل .. مين يحاكمة ؟؟ .. ولا يلا مش مهم ملوش ديه .. أصله مصرى .
نرجع ونقول ..لبنان الشقيقه ..بس مش أنتيم.
ولا الكورة اللى مبقتش رياضه بالمرة .. بقت سب وإهانه وبلطجة وحاجة تقرف ..مش هتكلم فى قضيه الجزائر تانى أصلها إتحفظت ، لكن والله إن امريكا تتدخل حاجة فضيحة .. خلت شكلنا وووووحش .
نرجع ونقول ..الجزائر الشقيقة ..بس مش أنتيم.
ولا الأخبار اللى كلها تجريح واضح جداً فى المصريين ومرؤسيهم .. أصل مصر أغلقت معبر رفح .. أصل مصر غير متضامنه .. أصل مصر والعياذ بالله يعنى .. بتسمع كلام السيكو سيكو ومبتدخلش فلسطينين إلا بأوامرهم .. وغيرها وغيرها ..
قوم ايه بقى ..زعلنا من قطر .. لإن الجزيرة خير اللهم إجعله خير قطرية .
نرجع ونقول ..قطر الشقيقه ..بس مش أنتيم.
دة حتى السودان ..قلنا إنهم محموش المصريين يوم ماتش الجزائر .. مع العلم إن مجهودهم كان يتحسب لهم .. بلاش النقطة دى ،موضوع حلايب وشلاتين .. يا سيدى متفرقش مصريين ولا سودانيين .. لا إزاى .. لازم نتخانق ونتهاجم على دول تبع مين ويمارسوا حقوقهم السياسيه فين .. وتبقى مشكلة وفى الآخر يطلع إن البلدين أصلاً إتفقوا إن المنطقة المتنازع عليها تبقى منطقة تكامل ودة حل وسط .
نرجع ونقول ..السودان الشقيقه ..بس مش أنتيم.
*والله مش تحيز لكونى مصرية .. لإنه للأسف .. بنغلط كتير وفى نفس الوقت مش بلوم علينا .. لإنه مبقاش لينا كرامة زى الأول ..ولا نكونش كدة من الأول ؟!! ،بس اللى يزعل إنه دول عرب ومسلمين زينا زيهم .. عمرنا ما كنا أعداء .. وكنا بنشرب العصير سوا فى إجتماعات القمة والموضوع لذيذ جداً .. سؤال بس حيرنى .. لما كل دول أشقاء مش أنتيم .. فين بقى أخت مصر الأنتيم ؟!!)