شوف اللى بيحصل!!

كلمة منى

السكوت لا يضر فالأفواه المقفلة لا يدخلها التراب! (أنيس منصور) ولكننى إخترت التعامل مع التراب .. نورت بيتى الصغير ^_^

طريقنا إلى أين؟!

0 اللى إتكلموا

يرحمكم الله يا أبو سريع:)

0 اللى إتكلموا
وآدى البدايه..عطسه صغننه وسقعه تحس انها ماشيه جواااك (أستر يارب) ، عيانه جداً جداً والبرد مخلص عليا ، بس كل ما بكلم حد يقولى عندى برد عندى برد مش عارفه إيه الحكايه دى؟!!

درجه حرارتى أرتفعت شويه بس الحمد لله دلوقت أحسن بس خلوا بالكوا (الحرارة نزلت ) يعنى بريئه ، وكنت دايخه شويه بس خلوا بالكوا (الدوخه مشيت) يعنى بريئه ،ولسه باقى شويه عطس وكح كح (إبعدوا شويه لتتعدوا) ..مع علب مناديل داخله خارجه تقولشى باكلها؟!!

وبكره النوم طول اليوم بقى فى السرير (قال سرير قال) لا طبعاً ،قمت ونشرت الغسيل مع انى كنت واقفه بالعافيه ،بس النشاط بيجيب نشاط
والنوم والكسل بيزود التعب اكتر ..
كنت إمبارح بالليل بقول ياااااااااه حالات (اللهم احفظنا ) انفلونزا الخنازير بتزيد وحالات الوفاة كترت ياااارب أستر وميزيدوش حاله كمان ،
يعنى الواحد كدة لسه معملش لربنا حاجه زى ما يحب ، وكنت خلاص من كتر التعب حسه أنه الصبح مش هييجى عليه .
بس أهو أدينى زى الفل الحمد لله وربنا كريييييييم اوى ، ولسه هفضل موجودة أرخم على البشريه كدة وأفترى على البنى آدمين....وبس .
(أدعوا لى ربنا يشفينى )

العيد فرحه..مااااااااء

0 اللى إتكلموا
كل سنه وكل الأمه الإسلاميه بخير وسلام ..ويارب كل عيد نكون متقدمين ومتحضرين ومش هقول زايدين لإنه كفايه علينا كدة هههههه.. الحمد لله يارب العيد دة فيه تفاؤل كبير منى ، مبسوطه الحمد لله وحسه انه بكرة أحلى ، العيد الصغير بالنسبه لى بيكون فرحه أكبر لإنه بيكون بقى بعد صيام شهر وبصحى الصبح أفطر كحك وبسكوت وأشرب شاى ، العيد الكبير بقى عيد اللحمه زى ما متعارف عليه ، الدبح بياخد نص يوم مثلاً رايحين جايين نطلع حاجات ومحتاجات من المطبخ للجزار ولو كان الدبح تحت ننزل الحاجه تحت ولو كان فوق نطلع الحاجه فوق وسلم طالع نازل ....مش أنا طبعاً (إخواتى الولاد) ^_^.
ويخلص النص الأولانى من اليوم دبح والنص التانى تعبئه (حلوة تعبئه دى ) فى أكياس بقى ووزن اللحمه وحاجاااااااااات كتير ، بس بيكون ليها فرحتها كدة وقلقها الحلو جوا البيت .
والعيد دة بقى غخواتى القطط الصغنيين كبروا سنه ،وبقوا أشقى ،وأحلى، وأطيب، وحبيتهم أكتر وأكتر ... وجو الأطفال فى البيت جمييييييل وبيعمل كدة إحساس بالمرح لكن آثار المرح أول يوم العيد من الصبح بعد حمله النضافه بتكون مش ولا بد ، البيت بيتقلب رأساً على عقب وكله مش فى مكانه ، أطفال بقى ومحدش يلومهم ، آة لعبيين بس البيت من غيرهم ولا حاجة .........ربنا يهديهم .
جينا بقى للكلام اللى يزعل ، (لبس عيد إيه يا هانم إحنا مش جايبين العيد الصغير؟؟) ...(ومالوا بس يا حبيبى كل سنه وأنت طيب ) .
إفترى حريمى لا يوووووصف ودة طبعاً كلام الرجاله ، ومن رأيى( وأنا مش رجاله) إنه أوقات بجد بيبقى فيه إفترى سواء فى شرا لبس عيد كلاكيت تانى مرة ، أو مصاريف على الفاضى والمليان ، والمشكله بتكون ناس متوسطه الدخل بس أهو بقى عيد وكل سنه وأنتوا طيبين والناس كلها بتجيب وربنا بيكرم (دة الكلام اللى بسمعه) مهو بردوا على قد لحافك مد رجليك علشان تعرف تتغطى (أقصد تعيش).
بيكون الراجل كل تفكيرة فى إنه معاة قرشين وعايز أضحيه علشان الثواب والمودام عايزة وعايزة وعايزة ، وكأنه موسم فى السنه لظهور عفريت المصباح السحرى اللى هيحقق لها أحلامها ويقولها شبيك لبيك عبدك وملك إيديك... وفى الآخر بتفوق على صوت سبع البرمبه (اللى معرفش معناها ايه) بيقول شنطتك فى ايديكى وعلى بيت ابوكى هوديكى ، وياريت اللى جرى ما كان .
فعلاً كل دة بيحصل وبنشوفه وبنسمع عنه كتييييييييييييير ، فياريت يا جماعه كدة نكون رحماء ببعض لإنه الدنيا مش ناقصه ،وبعدين مش لازم مشاكل ..دة عيد ..وكل سنه وإنتوا متفاهمين وطيبين ^_*.

أولى حملاتنا..فى كليتنا

0 اللى إتكلموا
الحمد لله بفضل ربنا واننا بجد لينا هدف وعايزين نعمل حاجة منتجه وكويسه، كان الاسبوع اللى فات اولى نشاطنا كأسرة شباب اعلام بكليه آداب جامعه الزقازيق ودة من أنتاج قسم الإعلام ولكن يمتد بنشاطه لكل الكليه وكمان خارج حدودها .
اخترنا ويشرفنا طبعا وجود الدكتور /علاء طلعت رائد للأسرة ، ودكتور/خالد عبد الجواد كمقررر ليها ، ودول دكاترة قسمنا الجميل قسم الإعلام اللى دايماً ومعروف انه الروح الحلوة فى كليه الآداب وإنه راعى كل نشاط ومصدر كل نجاح جميل بأساتذته والدكاترة والطلبه كمان.
أخترنا أمين الأسرة الزميل /عمر فتحى وأنا كأمين مساعد ليها أنه تكون أول شغلنا حمله تفيد كليتنا على أساس انها اكثر الكليات ازدحاماً بالطلاب وتكونه حمله توعيه بنظافه المكان كقسم وكليه وجامعه كامله .
واستقرينا على مسمى (أبحث عن السله) وبمساعدة الدكاترة الكرام وتشجعيهم وتدعيمهم لينا أولاً واخيراً وإبداع عمر وتعبه وتصميماته عملنا بوسترات اتعلقت على مستوى القسم ودى كبدايه لإنها تتواجد فى الجامعه بأكملها.
وكمان مواضيع خلال الأسبوع الحالى هيعملها ويقوم بكتابتها وتحريرها أعضاء المنتدى اللى اغلبيتهم طلاب قسم الإعلام ودة كله بهدف توصيل الفكرة وانه نلاقى صدى من الناس واعتراف باننا كطلاب جامعيين لا يصح أن نكون كمن لا يعرفون قيمه البيئه النظيفه وكيف تكون .
والشكر لله انه الموضوع لقى إعجاب من الجميع كطلاب ودكاترة وعاملين بالمكان ، وعلى أمل انه يحصل تغيير بعد إقتراح الدكتور/علاء طلعت بإننا نتبنى فكرة وجود (سلات للمهملات) فى اماكن كتير ومتفرقه من المكان ، طبعا مع وجود السلات التابعه للنظافه من الكيله ، وتكون كمساعدة مننا كأسرة ليها نشاطها ،اضافه على كدة وجود تفاعل من الناس .
وكانت آخر جمله قالها الدكتور خلال إجتماع الأسبوع الماضى هى : لما نشوف أخرتها إيه هيحصل ؟؟
لكن إحنا موجودين واهدافنا محددة والحماس مع الفعل موجود وإن شاء الله الفترة اللى جيه يبقى فيه شغل أحسن وأحسن.

مصريه وأفتخر

0 اللى إتكلموا
معنديش ادنى اعتراض على الصورة دى ، دة تعبير بجد من حقنا نعبر بيه عن الأسلوب الغير مقبول بالمرة اللى اتعاملوا بيه وياريت مع الهزيمه لا دة مع الفوز ، اعتراضى الشديد كمصريه على اننا نتهم بعض باننا يهوووووود.
هما يقولوا انه القاهرة عاصمه يهوديه وانه المصريين يهود ويرحلوا ناس عمال شباب مصريين من عندهم ويقولوا هنمشى اليهود من هنا ،واحنا بردوا مسكتناش لا قلنا كمان عنهم يهود وبرنامج على قناه دريم اذاع انه محمد رورارة طلع يهودى وانه جريدة الشروق الجزائريه اصلها جريدة يهوديه تابعه لإسرائيل ، انا مش بدافع عنهم بالعكس انا بهاجمهم علشان اللى حصل وعلشان دى كارثه بكل المقاييس اننا عرب ونعمل فى بعض كدة ، بلاش عرب لانه الناس بتزعل وتقول لا دول برابرة واحنا فراعنه ولينا اصول وتاريخ ...ايه رايكم نخليها مسلمين احسن؟؟!!
ازاى نكون مسلمين ونعمل فى بعض كدة ؟ احنا نهاجم ونشتم على الفضائيات وهما يبعتوا لينا شويه مسجلين خطر وبلطجيه يرعبونا فى شوارع الخرطوم وتحصل اصابات وفزع وهلع ..
مين ورا دة كلوا ؟؟ وليه بيقنا بنعمل فى بعض كدة؟؟ اومال بقى ليه بنلوم على اللى بتعمله اسرائيل فى فلسطين ولا امريكا فى العراق ولا افغانستان ؟؟
انا والله زعلانه من قلبى على اهانتنا كمصريين لكن برجع اقول هما غلطوا غلطه بشعه واحنا بدأنا نغلط كمان وعايزين نرد حقنا بالدراع، يا جماعه الحكايه مش حكايه دراع ولا خناقه ولا ضرب ، المفروض يكون عندنا اسلوب حوارى محترم وتفضل مصر زى ما هى شعب محترم وكويس ومثقفين مش نرد على اهانتهم بشتيمه وخروج عن الادب سواء فى فضائيات او زى ما بشوف فى المنتديات ، كدة يبقى احنا المدانين فى الآخر ويبقى هما( ضربوا) واحنا بكل بساطه (شتمنا) ...
فى آخر كل الكلام انا بجد فخورة انى بنت مصر وان مصر دى بلدى بصرف النظر عن مليون قضيه سودا موجودة فى مصر ممكن نحط تحتها مليون خط بس( انا ادعى على ابنى واكرة اللى يقول آمييين )، بعترف انه البلد دى لسه طيبه ولسه شعب جميل ولسه ام الدنيا وهفضل احبها واقول ....
فخورة انى بنتك يا مصر

اللهم اجعله خير

0 اللى إتكلموا
صحيت من النوم قبل امبارح والظاهر يعنى انى نمت جعانه (مع انى اكلت قبل ما انام) لانى حلمت حلم غريب ، حلمت بسندويتشات جبنه بيضاااااااااااا ، اة والله وكنت مستغربه جدا ،بس جت لى وانا جعانه من حد منتظرة منه يقدمها لى ، وبعدين لما صحيت رحت طبعا على الست ماما مفسرة الأحلام الكبرى (لانها الحقيقه بتحب تقرى كتير) وحكيت لها على الحلم العجيب ، وبعد شويتين من التريقه على الحلم والضحك الكتير على انها ساندويتشات جبنه بيضا مش برجر ولا سوسيس ، المهم بقى انها اخيرااااا وبعد خوف منى تطلع حاجة مش ولا بد قالت لى : يا سمسم اى حاجة من منتجات اللبن فى الحلم خيييييييييييييييييييييييييييير ان شاء الله ، لانه كمان الرسول عليه الصلاة والسلام كان قبل أكل اى حاجة يقول اللهم بارك لى فى كذا وابدلنى خيرا منه ، الا اللبن كان بيقول اللهم زدنى منه (دة تفسير الحديث منى او زى ما قريت السبب وليه اللبن خير) اممممممممممم الحقيقه فرحت واقتنعت وقلت يارب ..
ياريت يكون خير وتكون حاجة حلوة اصل والله نفسى افرح أوى ، فا يا جمااااااااااااااااعه لو حد نام جعان زيى وحلم بالجبنه يبقى خيررروالله اعلم.

أخاف من الرمال

0 اللى إتكلموا
لا أشعر بالوحدة مطلقاً ..ولكنى أخشى الوحدة دائماً وأبداً..شىء يفزعنى أن أكون بلا حنان وقد شربت أنواع الحنان منذ الطفوله .
نعم عشقت حنان الكلمات وحنان النظرات ..أى نظرات ، نظرة طفل ملائكى برىء ذو عينان تضحكان ، نظرة حب من إحدى قرنائى
المحببات، نظرة اشتياق من بعد أن كنا بعاداً ، كل هذا يغمرنى بالسعادة ، فقط السعادة.
ولكنى الآن أشعر بأن السرور يغمرنى، بأن الأيام تغفو لتتدلل، بأن قطرات المطر تداعب شفتاى لتضحك، بأن البحر يردد حروف اسمى مع الأمواج لتتراقص، بأن الطيور تحملنى على جناحها لأحلق، بأن القمر يسطع فوق شرفتى كل ليله لى أنا وحدى، بأن الشمس تقبل خداى كل صباح لأصحوا متكاسله.
ويبدأ يوم جديد أتذكر فيه ما مضى وأبتسم عندما أسمع صوتى يردد:ليس حلم، إنها الحقيقه .
أتذكر أول اللحظات ،وأول النظرات التى كانت تخجلنى وتتورد وجنتاى وبالتأكيد تفضحنى، أتذكر الكلمات التى كنت اعشقها ، أتذكر شاى الصباح الذى طالما يعادونى مذاقه، والأهم أتذكر بأ نه رحل ....
ولكن الرحيل لن يطول ، أعلم أنه سيعود وأننى سأحمل شرشف الأحلام الذهبى وأسير على الرمال دون رهبه، أعلم أننى سوف أنظر الى عينيه يوماً دون خجل ، وسأقول كل الكلمات التى طالما إحتبستها مع كل اشتياقى بأن أنطقها، وسأشعر يومها بإحساس يغمرنى ، لأننى لم أسترقه من قبل ،وأقول بكل قواى أنت الآن لى والآن من حقى أن أقول والآن لك أن تسمع والآن أنا معك حتى الرحيل ، لاأقصد هذا الرحيل ، إنما الرحيل الأخير..
عذراً تذكرت أننى أخشى الرمال،أخشى المسير على الرمال ، وحتى الآن أرهبها ، فبالله عليك تطمئننى ، و أرنى غداً بأن فرح الأيام وحبك لى سيحملنى...حتى لا أخشى الرمال.

مين تانى ميعرفهمش؟!!

0 اللى إتكلموا

فكرة مسيطرة على تفكيرى شويه، جت الفكرة من انى اكتر من مرة اتكلم مع ناس كتير مثقفين على حد علمى ونتكلم فى مواضيع كتيرة سواء ثقافيه او ادبيه او سياسيه (اللهم اكفينا الشر يعنى) وبيحصل تبادل آراء وحوار مفيد جدا وبكون مستمتعه بيه اوى وبنفعل لرأيى دايماً مع انى مؤمنه بمقوله "اختلاف الرأى لا يفسد للود قضيه" ولكن اكتشفت انى مؤمنه بيها ظاهرياً لكن من جوايا بكون عايزة اقنع اللى قدامى برأى حضرتى وبس (وبتعصب عليه والله).

ما علينا من كل دة ،الأهم انى انهاردة وبعد حوار معين حصل من كام يوم مع ناس مثقفه جداً أدبياً (بردوا على حد علمى) وفضلنا نتكلم عن الأدب عموماً والشعر خاصه سواء فصحى أو عامى (النوع اللى بعشقه) ، واتكلمنا عن شعراء كتير سواء فى النوع دة أو النوع دة ، بس لاحظت من كلامى وكلامهم إننا مهما افتكرنا إننا وصلنا لحد كبير من الثقافه وبقينا ملمين بالمعلومات الكافيه عن كل مجال فأكيد هنكون غلطانين ، لأنه الإنسان لحد آخر عمرة بيفضل يتعلم ويعرف جديد.

لكن أنا ذهلت لأنى لقيت بعضهم ..لا..دة كلهم مع عشقهم للشعر بكافه انواعه وفى أى عصر من عصور الأدب ومتابعين جيدين جدا للأخبار الأدبيه إنهم ميعرفوش ولا عمرهم سمعوا عن اتنين اللى هما :الشاعر /أمين الديب ، والشاعرة/ إيمان البكرى

الحقيقه أنا استغربت ..بس سكتت..لأنها مش جريمه بس هى مشكله

ايوة انا بحاول أقرأ على قد ما أقدر ومبقولش إنى أعرف كل الشخصيات فى كل مجال وعلشان كدة اكتفيت انى اوضح مين الأسماء دى ؟!!

وليه هى مهمه ..وليه هى بجد ثروة ؟؟!

بس الحقيقه ..كنت متغاظه.

لأن الاتنين دول من أهم الناس اللى ممكن تقرأ لهم شعر عامى ، فعلاً شعراء رائعين جداً ومبدعين جداً، بقى تفتكروا انه ممكن حد فينا يقول الشاعر الكبير /عبد الرحمن الأبنودى وحد يسمع الإسم دة وميعرفوش.

بقى تفتكروا ممكن حد فينا يقول عمنا/صلاح جاهين وحد يسمع الإسم دة وميعرفوش.

بقى تفتكروا حد فينا ممكن يقول العظيم/بيرم التونسى وحد يسمع الإسم دة وميعرفوش.

مع العلم طبعاً ان شعراء الفصحى مؤثرين فينا وفى كل وقت بشكل كبير جداً وبنفس درجع الشعر العامى (بس انا شخصيا متحيزة للعامى).

أظن ان كلنا نعرف الشعراء دول ، يبقى لازم ندى كل واحد حقه وكل واحد يستحق اننا نعرفه ونؤمن بإبداعه يبقى ياريت نعرفه، ولازم يا اخوانا الناس دى تتقدر بجهودها ونحترم فنهم لانهم يستحقوا والله .

* مين هو امين الديب؟؟

ألقت قوات الأمن المصرية بتاريخ 25/4/2006م القبض على الشاعر الشعبي المصري أمين الديب (70 عاماً) عضو اتحاد الكتاب من منزله وحبسه خمسة عشر يومًا رهن التحقيق بتهمة إبداع أشعار تُنادي بالإصلاح والحرية ونزاهة الانتخابات وسيادة الشعب والقانون والعدالة الاجتماعية ونهضة مصر ومكافحة الاستبداد والفساد والتزوير والقوانين الاستثنائية، وكذا رفض مد حالة الطوارئز

هو دة امين الديب ،فلاح مصرى وشاعر ممتاز حاسس بالناس جدا وبيعبر عنهم ،وبيعتقلوة لانه بس بيتكلم .

اظن يستحق نعرفه .

ودى قصيدة من القصايد اللى بحب اسمعها منه جدااا وبكون فى حاله استمتاع رهيبه بكل تعبير بيقوله بحس فعلا انه من قلب الشارع المصرى الريفى الجميل .

(قصيدة ام باتعه)

*مين ايمان البكرى؟؟

إيمان محمد بكري محمود شاعرة مصرية, ولدت في القاهرة 1955-01-03, وفيها تلقت علومها الابتدائية والإعدادية والثانوية, والجامعية.. إلى أن نالت شهادة الليسانس في اللغة العربية, والدراسات الإسلامية من جامعة القاهرة, كلية الآداب.

(دار علوم 1978)كتبت الشعر وهى يافعة, وكان لمكتبة والدها دورا رائدا في توسيع مدى رؤيتها, وإطلاعها على أشعار القدامى والمحدثين.. حتى صقلت موهبتها الشعرية, نشرت بعض قصائدها في المجلات والصحف المصرية, تعمل حاليا في تدريس اللغة العربية للمرحلة الثانوية في مصر,وفى سنة 1990 التحقت بجامعة شعراء العروبة وأصبحت عضوا فاعلا فيها.عملت بالتدريس ثم انتقلت إلى وزارة الثقافة منذ عام 1992.الوظيفه الحاليه مستشار أدبي ومدير المكتب الفني بالهيئة العامة للكتاب فازت سنة 1991 بالجائزة الأولى في مسابقة الشعر التي طرحتها الجامعة.

لإيمان بكرى عدة دواوين شعرية نذكر منها:

1. العزف على أوتار القلب

2. ومضات قلب يحترق.

3. امرأة في سجل الزمن.

4. عجايب يا زمن.

5. الليل وخصلات الشعر.

6. المصحصحاتي.

7. أعلنت العصيان عليك.

8. قصر الكلام.

9. ذاكرة الأنامل.

10. مختارات لمكتبة الأسرة.

11. الأعمال الكاملة جزء أول.

شاركت إيمان بكرى في العديد من اللقاءات الشعرية التي تحييها الجماعة.

تكتب إيمان بكرى الشعر بنوعيه الحر والعودى ويتميز شعرها بالرقة, وعذوبة الألفاظ, أما مواضيعه فتتركز حول انشغالها بقضاياها الشخصية خاصة وقضايا المرأة بعامة..

يذكر أن العديد من النقاد والدارسين قد قاموا بالكتابة عن هذه الشاعرة المبدعة, من أمثال (إبراهيم عيسى ) الذي قدم لها ديوانها (امرأة في سجل الزمان) الذي صدر سنة1993.

والشاعرة إيمان بكري لديها القدرة على الانتشاء بالقصيدة في صورتـــيها الفصـــحى والعامية، كما انها تقرأ العامية بالمصرية والنوبية، وتحس بالكلمة في مدلولها الانساني الجذاب وغمست خبز قناعتي في ملح أيامي العجاف أتقوت الأحزان ابتلع المرارة وأرتوي ظمأ الجفاف.

ودى قصيدة رائعه للشاعرة ايمان البكرى

(مفيش حاجه)

بجد لازم نعرفهم ونقدر فنهم ونستمتع واحنا بنسمعهم او نقرأ لهم

وبس..

رحل عن الحياه..ولن ننساه

0 اللى إتكلموا
توفى صباح السبت 31/10/2009 الدكتور المفكر الكبير/مصطفى محمود بعد صراع مع المرض وعن عمر يناهز 88 عام.

وشيعت الجنازة ظهر السبت من مسجد اطلق عليه اسمه فى حى المهندسين.
حضر مراسم الجنازة مجموعه كبيرة من المفكرين والأدباء والفنانين والكثير ممن يمثلون الشعب بكافه فئاته وخاصه الطبقه المتوسطه والفقيره .


حتى هذه اللحظه أتذكر موسيقاه التى كنت أبكى عند سماعى لها حين كنت طفله لا أعلم لماذا كانت تخيفنى ؟!..لقد كانت غريبه نوعاً ما.. إنها موسيقى برنامج (العلم والإيمان) كانت أمى دائناً ما تنتظر حلقته الاسبوعيه وتجلس أمام شاشه التلفاز ويملأوها الفخر أن لدينا عالماً هو دكتور مصطفى محمود وأن ما يقدمه علم مبهر للجميع وكانت مدة عرض البرنامج وكأنها وقت حداد حيث غير مسموح بحدوث أى ضوضاء تحت مسمى (البرنامج اللى ماما بتحبه) .
عندما كبرت أدركت أن هذه الحلقات والتى كانت 400 حلقه قدمها دكتور مصطفى محمود كانت ثروة كبيرة تركها لنا الراحل العظيم .

لقد كان ينتظرة آلاف المشاهدين المصريين والعرب لإنه حقاً يستحق أن يُشاهد....


من هو؟؟


هو مصطفى كمال محمود حسين آل محفوظ من الأشراف,ينتهى نسبه إلى الإمام على زين العابدين .

من مواليد شبين الكوم محافظه المنوفيه عام 1921.

درس الطب وتخرج عام 1953ولكنه تفرغ للكتابه والبحث عام 1960.

تزوج عام 1961وانتهى الزواج بالطلاق عام 1973,وله منه ولدان هما أمل وأدهم,

تزوج ثانيه عام 1983وانتهى ايضا بالطلاق1987.

نقطه فاصله فى حياته:

انتشرت شائعه من قبل عدة سنوات بأن الدكتور مصطفى محمود اعتنق الديانه المسيحيه, ولكن لم يصدقها أبداً من عرف دكتور/مصطفى حق المعرفه لأنه كان متمسك بإسلامه ومؤد لفرائضه ,وكان دائماً ما يتوجهه بالدعاء لله وسماع القرآن بإستمرار.

وكان دكتور/مصطفى على علاقه سيئه بالرئيس المصرى الراحل/ جمال عبد الناصر؛ نظراً للإختلاف الفكرى بينهما, وزادت العلاقه سوءاً بعدإتهام دكتور مصطفى بالكفر فى نهايه الستينات بعد سلسه من المقالات وصدور كتابه "الله والإنسان" الذى تمت مصادرته وتقديمه بعهدها للمحاكمه بناءاً على طلب الرئيس عبد الناصر نفسه ، بناءاً على تصريح الأزهر باعتبارها قضيه كفر ، وقد أكتفت لجنه المحاكمه وقتها بمصادرة الكتاب ،ولكن فى عهد السادات إنقلبت الآيه ،فقد أبلغه بإعجابه بالكتاب وطلب منه طبعه مره اخرى، ولكنه استبدل به كتاب"حوار مع صديقى الملحد" ،وتتوطد العلاقه بعدها بين دكتور مصطفى والرئيس السادات لدرجه أن السادات طلبه ليكلفه بمهام وزارة من الوزارات فأعتذر الدكتور مصطفى مبرراً ذلك بأنه فشل فى إداره اضغر مؤسسه وهى زواجه حيث انه تزوج مرتين ولم تنجح.
وبعد كل هذة الاحداث بفترة جاءت الكارثه التى كانت نقطه هامه فى حياة دكتور مصطفى ، وحدثت تلك الأزمه مع صدور كتابه "الشفاعه" عام 2000 ،وتتلخص فكرته أن الشفاعه التى سوف يشفع بها رسول الله لأمته لا يمكن أن تكون على الصورة التى نعتقدها نحن المسلمين ويروج لها العلماء وفقهاء الشريعه والحياه ، إذ الشفاعه بهذه الصورة هى دعوة واضحه للتواكل وتدفع المسلمين الى الركون إلى وهم حصانه الشفاعه التى سوف تتحقق لنا بمجرد الإنتساب إلى رسول الله، وكذلك كانت وجهه نظر دكتور مصطفى.
أثار الكتاب ردود أفعال واسعه ،واتهم البعض مصطفى محمود منكر لوجود الشفاعه من الأساس ، وتجاوزت الردود على الكتاب اربعه عشر كتاباً.
وحاول الدكتور مصطفى توضيح فكرة والدفاع عنه ، خصوصاً أنه لم يقصد إساءه للدين الإسلامى الذى كان طالما يدافع عنه ويرفع رايته ،إلا أن هذة الأزمه مع كبر سنه وضعف صحته أدت إلى اعتزاله الحياه الاجتماعيه ،فإمتنع عن الكتابه إلا من مقالات بسيطه فى مجله (الشباب) وجريدة (الأخبار) .
ولم يتذكر أحد:
أصيب بعد ذلك دكتور مصطفى بجلطه فى المخ أثرت على الحركه والكلام وكان ذلك عام 2003، وحتى بعد ما تحسن قليلاً استمر فى عزلته.
وقالت الدكتورة لوتس فى مقالها الذى نشرته فى العدد 69فى مجله الشموع :أن حاله الدكتور مصطفى متدهورة جدا وهو يعانى من آثار نزيف فى المخ ،وانه منذ عام يعانى فقدان الذاكرة حتى انه اصبح يتذكر المقربين منه بصعوبه .
وأضافت انه يعيش وحيداً فى شقته، وتعادودة ابنته أمل التى تقيم فى نفس البنايه للأشراف على متطلباته ، ولا يستطيع الخروج حاليا حتى إلى جماعه فى المهندسين.
واكدت دكتورة لوتس فى كتابها ان دكتور مصطفى يقضى معظم يومه فى غرفه فوق جامع محمود يسميها التابوت ،وقد كان الموت فى مخيلته دائماً وبعد ان ساءت حالته كثيرا انتقل الى شقته المجاورة للجامع ؛ فبعد اصابه مصطفى محمود بنزيف فى المخ وبعد فقدانه الذاكرة لم يعد يذكر أحد وللأسف لم يعد يذكرهأحد أحد!!
كتبه وأعماله:
تؤكد المؤلفه انه رغم مكانه دكتور مصطفى فى العالم العربى وشهرته الواسعه إلا أن عدد قليل جدا من الكتب لا يتجاوز اصابع اليد الواحدة هى التى تناولته بالدراسه ، وحظى كتاب واحد منها على اعجاب مصطفى محمود وكان دائم الحديث عنه وهو الكتاب الذى كتبه الراحل جلال العشرى عنه .
وأحصت الؤلفه كتب مصطفى محمود ب98 كتاباً فى شتى المجالات الروحيه والدنيويه، وتميزت هذة الكتب بإسلوب جميل فى الدعوة والقدرة على التقريب من الدين بكل المحاولات وأرقى الكلمات من خلال العلم والمنطق.
*وهذة بعض كتبه:
_"الله والإنسان "وهى مجموعه مقالات كتبت فى 1955.
_"شله الانس".
_"الشيطان يسكن بيتنا".
_"الشيطان يحكم".
_"رأيت الله".
_" حوار مع صديقي الملحد 1974 ".
_" محمد صدر عن دار المعارف 1975 ".
_" من أسرار القران 1977 ".
_" القران كائن حي 1978 ".
_" الإسلام في خندق (أخبار اليوم) ".
_" زيارة للجنة والنار (أخبار اليوم)".
_ " المؤامرة الكبرى (أخبار اليوم)" .
_" أينشتين و النسبية ".
_ " مغامرة في الصحراء".
_" رحلتي من الشك إلى الإيمان".
_ " السر الأعظم".
_" الإسلام السياسي والمعركة القادمة".
_ " عصر القرود".
_" سواح في دنيا الله".
*وتقول الدكتوره لو تس ان مصطفى محمود كان شاعراً بجانب أنه عالماً وكان اديباً كاتباً للقصه القصيرة والروايه والمسرحيه والسيناريو.
لكننا لا نعثر على كثير مما كتبه من شعر ، ربما لأنه مزق ما كتب ،أو رأى نفسه متحققاً فى فنون الكتابه الأخرى وقد نشر مصطفى محمود قصيدة فى كتابه السؤال الحائر ،وأسماها السؤال وتقول القصيدة:
يا صاحبي ما آخر الترحال
وأين ما مضي من سالف الليال
أين الصباح وأين رنة الضحك
ذابت...؟
كأنها رسم علي الماءأو نقش علي الرمال
كأنها لم تكن كأنها خيال
أيقتل الناس بعضهم البعض
علي خيال
علي متاع كله زوال
علي مسلسل الأيام والليال
في شاشة الوهم ومرآة المحال
إلهي يا خالق الوجد..من نكون
من نحن ..من همو..ومن أنا
وما الذي يجري أمامنا
وما الزمان والوجود والفنا
وما الخلق والأكوان والدنا
ومن هناك..من هن
اأصابني البهت والجنون
ما عدت أدري
وما عاد يعبر المقال
*حقاً لقد كان عالماً عظيماً واديباً متختبئاً وفقدناة ورحل عنا ،أدعو الله له بالرحمه والمغفره بقدر ما أفادنا بعلمه وأرشدنا وأمتعنا ،وأدعو الله أيضاً بأن يجعل منا وفينا مصطفى محمود آخر......

علشان تعيش

0 اللى إتكلموا

حس دايما انك حمامة وطايرة فى السما
حس انك وردة فى بستان ورود جميلة
حس انك حدوتة لانسان رمى...رمى اية؟
رمى الدنيا ورا ضهرة وعاش
واشترى نفسة بكلمة وقال يا بلاش
تقولى حب اقولك دة كان زمان
موضة قديمة كدة وراح عليه
اتقولى مشاعر اقولك يا عم دى اتباع فعل كان
حاجة كدة شغل سيما ملناش احنا فيه
اتقولى بكل لهفة ياخويا انا انسان
اقولك انسى كبر دماغك
علشان تعيش فى سيركنا لازم تنسى انك انسان
اعمل بهلوان
تقولى اجرب احب
اقولك ماشى
قولة بحبك رضى ماشى وماشى لو مرضيش
بس المهم قلبك يعيش
تقولى اجرب ابقى بتاع مشاعر
اقولك ماشى
تقول اة وياعين ياليل
تبص تلاقى واحد يقول ياعم هو حد فاضى لك
تقو بس صوتى مهوش جميل؟
ياريت يرد صاحبك يقول كلة نايم فى ليلك
تقول حبيبتى اجيب هدية
اقولك ماشى
تقول هدية لاغلى الاحباب ........تقولك البومة هات ياما جاب الغراب
تفتح تقول اة وتبص لك..ياخيبتى يا بختى
كان فينك ياللى هتهنينى يا ابن خالتى
وماينوبك انت غير كلمتين فى العضم
ياعم روح هو انت ناقص هم.......
فكرتنى بزمن زمان وصلاح جاهين وعجبى
احنا فى زمن هانى ووليد كان مالة بس زمن شلبى
احنا عايشينها دنيا ولعبة ذكاء
ودلوقت الطفل مايتولدش يقولك واء..
واء اية يابنى؟ انت مولود فى زمن الفراق
لوباعك اللى اشتريتة بيعة ايوة بيعة واكسب فية
مادام باعك يا رهيف الاحساس هتبقى انت علية لية؟
وخدها منى نصيحة صريحة يمكن تبقى غبية شوية
بس صدقنى دى اللى ماشية فى سوق يابا ويا ولية
وقولها لغيرك ومتخبيش
اذا اردت ان تعيش فعليك بالتطنيش
انسى حب....انسى احساس....انسى كلمة محبنيش
وقولها دايما
كلة عادى كلة ماشى
بس اعيش...^_^

يوم أن رحلتى

0 اللى إتكلموا


انتهى اليوم الغريب فى صباحٍ أو مساء

ما زلت أشعر بالأسى وسط جلباب العزاء

وفى أذنى صدى الآهات يصرخ فى خفاء

والعين تبعث على الخدود قطرات دمعٍ من دماء

فى القلب ماسآة زرعها موت الأبرياء

واللحن يعزف دندنات الحزن فوق تواشيح البكاء

لم تزل فى الدار روح ووجة من ضياء

تركونى أذهب فى الدروب لوداع قلبٍ من إباء

إعتدتة يوما يردد ألفَ بيتاً للبقاء

واليوم يعوى صوت موتٍ على أسارير الفناء

يا ألف جُرحٍ سلبوة منى قد إنتهى وقتُ اللقاء

وخرجت يعتصِر الكيان والف سكينٍ غطاء

وتذكرتها يوماً وصية إحفظى معنى الإ خاء

لا تحزنى اماة وعدٌ لا اخيب لكِ رجاء

وقبلةٌ منى اقبليها كميثاقٍ للوفاء

ضمينى أمى لحظة كى اكف عن البكاء

لا تتركينى للألم قد ولى عصرٌ للغناء

ان كنتى حقاً ذاهبة.. سامحينى فى السماء

اراكِ امى تحملى حقائبك

صافحينى حان وقتُ الانتهاء

ولأنحنى امام جسمان الرحيل حبيبتى الى اللقاء

وذهبتى تاركةً كل شىء إلا بريق الكبرياء

حبيبتى الى اللقاء ...

والله يا زمن ..مابإدينا

0 اللى إتكلموا

نسعى للهموم ..وهموماً تبكينا ..وهموماً تضحكنا حتى نموت ضحكاً .. تركنا التيفود فى بلدنا منذ زمن واختلقنا (بروباجندا) مرض جديد وقلنا انفلونزا خنازير حتى نبكى على أنفسنا من جديد ..ربنا يقويكى يا مصر .

جامعتى ..كنتى وحشانى

0 اللى إتكلموا

انهاردة الحد ...ايون يوم الحد... كان اول يوم فى كامعتى حبيبتى اللى وحشتنى طول الصيف وكان نفسى اشوف صحباتى وافضل اتنطط كالعادة هنا وهنا مرة تحت ومرة فوق وفى المبنى دة ومرة فى دة زى العفريته بطلع فى كل حته .

وحشتنى الدراسه والمواد اللى بجد بستمتع متعه غير عاديه فى انى ادرسها والسنه دى بقى المواد دخلت دماغى جدااا وحسيت انه كل حاجة واخدة حقها وانه هتبقى سنه( فللى) .

صحيت الصبح الساعه 8 كدة بالمحايله ودق الطبول( اقصد الموبايل ) وترن ترن وكنسل ترن ترن وكنسل ..صحيت بقى وامرى لله وبعد ساعه كدة بقيت شبه الطماطم باللون الاحمر اللى لبسته المهم بقى نزلت فى طريقى الى الجامعه .. وتفاجئت بقى انه صحباتى اللى وحشونى دول اصلا مش نازلين (اتدايقت جداااااا) بس اليوم الحمد لله مباظش ورحت وجبت جدولى الكريم واكتشفت انهم 6 مواد السنه دى (زادوا مادة ) وبعدين بقى وانا ماشيه كدة كنت بفتكر كل لحظه عدت السنه اللى فاتت ياااااااااااه عدت بسرعه اوى .

هنا قعدنا وكنا بنتكلم وبنرغى ..وهنا فطرنا الصبح وكنا يومها هنموت من الجوع..وهنا ملحقناش المحاضرة وقعدنا نندب حظنا لانها محاضرة مهمه .. وهنا كانت حكايات وزكريات جميله .. كل حاجة افتكرتها وكل مكان (لوحدى بقى واريد ان افعل الزكريات) بجد كنت زعلانه اوى انه الايام دى عدت وملحقتش افرح بيها كتييير وقد الزعل كنت مبسوطة اوى اننا لسه موجودين ولسه سوا ولسه ممكن نعيش احسن منها.. ايوة ممكن نعيش واكيد ان شاء الله اللى جاى احسن .

وبعد يوم مش طويل اوى وانا مستمتعه كدة مع نفسى قلت يا دوب اروح بيتنا لانه الجو بدأ يبقى حر والدنيا زحمه والدفعه الجديدة زى الجراد ماليين الدنيا فرحه اول سنه بقى.. بكرة يزهقوا ويقولوا (ياريت اللى جرى ما كان) اسأل مجرب .

وافترقنا انا وكليتى الكميله على ميعاد اخر الاسبوع ان شاء الله والساعه 2 الاربع كنت فى بيتنا مش قادرة اتحرك نوهااائى من المشى وطبعا طبعا نمت نومااااااااااااااا عميقاً.

أنا والقدر

0 اللى إتكلموا
قال أحبكِ.. قلت آآآه من السنين
أبعد عمرٍعشته فى حبهِ يعطى الحنين؟!
فلتعرف أنى وحيده فى متاهاتِ السفر
كم كنت أسأل الأيام شوقاً أن يأتى المطر
كم كنت سحابهٌ فى سماءِ الحزن تملأُها الغيوم
كم كنت كهلاً شاحباً.. تقتله الهموم
وظننت أن قلبى باعوه يوماً فى المزادِ بلا ثمن
وظللت أصرخ ...أبكى للزمن
مشيت تائهه فى الدروبِ أبحث عن سكن
فوجدت قلباً بلا سياط ولا شجون ولا ِمحن
فعشقتهُ وسكنتهُ وتركت حيانى بلا حذر
وبخنجر مسموم قتلت أنا زئير القدر
فبالله عليك لا تتركنى ولا ُتبكى القمر
قد وهبتك كل عمرى وألقى الكروان من فمه الحجر
إنى أحبك َرغم أن الحب أحياناً
يصير الموتُ يكمن فى الضلوع
وقد يَطُل كصرخهِ الطفل الوليد
وقد يكون الشمس فتذيبُ الجليد
إنى أحبكَ مثل حب الخيل الوافى
رغم أن الخيل ماتت بعدما إختَنق الصهيل
يا حبيبى لا أحب العشق فى صدرِ الظلام
ولا أحبك عهداً زائفاً.... جمّله كلام
ولا أكون تمثالاً من الشمع الرخيص بأى سوقٍ قد يُباع
ولا أكون رِهن ضوءٍ باهتٍ خلف الوداع
فإن كنت حقاً قد تُحب ..فأنا كالشمس لا تغيب وتنتظر
إن كنت وجهاً مستعار إنزعه ......ولينكسر
وليحتوينى الموتُ فى صمتِ الحُفَر
وأسوق أسفى للزمانِ وللقدر
ولينطفىء نور القمر
فلربما خذلنى النظر ...

يلا نفتح قلوبنا

0 اللى إتكلموا

بجد الله لو نفتح قلوبنا لبعض...

الله لونعرف بعض اوى

الله لو نشتغل بجد ونسيب علامه

يبقى لينا هدف

نحب بعض

نضحك بقى

نفرررررررررررح

ومنخدهاش صعبه

منقولش مستحيل

كله ممكن يتحقق

نقف جنب بعض

نمد ايدينا لبعض

ايه هيحصل؟؟؟؟

بجد هنحس الدنيا حلوة

هنشيل الانانيه

الله لو نعمل كدة^_*

0 اللى إتكلموا

REALLY, YOU ARE AGIFT ,AGIFT TO SHARE ,AGIFT IN A PACKAGE MARKED HANDLE


WITH CARE AND IWANT YOU TO KNOW THAT YOU ARE THe BEST GIFT I


^_^....HAVE EVER RECEIVED

لم أعد خائفه...

1 اللى إتكلموا
هذا هو الطريق....موحش للغايه ..فارغ ..لا احد معى انا وحدى ها هنا فى الصباح الباكر والندى يسقط على جبينى فيختلط بدموع الخوف
من ان اضل !!! وكيف اضل وهذا طريق مستقيم ..إننى حقاً لا أرى النهايه ولكن لا توجد انحرافات وأول الطريق عندى قدماى تلامس
الارض ........
ولكننى لا أرى!!! خائفه من أن اسير طويلا دون فائدة دون جدوى..إهدئى إهدئى..تمنيتِ الوصول دوماً أليس صحيح؟؟؟ نعم تمنيته ولكن..
بدون لكن ...فكرى ..قدماكِ على الطريق والغبار سينجلى والندى سوف يجف وانظرى بداخلك ...لستِ وحدك.. انزعى الخوف من الجذور
واركضى إلى الامام اركضى .............


وصدقينى أنكِ حتماً ستصلين

(الروتين) يقتل حياتنا

1 اللى إتكلموا
*الروتين


الروتين كما أعرفه هو الثبات على نظام معين ولا يوجد اوجه للتغيير أو الانحراف عن عادة من عادات هذا النظام لأنه

اصبح حياه معتادة لانحيد عنها ...

*أين هو من حياتي؟؟



اجد أن روتين الحياه اليومي أصبح مقدسا لدرجه أننا لا نحطمه ولا نفكر بإستبداله فأضعف الايمان أن نغيره بروتين آخر

ولكن هذا لا يحدث .


*نحن كشباب :



*كشاب :مقوله تتردد "أنا زهقت" ,"خلاص مليت ","الفراغ بيموتنى"..

لماذا وصلنا الى هذه المرحله من الاستسلام لشعور اللاشعور بحياتنا وقيمه وقتنا ؟؟


الذهاب فى الصباح للعمل أو الجامعة أو المدرسة والرجوع الى المنزل ليرى يوماً طويلاً عريضاً ينتظره فكما تأتى الريح

يذهب معها ..إن حدث جديداً أهلاً ومرحباً وإ ن لم يحدث فإن اليوم كأى يوم ..يأكل ويشرب ويتحدث ويغضب

كثيراً ..ويضحك قليلاً..ويشكو دائماً..ولا يفكر لأن يكون فرداً منتجاً حتى ولو كان الإنتاج حلاً لمشكلته التى طالما وجدها

مشكله ذو حل مستحيل الحدوث ولم يدرك أن قتل الملل وكسر الروتين هو ما سيجعله أ نجح وأسعد وفرد منتج ..

أين الرياضه من يومك؟؟ أين مواهبك؟؟ أين مميزاتك؟؟ أين عقلك كإنسان ؟؟ أين وأين ........تساؤلات وأين والإجابه ؟؟؟


"نعم أحدثك أنت وأتهمك بأنك مقصر فى حقك

نعم ..حقك ..أنت

والآن ..إنتبه ..ثم فكر

وسريعاً قرر.."


*كفتاه :مقوله تتردد "مفيش جديد " ,"يعنى هعمل إيه فى البيت", "اليوم بيعدى وبس "...

والآن أتحدث عن نفسى وعن لسان كل فتاه فى مجتمعى وأعترف أن السطور تحت بند الغير مسموح كثيرة وباللون

الأحمر تحتها ألف خط

ولكنى أفكر فى المعقول وليس الخيالى وليس الخارج عن حدود عاداتك ولا تقاليدك ولا حدود أسرتك ولكن حطمى

قيودك حطمى قيد الفراغ ,حطمى قيد جهلك بأى علم من العلوم الحديثة المتاحه أمامك ..

أين الإستغلال الصحيح؟؟ أين البرامج الهادفه من يومك؟؟ أين معلومه هذا اليوم ؟؟أين انتى من تحقيق ذاتك ؟؟

عزيزتى لكى مميزاتك التى تتميزين بها وأنا متأكدة ,ابحثى فى داخلك فربما تجدين سياسية محنكة ,أوأديبة بارعة,أو فنانة

عظيمة,أو ربه منزل فاضلة,أوطاهية طعام ممتازة...

"نعم أحدثك أنت وأتهمك بأنك مقصره فى حقك

نعم...حقك...أنت

والآن..نتبهى ..ثم فكرى

وسريعاً قررى.."


*كآباء وأمهات

*كآباء : مقوله تتردد "يا إما الشغل يا إما البيت ..تعبت"...


أعزره حقاً ..ولكن لماذا هذه الكلمات عمرها مئات السنين ؟؟ ألم يئن الأوان أن ننساها ونأخد الحياه بأسلوب أبسط .أعلم

أن الظروف مختلفه وأعلم أن المسئوليه قد لا تحتمل وأعلم أن اليدين فى الماء البارد تختلف عنهما فى النار ...ألم تقل هذا

؟؟ ولكن يا سيدى حاول أن تأخذها أبسط وصدقنى ستحل مشاكلك بكل أنواعها إكسر روتين حياتك ,وابحث عن الأب

المرح ابحث عن الطفل الذى طالما اشتقت إليه بداخلك وادعوه للعب مع أطفالك ادعوه لرحله سنويه لكى تترك فيها هموم

العام ..

وحمداً لله على إنى لم أطلبها شهرياً


اجعل عملك هو مجال إثبات ذاتك..اجعل منزلك هو مشفاك من آلام اليوم واجعل أبناءك هم أطباء مرضك اليومى

المزمن.

والاهم من كل هذا فتح عينيك على شريكه عمرك ,نصفك الآخر واجعلها تتقاسمك فى حياتك وقل لها ...أُحبكِ

"نعم أحدثك.. أنت ولا أتهمك ...

أنا أعزرك وأساعدك


والآن.. إنتبه ..ثم فكر ..

وسريعاً قرر"


*كأمهات:مقوله تتردد "يومى كله فى المطبخ هجيب وقت منين"....

انحنى إليكى احتراما يا سيدتى ..فأنتى الأم والزوجة والأخت والأبنه واعترف أنكِ نصف المجتمع المنتج .

ولكن لم أجد حتى الآن سيده مختلفة كلهن على نفس الطريق ..لماذا لا تفكرين فى نفسك دقائق؟؟

لماذا لا تلقين بروتين حياتك من نافذه مطبخك ؟؟ اظنها الأقرب اليكى الآن .

جددى فى حياتك ,صدقينى اقسم لكى ليس بالمستحيل . كم من سيدة مجتمع وأديبة وإعلاميه وسفيره وغيرهم ناجحة فى
الحياه العمليه وفى حياتها الأسريه ..

سواء كنتى ربه منزل او سيده عامله رتبى حياتك ..أعيدى إليها سعاده أولى شهور الزواج ..أسمعك تقولين والأطفال
ورعايتهم ..


يا سيدتى اصنعى حياه جديدة مع زوجك ,شاركيه كل شىء ,حدثيه كل يوم ..اشعريه بأنك ما زلت موجودة ..غيرى من
نفسك ,فى شكلك ,فى ملابسك..حتى تشعرين بأن قلبك يصغر عمرك عشرين عاماً.
احتضنى الأطفال واعطى لهم ما يكفى من الوقت ,اجعلى من بيتك مملكتك التى تحوى الحب والنجاح و الإستقرار
الدائم .

"نعم احدثك..انتِ..ولا أتهمك

أنا احترمكِ..وأساعدك

الآن ..إنتبهى ..ثم فكرى


وسريعاً قررى"



*أخاف من أن يكون أصابنا روتين فكرى مستمر ولا نستطيع الخروج من قيوده ..ولكن آمله أن تكون حالتنا ليست
بالمتأخره.



*كلمه أخيره


احضر ورقة وقلم ,حدد هدفك,إرسم يومك وليس حياتك,وكل يوم ورقه جديده


والآن إبتسم من فضلك.

العيد جانا ^_^

2 اللى إتكلموا

أولا آآآآآآآآآآآآآآدى العيديه بس محدش يطمع فى اكترمن كدة




انهاردة اول يوم من ايام عيد الكحك والشيكولاتات والحاجات اللى بتخن وتبوظ الدنيا...

سؤال جوايا من فترة كبيره ومش عارفه اجابتة دنا كمان مش عارفه أسأله ..هو يا ترى كل ما بكبر بفقد الاحساس بالحياه؟؟

اقصد يعنى بنشوف الحاجة من منظور تانى غير واحنا صغيرين ؟؟هو دة طبيعى طيب ؟؟ولا أنا بس اللى حسه كدة !!!

اصل بقالى كام سنه مبقتش بحس رمضان ولا بحس عيد.. يعنى رمضان بييجى اللى بيزيد فية العبادات وبيبقى شهر روحانيات وصوت

الجوامع وهى بتأذن سوا والشوراع فاضية ساعه الفطار وصوت صلاة التراويح والتهجد آخر ايام رمضان بحس إنة دة بيفرق معايا او

بيحسسنى احساس عالى اوى بس بيتسرق بسرعه لانة رمضان بيجرى مننا كل سنه قبل ما نشبع منه..........

وبييجى اليعد والاغنية الشهيرة "يا ليله العيد آنستينا "وكمان الاغنية اللى بحبها "العيد فرحة ..واجمل فرح..تجمع شمل قريب وبعيد سعدنا
بيها ..بيخليها ذكرى جميله لبعد العيد "كنت هموت وانا صغيرة واعرف مين سعد نبيهه دة؟؟؟؟؟؟؟؟ يكونش الراعى الرسمى للبتيفور او
الراجل بتاع المراجيح ....الله اعلم انا كنت بسمعها كدة على قد فهمى للكلام........


*زمان (مش زمان اوى يعنى ) وانا صغيرة فى ابتدائى مثلا كان العيد دة حاجة كدة جميله بنستناها من السنه للسنه وكل اطفال العيله

يتجمعوا فى بيت العيله ويبدأوا يعملوا كل الحاجات المحرمه اسرياً والتى ينص قانون بيتنا الهادىء على ان من يفعل ذلك ليه علقة معتبره من

بتوع ماما واحيانا بابا وكنا بنعمل ده كله تحت شعار "احنا فى عيد" ..........


كان ليله العيد دى نفضل نقيس فى لبس العيد ييجى حناشر تمناشر مرة وكأننا مش مصدقين انه اللبس الجديد دة بتاعنا فستان العيد بقى

والفيونكات الجديدة والجزمة اللى كانت بتنور دى والله ما عارفة الواحد كان بيلبس الجزمة دى ازاى حتى الشراب المخطط او اللى كلة

دباديب وورد ........ كنا بفرح بيه وكله كوم وشنطة العيد كوم لانها طبعا تمثل بنك العيديه العزيزوكمان مخزن الشيكولاته اللى مبيجيليش

نفس اكلها وقتها فاكلها بعدين بقى..الله كانت ايام جميله

*دلوقت العيد بقى مختلف شوية بحس انه الواحد كل مايكبر كل ما بيفقد الاحساس بالفرحة بتاعه العيد يمكن دة لاننا بدأنا نتشغل بالدنيا يعنى

بدراستنا وحياتنا ومشاكلنا زى ما بيقولوا بقى صعب حاجة تضحكنا ولا تفرحنا من قلبنا مش معنى كدة اننا منقوعين فى الهم لا سمح الله

بس إحنا اتعودنا عليه وصاحبناه وهو حبنا ولزق فينا وبقى زى ضلنا ....

بقى العيد دلوقت مجرد مناسبة اه ليها فرحتها وتهانيها بس بعقلانية اكتر من زمان بمعنى اننا نزور قرايبنا من غير خناق مع عيالهم ولا

خطف للشيكولاته والكحك من بعض ونتجمع بردوا فى بيت العيله بعد ما بقينا احفاد كبار على الشقاوه حوالين جده وجد وعيله جميله فرحه

العيد بتربطها وتجمعها علشان دايما تبقى فاكرة بعضها ..

بس لسه السؤال معلش بيطرح نفسه ,

مين اللى اختلف احنا ولا العيد ؟؟؟

ورده حمرا

0 اللى إتكلموا

وحشنى حضن احلى وردة فى الوجودانا شفتها

ايوه وردة ....وردة حمرا ...ولونها فاقع


زغلل عينيا من يوميها ولحد يوم ودعتها


ودعتها!!!!


لا ..ودعوها ورد الجنينة


والله يومها ما شفتها


يوم المطر كنت اروح اتخبى فيها


وتقول تعالى جوا حضنى

استخبى


لجل ألوان الجنايح ما تبقى زاهية

مش مهم اوراقى انتى تدبليها

قلت انا


لا مهم تضلى وردة واحلى وردة


لجل الفراشة النونو حتى .......


ولا انتى زهقتى منى ؟؟؟


ناوية تسيبينى !!


ردت وقالت ...


اسمعينى



كلام هقوله افهميه


اوعى تنسى كلمة منه


هتحتاجيه


كل يوم بييجى الجناينى عند منى


أنا بتفزع


ليومها ييجى الدور علية


ومن جدورى اتِقلع


وأسيبك لوحدك


والله خايفة اسيبك لوحدك


بس اسمعى


ومتدمعيش


صدقينى انا عايشه ليكى


ورد الجنينة.... ميهمنيش


بس لازم يهمك انتى


انا قلت لة إن انتى بنتى ..


فى المطرة ممكن تلأجى له
يدفى بردك


فى الشمسة لازم هتروحى له
عشان يضلك


قلت لك متدمعيش
وانا لسه جنبك


احضنينى


بللى بالدمع خدى


اسمعى آخر ما عندى


قبل ما الجو المندى

يفوق الجناينى ييجى

اوعى صرخة فى يوم تخضك

ولا دمعة من عينيكى يوم تهزك


امسحيها واتناسيها

وارسمى مكانها بسمه


طيرى بيها على الورود


اللى فى جنينتك


وشوشيهاوفكريها



إن الوردة الحمرا أمك


وإن لقيتى شوكها جرحك

متعيطيش

اصرخى

وقولى بحبك

هسمعك وهداوى جرحك

عرفى روحى بجد

إنى وحشتك
ووقت ما الايام تعدى هتحسى عطرى جوا فًرحِك
هتلاقى همسى يفكًرك ..
ان الحنان والحب هما دورك إنتى

عيشى بيهم

وعلميهم للفَراش النونو لسة

وإحكى ليهم

عن جدة كانت وردة حمرا

ضمت مامتهم.. علمتها الحياة بحب

ورثتها بعد منها ........أحن قلب

يلا طيرى وسيبى حضنى

بلاش عناد

الندى صَحى الجناينى فى المعاد

كل يوم جوا حلمك هتلاقينى

من قلبى قلت

يا أحلى فراشة هتوحشينى

استنى ارد

يا خسارة طرت


بس انتى بردوا يا أمى

هتوحشينى


صديقى ..ما أعظمك

0 اللى إتكلموا




العنوان حلو أووووى والعنوان بس ليه قصة معايا ...


كنت انا و وصحبتى (الانتيخ) سوا فى معرض كتاب كان فى بنها فى الصيف من سنة كدة وبصراحة كان نفسنا نشترى كل الكتب مش


كتاب ولا اتنين بس طبعا الميزانية كانت (هتخرم جداااا) جريت حضرتى على الركن الوردى اللى بعشقة وهو يا سيداتى ويا سادتى ركن الادب.


ادور بقى وافتش واقلب الدنيا على حاجة كدة لعم صلاح جاهين ولا كتاب لانيس منصور ولا رائعة لاحسان عبد القدوس المهم وقعت عينى على اسم الكتاب وهو (صديقى ما أعظمك) بصراحة سبقتنى صحبتى الاروبه وجابتة وخبته منى على اساس انى معرفش العنوان وعلى اساس انة مفاجئة لية على اساس بردوا انة كتاب عن علاقة الصديق بصديقة او مدح يعنى وكلمتين حلوين فى الصداقة .......وكان ما كان ...بمعنى ان العنوان خانها وخاننى.

ولم اجدة الا مقالات من اروع ما كتب الاستاذ الرائع /عبد الوهاب مطاوع وما اشهرة كلنا نعرف الاسم واعتدنا علية من خلال بريد الجمعة سابقاً ياااااة دة اسم كبير اوى وبنى ادم رائع كنا كلنا بنحب نشوف ونقرا ازاى هو قدر يساعد الناس وقدر يحل المشكلة ببساطة ووعى كامل بما ينصح به القراء .. وخدت الكتاب واتحط جنب اخواتة فى الدرج العظيم فى اوضة حضرتى .


ومن فترة قريبة حبيت اطلعة واعيد قراءتة طبعا مش فاكرة دى المرة رقم كام اقراه لانى بحب احفظ الكتاب مش بس اقراة



*المهم ودة موضوعى *


*فى مقالة تحت عنوان صديقى ما اعظمك كانت رائعة قال فيها الاستاذ العظيم وحب يوضح فكرة انه لحد امتى هتبقى مش عارف قدراتك؟؟


ولحد امتى هتفضل محلك سر ؟؟؟؟ ولحد امتى كمان مرة هتفضل مقفل على نفسك اوى وخايف تعرض اللى جواك على غيرك ومقتنع انك صح الصح واية بقى( حد مجابتوش ولادة )؟؟.


هو حكى حكاية حصلت معاه على المسوتى الشخصى إختصارا ليها انة فى فترة افتكر نفسة هو زمايلة انهم اصبحوا علامة فى مجال الموسيقى والاوبرا لمجرد انهم واظبوا لفترة على حفلات دار الاوبرا وعلى سماع( بيتهوفن ) وغيرة من الموسيقين الجمال دوول

ومحاولوش يكتشفوا هل هما فعلا بقوا كدة ولا دة من وحى خيالهم وخلاص .

واستغلوا دة بكل جراءه وتعالى على الغير (لكن فى حدود الادب طبعا) المهم حاول يوصل لنا مبدأ( فوووووووووووووووق من نومك)

اعرف قدراتك ...اعرضها على غيرك ...ان كنت صح وموهوب ..نمى القدرات دى واوعى تتنازل عن حقك فى انك تكون مبدع ان كنت موهوم فوق واصحى وفنجل عينك قبل ما تفوق بصوت عااااااااااالى يقولك (شيل الميكرفون يا جدع ) وساعتها بجد هتوجعك....


حقاً احييى هذا المبدع

دعوة عشاء

0 اللى إتكلموا
فى حجرتى


فى مملكتى الصغيرة


نعم مملكتى ...ومالعجب فى أنها ممكلة


وأحبها ....أعشق أركانها


فى ليلة القمر المنيرة


دعتنى النجوم إلى العشاء


فى شرفتى


تأنقتُ ..وتملكتنى الحيرة


الأزرق أم البنى


اخترت الرداء الأزرق



أعشق الأزرق


وخاصة


مع حذائى الفضى


ذو حبات اللؤلؤ


*إنها الشرفة ....


لِمَ التأنق !!!!!!!


وإنها النجومُ


أى دعوة هذه


لابد للأميرةِ أن تتأنق


ودقت ساعة حائطى


حان الميعاد


وتنحى الستارُ عن الزجاج

النجوم فى الإنتظار

نجمة الركن اليمين


ما أجملك !!!


نجمة العشاق أنتى ؟!!


أليس كذلك ؟


*فتبسَمَت



عزيزتى الفرح فى عينيكِ غامر


خبّرينى أقصوصتك



*يا نجمتى


آخر أخبارى


أنى أ حببت

وفى بحر العشق


دبت ودبت


وفى السماء أنا حلقت


وما كان منى سوى أن ضحكت


*نجمة الركن اليسار


ما أروعك!!!


نجمة النجاح أنتى ؟!!


أليس كذلك؟


*فتبسَمَت


عزيزتى حلمك بدا يحقق


خبرينى أقصوصتك


*يا نجمتى


آخر اخبارى


أن الكنز أبحث عنهُ


قلم و ورقة


الآن أمامى



سأكتب كلماً والآن أحقق أحلامى


وما كان منى سوى أن ضحكت


وأنتى يا نجم السعادة


أتخجلين أن تسألى ؟؟


زمن الأحزان ولى ...


لِمَ تسكتين ؟؟؟


من دون قولك خبرينى

سأخبرك أقصوصتى


*فتبسَمَت


يا نجمتى


آخر أخبارى


أنى تعلمت السعادة


وكل فنون الضحك


إعتدت أن أفرح


حقاً إنى سعيدة

وما كان منى سوى أن ضحكت


وما تبقى من أنجمى


كانت نجمة القدر


مبهمة.......


وضوؤها متأرجحٌ


لا تتحدث كثيراً


وليس لها وعود


خاننى الهدوء


بدأت أشعر بالقلق


إنها تبتسم تارة


وتقطب وتزمجر تارة


بحثت فى الزاكرة


حاولت أن أتذكر للقدر أقصوصة


نعم.....أقسم أنى حاولت


ولكن .....إكتشفت



أن القدر يمتلك كل الحكايات



وليس له حكاية بذاتها



فصمتت



كدت أبكى


وإذا بضوءٍ ساطع ٍ


إختفت النجوم !!!


أين مائدة العشاء ؟؟؟


أين الرداء؟؟؟


وأين حبات اللؤلؤ فى الحذاء؟؟؟


لم أجد سوى السرير مع الغطاء


وصوت أمى حبيبتى


"يلا اصحى ...مش يا دوب علشان تزاكرى ؟؟"


قلت يااااااااه


دعوة جميلة



ياريت تجينى كل ليلة