* فاكر لما رجعت من السفر قبل فرحنا وبدأنا نجهز بيتنا .. ورحنا نشترى الفرش وكان يوم جميل أوى .. كنا بنشاور على نفس الحاجة فى نفس الوقت .. اخترنا كل حاجة مع بعض .. وقدام كل أوضه وقفنا شويتين .. نتخيل كل لحظه هتمر علينا فيها ..ولما خلصنا وكملت كل حاجة .. قلت لى مبروك لأحلى عروسه .. مبروك عليا انتى ، قلت لك .. تؤتؤ .. مبروك عليا أنا يا حبيبى .
* فاكر لما ستات العيله المتبرعات للمساعدة فى فرش بيتنا اتجمعوا فى شقتنا .. وأنا كنت معاهم علشان بس أدى الأوامر .. وهما يا يعنى بيشتغلوا وأنا بس بتأمر عليهم .. ويقولوا ما تساعدينا يا بنتى فى أى حاجة ينوبك ثواب بدل ما انتى زى خيال المآته كدة .. وأنا أقولهم : أنا العروســـــه .. هو فيه عروسه بتتواضع وتساعد حد ؟!! .. ويضحكوا ويقولوا : والله لنطلعه كله عليكى بعدين .. وانت طالع نازل ..نازل طالع ، بتتلكك طبعاً .. وقال ايه بتسألهم محتاجين حاجة ولا لاء؟! .. وكل ما تطلع تغمز لى وتقولى .. وحشتينى يابت انتى .. هما هيمشوا الساعه كام ..ههههههههه .. ونفضل نضحك .
* فاكر لما شفتنى يوم فرحنا .. أول لحظة كدة وأنا قدامك بالفستان الأبيض ومكسوفه كأنى أول مرة تشوفنى .. ولقيتك بتقول ماشاء الله.. إيه ده ؟!! .. ومسكت إيدى وقلت : هو ميفعش اخطفك ونروح على طول .. أنا غيران نروح القاعه وحد يشوف القمر دة غيرى أنا ..
قلت لك : بس يا مجنون ، وكنت عريس زى القمر وفضلت أظبط لك الببيون علشان بس أبص فى عيونك .. ولخمتك معايا بالفستان والبوكيه اللى كانوا تقال بشكل مش ممكن .. بس دمهم خفيف على قلبى طبعاً .
* فاكر لما فتحت باب شقتنا .. انت بالبدله وأنا بالفستان وكأننا صورة مرسومة ومتلونه .. أو عرسان فوق تورتايه بالشيكولاته وأنا حتت الفانيليا اللى فيها ..ياااااااااه على احساسنا وقتها .. عمرى ما هنساه.. لما قلت لك : معقول .. دة بيتنا خلاص ، وقلت لى :أيوه معقول طبعاً .. أومال دخلنا بيت الجيران .. وضحكت ضحكه غلاسه .. ومسكتنى من ايدى واتفرجنا على البيت حته حته .. كان مختلف أوى .. لإننا ببساطه أول مرة نشوفه لوحدنا أنا وإنت وبس ..
* فاكر لما جم يباركوا لنا تانى يوم ..كان على قد العيلتين الصغننين بس .. كنت ملخومة أوى وأنا حسه إنى المسئوله عن المكان دة .. مش هستنى ماما ترحب بالناس لا .. أنا المطلوب منى أرحب بيهم .. ولا هستنى ماما تقدم حاجة ساقعه وكحك والذى منه لا .. أنا المفروض أقدم ..ولا أقول مش مهم أخرج لهم أنا هفضل فى أوضتى لا .. لازم ولا بد وحتماً أكون موجوده .. لإن كل البيت دة ليا أنا .. مش بس أوضتى .. انت كنت بتساعدنى وتحضر لى الصينيه فى المطبخ وأنا أدخل آخدها منك وأقولك : ربنا يخليك ليا يا حبيبى انت .. وأخرج للضيوف .. ولما صحباتى وبنات العيله كانوا موجودين .. كنت غيرانه عليك أوى .. وقلت لك من قبلها : والمصحف لو هرجت ولا رغيت ولا سلمت ولا قعدت معاهم أصلاً .. لتشـــــــــوف هه بقى .. قلت لى : من اولها بتهددينى كدة .. هتعملى ايه يعنى حضرتك .. هو أنا يا عبيطة بشوف غيرك فى الدنيا .. طب دا انتى أحلى منهم كلهم والله .. مجنونة انتى ، وكسفتنى زى عادتك .. وبردوا مزعلتنيش واحترمت غيرتى عليك ويادوب من على بعد تمناشر متر قلت منورين وعقبالكوا ودخلت على جوا .. كان قلبى بيرقص من الفرحه .. وكنت عايزة أقولك بحبك وبصــــــــــوت عالى بس خفت من الحسد .
* فاكر لما طبخت لأول مرة فى بيتنا ..قلت لى : أنا هساعدك يا جميل ياللى بتطبخ انت ، قلت لك :لالالالا شكراً .. يبقى مش هخلص انهاردة ان شاء الله .. ارتاح انت بس واطلع برا علشان أنهى المهمه على خير ، وخلصت الأكل .. كان نص نص من وجهه نظرى .. انما انت من اول ما دقته وقلت لى : الله تصدقى يا بت انتى دى أحلى باميه أكلتها فى حياتى .. حلوة أوى لدرجه انى هاكل صوابعك وراها هههههه .. تسلم ايديكى يا ماما ، قلت لك : مع انى عارفه انها مش قد كدة .. بس ربنا يخليك ليا واسمحى لى أبقى قديمه شويتين وأقولك .. ربنا يجبر بخاطرك :) .. ، ويومها بالليل قلت لى : ماما عامله محشى انهاردة إيه رأيك لو نزلنا غلسنا عليها وأكلنا .. ضحكت وفهمت إنك يا عينى مأكلتش وريحه أكل ماما وصلت لنا وانت كعادتك مش قادر تقاوم .. ومش عايز تحرجنى ، وقلت لك : ومالوا يا سيدى يلا بينا .. وبينى وبينك .. انا كمان كنت جعانه .
لسه باقى حاجات كتير هفتكرها كل يوم ونفضل نحكيها ونضحك من قلبنا .. أوقات تفكرنى وساعات أفكرك .. بس المهم اننا مش هننساها أبداً .. وهتفضل ذكرى جميلة بتخلينا نصمم إن بكرة يبقى أحلى علشان بعد بكرة نفتكره بردوا سوا وإحنا لسه بنضحك ..
بحـــــــــــبك
