شوف اللى بيحصل!!

كلمة منى

السكوت لا يضر فالأفواه المقفلة لا يدخلها التراب! (أنيس منصور) ولكننى إخترت التعامل مع التراب .. نورت بيتى الصغير ^_^

كلام مبحبوش الحقيقة بس متغاظة!!!

1 اللى إتكلموا
مشكلتنا اننا مش عارفين اننا فى مشكلة اصلا ودى المصيبة والله عمالين نعيش حياتنا بالطول والعرض وهى اصلا خنيقة ومينفعش تتعاش لا راضين نفوق ولا نتكلم مش بصوت عالى لا مع بعض حتى بقينا جبناء اوى
ويقولك متقولى قصيدة يا عم ولا اكتب كام بيت كدة جامدين لا اله الا الله اية دة؟؟ مفيش دم حضرتك؟؟
المفروض انك المفروض انك فى منصب انك تعل..............ولا بلاش اصل اتفصل ولا حاجة وانا لسة اول الطريق وعندى امل انى اتخرج ان شاء الله

لا وحضرتة عايز قصايد وردية جميلة كلها هيام وغرام وجعفر بيحب زليخة وبيقولها وحشتنى يابت قالته

اسكت يا ولة كسفتنى وحعفر بيفكر ياخد زليخة فسحة كدة قالتة بس يلا لاديك بالبوكس فى مناخيرك ..........

وحكايات وحواديت وحلوة اوى والدكتو......... اقصد يعنى انة مستمتع بالكلام وكلة زى الفل وقشطة

لكن اجى اتكلم واعك شوية رغى على حالنا المهبب وبلدنا مصر المنكوبة اقصد المحروسة يعنى وشة يحمر

ويضحك لحد ما اعرف نوع معجون سنانة ويقولى( تؤتؤ .....ممنوع) زى عساكر الامن المركزى كدة

ممنوع اية يا عم الحج يقولى حضرتة( اسمع انا وانتى بينا وبين بعض على دماغى لكن برة ممنوع )

برة فين ؟؟؟ مش فاهمة ..واللى فهمتة انة الكلام دة ميتسيحش فى مسابقة ولا قدام الع........ ولا رئيس

ال......... لا والله طب واية يعنى ؟؟
لكن اتضح لى انة المشانق ممكن تتعلق وعيش ناس ممكن يتقطع وناس كمان ممكن بعد تعب الثانوية

متكملش تعليمها قلت لا بلاها هو انا ناقصة اوشوش نفسى وخلاص وبطلت اتكلم خاااااالص

بس مش خالص اوى يعنى اموت كدة محسورة وكاتمة فى قلبى وساكتة لا طبعااا ميتفلقوا بس انا بعد الشر

عنى والنبى اللى بيروحوا الايام الصغيرين وانا لسة عايزة مامتى تفرح بية وافرح بشبابى يبقى لازم اعمل

فلحوسة سوسة مش محبوسة واتكلم وارغى (بس بصوت واطى)..............هس بشوييييييييييييييش

قلت بقى لا هقول حكايات وكلام نحوى دمة تقيل وبيطلع نصة غلط عندى لا مش هعمل كدة

انا بس هقول اللى غايظنى وفارسنى وخلانى بقيت شبة جوز عمتى بعد ما شديت الجزء الفاضل من

شعرى والحمد لله

فرحانين اوى اوى وكلة تمام !! وكل واحدة قاعدة جنب امها تناقر فيها ويتخانقوا على غسيل المواعين

ونشر الهدوم لحد ما امها زهقت منها اصلا مهى على قلبها اكتر من 25 سنة اهو وخلااااااااااص بتضرب

اخماس فى اسداس لا شايفة بنتها عورة ولا مجنونة ولابخمس رجلين ولا ليها 13 صابع ولا حاجة

امال يختى محدش بيخش علينا لية ؟؟؟ حد يعنى يقول انة اتهبل واتوكس وعايز يتجوز البت؟؟

مع كل كمية الضحك اللى بتظهرها الست الوالدة وهى من جواها بتتحرق كل يوم وهى شايفة حال البنية

قدامها وصراحة ميسرش عدو ولا حبيب وكل ما تسمع جملة (هو انا وحشة اوى كدة ياماما) بتحوش

الدموع بالعافية وآآآآآآآآآدى حال بناتنا اللى طول النهار (لا وبقوا بالليل كمان) فى الشارع على سنجة عشرة

ولا فيش ياختى اللى يقدر

(واحنا بنتكلم فى الكورة والحضرى مشى غريبة والله ........هم يضحك وهم يبكى)

نيجى بقى للعيال (مش هقول رجالة طبعااا) بتوع مامى وبابى و خواتى بياكوا مربى يوماتى يا خبر دة

منظر بجد مقزز(حلوة مقزز دى ) ومقرف جداااا تبص تلاقى واحد كدة ملو هدومة المفروض انة يطلق

علية حسب التصنيف انة ذكر بس لا حول ولا قوة الا بالله الظاهر انة كان نفسة يطلع فتحية بس للاسف جة

فتحى والعلامات واضحة ::واولها طول غريب وملحوظ فى الشعر وناقصلة توكة بس والبريستيج يبقى

هايل وبعدين سلسلة كميلة كميلة حوالين رقبة سعتة ناقصها جرس وتكتمل الصورة وبعدين بتاع والله معرف

اسمه اية فى ايدة والله اعلم بيقولوا (حظاظة) وانا احب اقول عليها (عضاضة)لانى الكتوموتو بيسنن

وبعدين صدر قميص مفتوح معرفش واخد فى وشة ورايح فين .... طيب بفكر بقى انة فى الشتا يجيبوا

بلوفرات مفتوحة بردواا ونبطن بقى منطقة الصدر ب(بفتة) ولا حاجة علشان ميخدوش برد يا عين امهم

نيجى بقى لاهم حاجة الا وهى

....................................
................................... معلش اصله بيقع كل ما اجى اكتبة يتزحلق وهو (الزعطلون)

معرفش اية الميزة فى انة يكون واقع يعنى فاضل لاى واحد منهم خضة صغننة او موقف كدة ولا كدة

ويكون شكلة (سوووووو باد ) ادام الخلق كلها وياعينى على شباب الجيل (الهايل الرائع الناجح) اللى هو اصلا
( مايل واقع مش فالح ) ولا بقى موضوع اللبانة يوووووووووووووووة حلو اوى وتبص تلاقى باب

جراش بيتفتح طالع نازل. نازل طالع وجواة حاجة بالوانها المختلفة وعلى حسب بقى فراولة وموز ونعناع

واشكال والوان ....... واية يابت انتى اللى غايظك ؟ ها شباب وعايش حياتة وانتى مالك ؟ والجملة

الشهيرة البهيرة (ما هو كلة كدة اشمعنى انا ) اقولك لية لانة قدك يا ننوس عين مامى بقى انسان نافع

عمل حاجة فى دنيتة اتخرج واشتغل وبقى راجل راجل ها خلى بالك بلاش اتخرج دى انا لسة فى الكلية

ولسة بدرى إتخرج مدايقاك بلاش.. فى الكلية وبيزاكر وعايزة يعمل حاجة حلو الكلام كدة؟ وانت لسة

بتاكل لبان ياعم شيل اللبانة وريحنا ......

(واحنا بنتكلم فى فيلم العرض على روتانا سينما..هم يضحك وهم يبكى)

جعااااااااااااان يا ابلة .. ربع جنية والنبى إلهى ربنا ينجحك ... حاجة لله والنبى إلهى يستر عرضك يا بنتى

جمل حفظناها فى شوارعنا وحاجة تقطع القلب واول جملة بنقولها انا شخصيا ساعات كتييييييييييير بقولها

(مش معايا فكة) طيب ما نفك الشعب المصرى كلة ماشى بميات وخمسينات مفيش نصاص ولا رباع على

الاطلاق ذنب دووول اية والنبى ؟ ودموع اهاليهم على جوعهم وعليهم اية مبتخلصش واحنا ماشيين بفلسفة

(ياتكوا الارف مليتوا البلد) والله جاتنا احنا الارف مش هما اقلة احنا مالين البلد على الفاضى لكن هما

بيحاولوا ولو حتى بمد ايدهم ليناا ما علينا مش مهم


(واحنا بنتكلم فى الجبنة الرومى بقت معرفش بكام ...هم يضحك وهو يبكى)

العيش ...كلام كتير اوى اوى ونحن بجدارة عندنا ابطال واخدين بطولات جامدة جدااا فى محاولات اجتياز

طوابير العيش والوصول الى الرغيف وسط هجوم كبير وبيطلعوا عايشين دة انجاز والله

ويفضل عم امين واقف كل يوم قبل الشغل على طابونة العيش وحبة يقعد وحبة يتمشى وياخد لة لفتين

بالعجلة لحد ما الناس تخف ولا ناس بتخف والعيش بيخلص وخناقة بتبدا بعد صدور نبأ عدم خبز اى عيش

زيادة وعم امين هاتك يا لف لحد ما اليوم يعدى والعرضة ضاعت علية واتعلم على اسمة غياب.......

اما عمنا امين يموت حضرتة من الجوع ويردد (((احد احد )) او يموت من الضرب والتكسير على

الطابونة من وجهة نظرى اقولة (ما انت كدة كدة ميت) يعنى روح يا عم الج البيت وصلى على النبى

(واحنا لسة بتكلم فى شريط كامل بوسنى الجديد... هم يضحك وهم يبكى)

ايون تلاتين مش مصدقين طب وحياة ربنا مستشفيات حكومتنا المبجلة المعظمة تحتوى الغرف ة الواحدة

سيداتى آنساتى سادتى على 30 مريض فاكثر واحد فو ق السرير وواحد تحت السرير وهكذا( دواليك

دواليك) اية دواليب دى ؟ وكمان اطرش ياعم متاخدش بالك انا بخطرف من السخونية بس والدكتور يا

عينى وشة محمر وماشى بعلبة مناديل يبص هنا شوية وهنا شوية وتحت السرير على الناس اللى تحت

يطمن هما لسة عايشين ولا هيفلسعوا ويفضوا مكان واية اوض زى الفل نضافة اية ولا اى تراب نوهائى

ولا ورق وعيال بتعيط وطبيخ وواحدة جايبة محشى معاها ولا حاجة احنا ناس زى الفل نشرف والله !!


(واحنا لسة بنفكر مين السبب حماس ولا الصهاينة..هم يضحك وهم يبكى)

عفار بقى وناس داخلة وخارجة وعصيان من اللى قلبك يحبها دى وكبايات شاى على كل مكتب وعيال

بيتكعبلوا فى بعض وهما بيجروا قال يا اخويا دى مدرسة ؟؟ ولا اصلا فية تعليم ولا ولا مدرسين بضمير


(الا استاذ حمام اللى نازل شرح من ايام ليلى مراد) وكلة نايم فى العسل نوم المهم العيال بتروح المدرسة

تستجم وترفه عن روحها هنموت العيال يعنى ولما يزهقوا من اللعب بينطوا من على السور تعرفوا انا بفكر

ابعت مناشدة لوزير التربية والتعليم انة يكهرب جميع اسوار المدارس وكدة نحل المشكلة

(واحنا لسة هنلاقى بنزين 80 ولا لأ ..هم يضحك وهو يبكى)


ناقصين احنا فلوس نشترى مية كمان ؟؟ على اسا س انة احنا اغنياء جداا ومش عارفين نعمل اية بتلال

فلوسنا كل بلاد العالم اللى ربنا خلقها بتشرب من الحنفية وزى الفل احنا بقى لو شربنا من الحنفية هييجى لنا

تسمم وهنضطر نروح تحت السرير مع اخوانا المجاهدين فى المستشفيات ...المية مجارى اة فعلا

وحكومتنا بردوا اللى لسة معظمة تقولك واحنا مالنا مهى المجارى دى بتاعتكم ؟؟ تصدقوا حق

ناس حقانية مش عايزين يا خدوا مننا حاجة مجارى بتاعتنا يا جماعة وبيرجعوها لنا لية بس بتفرضوا سوء

النية؟ اشرب يا عم خلي نفسك حلوة


(واحنا لسة بنفكر دوريتوس هينزل طعم جديد ولا لأ..هم يضحك وهم يبكى)

صوابعينى وجعتنى وبصراحة خفت اة خفت ومالوا لما اخاف يعنى وبعدين انا بمشى فى حياتى تبع للحكمة

الشهيرة (الاعتراف بالحق فضيحة)

بصوا الكلام دة بعد ما تقروة تنسوة وياريت تنسونى انا كمان اصل تغلطواااا والحيطان ليها ودااااااااااان

والله يستر يا جدعان لاخش اللومان وسنتنا تبقى بتنجان ومن اول قلم هعترف ................
الله يستر

اية تهمتى!!!

0 اللى إتكلموا
قصيدة كدة دبتها بصراحة كنت متغاظة اوى من حال الدنيا ومصايبنا اللى بتكتر واحنا ساكتين ونقولك مستورة والحمد لله دة اية الشلل دة اة نرضى وكل حاجة لكن دة استسلام نقول مستورة لما تبقى بجد مستورة لكن كدة مكشوفة ومكشوفة اوى والدبان كمان زايد ........
ندخل بقى فى الرغى اللى طلع يومها وانا محموقة اوى

تعالى يا عم وقولى بيتين قدام راجلين ونقولك هايل

فلان وفلان والحج احمد وام محمد عملوا عمايل

يا استاذى استنى شوية....اسمع بس

لية سؤال اكيد من الدرس

ايه تهمتى اللى تخلى حياتى حبس فى حبس

شعر اية اللى جى تحكى عليه يا خال

لا انا جى اقولك شىء مدايقنى ولا غايظنى

ولا اهو موااال

انا بس قلت اوضح حاجة وشىء فى خيالى

ما شفتة اتقال

مواويل بنحى ونقول فى قصايد وعروض بحره

خيال فى خيال

سبنا اية قولى ! غير هم يهد جبال

بنوتة حلوة شبة البدر خفة ودلع

بس يا خال القلب بين ضلوعها انقلع

العمر فات والقطر عدى ما ساب للحلوة حتة جدع

لسة هقولك شعر.. ولا اقولك ايه تهمتى؟؟؟؟

وشاب فى العشرين عشرة منهم ضاعوا فى سجاير

لا شغلة ولا مشغلة واللى زية ابن مين بنى العماير

يا خال ويقولك عبرة دة فى شعبنا شفنا العباير

لسة هقولك شعر.. ولا اقولك ايه تهمتى؟؟؟؟

جعان يا مة صرخة طفل لحمه اختفى

دموعها جفت حاضر يابنى البير اكتفى

وقبل غسله صرخت امة كفانا فلسفة

لسة هقولك شعر..ولا اقولك ايه تهمتى؟؟؟؟

طابور طويل ومحطة بس للانتظار

لا دور بييجى ولا عيش بيوصل موت يا حمار

اخرج منة..روح بيتكم ما كدة انتحار وكدة انتحار

لسة هقولك شعر..ولا اقولك ايه تهمتى؟؟؟؟

عنكبوت فى سقفى وتلاتين مريض منين تفوت

يا طبيب اكشف من بعيد لجل الزحام لحسن تموت

راحت جروحهم للى يرحم والعنكبوت راضى السكوت

لسة هقولك شعر ..ولا اقولك ايه تهمتى؟؟؟؟

عيال كتير وجهاز تنفس ودوا فى ازايز

مسابقة هى .. مين اللى يرحل قبل غيرة مين اللى فايز؟

بس خابت لانه آخره جنازة واحدة ... مش جنايز

لسة هقولك شعر ..ولا اقولك ايه تهمتى؟؟؟؟

سجن كبير زنازين كتير قال اية فصول من غير تلامذة

فى الحوش دة فسحة بعد حصة من غير مدرس ولا طفل فذة

سنين والدرس زهقنا منة قول يا اطرش.. ياء وهمزة

لسة هقولك شعر..ولا اقولك ايه تهمتى؟؟؟؟

قالوا لنا المية غالية حافظ عليها خاف الشبح

بعلو صوتى قلت وبا مجارى والله صوتى انتبح

قالوا لى هى مجارى منكم فى البلدية بير وانتزح

لسة هقولك شعر..ول ااقولك اية تهمتى؟؟؟؟

تعبت يا خال اظن فهمت قضيتى

اسأل سؤال الرد يرجع ميت سؤال

تهمة الزمن يا خال ولا بردوا تهمتى؟؟

وإن كنت حكمت شوف الحكم هيبقى لمين؟

احكام بتطلع على الاحياء مش ميتين

ولا اقولك...نفذ بأة برصاصة هى او مشنقه

ما تفتكر هنحس بيها ..متنا يوم رضينا الشقى

بس كلمة قبل السكوت

كلمة واحدة حدة وموت بموت

التهمة ياخال مش تهمتى

التهمة انى من البلد دى عشت فيها

والاهم مت فيها بحسرتى......

قرارات فى ثواااانى

1 اللى إتكلموا
ان ان ان

اقول امتى امتى ...اة امبارح اذ فجاة كدة وانا خير اللهم اجعلة خير يعنى قدام الكمبرورر على راى البت سارة اختى الصغنونة قريت حاجة حلوة اوى هى قصة واحدة كدة مبدعة كاتباها حسيتها معرفش لية
ونادر يا اخوانا لما حدبيحس حاجة خصوصا وفى دماغة 100 حاجة زى مثلا المزاكرة والامتحانات قربت وانا لسة مش عارفة حاجة ....... اية كمية الحاجات دى ؟؟؟ ما علينا

ساعتها بقى كنت اصلا اصلا مخنوقة ومش طايقة حاجة ولا طايقة نفسى والدنيا سوووودة بقى والايام وحشة والساعة باظت فجاة (الوقت مبيمرش يعنى بس انا بحب اتفلسف) واية دة كارهة كل حاجة
ساعة بقى لما قريت القصة دى حسيت فجاة انة ولا حاجة تستاهل انى اكون كدة (رخمة يعنى)

لا يا بتا اية الهبل اللى انتى فية دة .... مدايقة نفسك على مواقف هايفة وتفاهات ولحد امتى هتفضلى كدة؟؟
ها لحد امتى هتضيعى احسن ايامك ولحد امتى هيفضلوا صحباتك كل يوم يقولوا الكلمة اللى كرهتها......... مالك؟؟؟؟؟؟؟؟؟

وانا اقول مفيش بردة كلمة رخمة اوى وافضل مزرزرة طول اليوم ومكشرة ومتنحة ومذبهلة على مفيش

لا اله الا الله طيب ما اتغير احسن هنقص حتة يعنى لو غيرت اسلوب حياتى
لو حسيت انى بعمل حاجة فى الدنيا لو حسيت انة لية فايدة ( غير انى انشر الغسيل وساعات اتكرم والمة واطبقة ) انى اضحك بجد يعنى اية بجد دى؟؟

يعنى من قلبى يعنى اعيش يومى ابطل بقى افكر فى بكرة مهو طول ما انا شاغلة نفسى بإية هيحصل بكرة لما اصحى من النوم لا وافضل اتنبأ بالحزن والهموم الفظيعة الغير منتهية وازعل عليها قبل ما تحصل والله حاجة تجنن

وصلنا لانة طول ما انا بفكر فى بكرة وافرض الوحش هفضل كدة

لذلك قررنا نحن (معلش حتة نحوى)

اولا: انى افك التكشيرة دى شكلى وحش اوى كدة (حسة انى شبة ام عبد الباسط اللى بنجيب منها الطماطم لما حد بيفاصل معاها)

ثانيا: انى اعيش دلوقت بس اللحظة دى بحلوها ومرها

ثالثا: امممممم قلنا فوق مرها بردوا هحاول انى اقلل مرها دة على قد ما اقدر

رابعا: دة بقى خاص بإنى اقلل مرها يعنى هتعملى اية يا بت (هتشتغلى مع بتوع سكر الاسرة )

لا هعمل اللى بحبة دايما يعنى اشغل نفسى بية جداااا لحد ما احقق ذاتى فية جدااااا واطوى صفح امبارح السودة ام كتابة صفرا اللى بتوجع العين دى هطويها خالص
هتحدى نفسى اللى مبتسمعش الكلام دى اللى بتعز العياط اوى
زعلت بعيط ودة طبيعى والا اكون مجنونة
طيب لية بقى لما بحس بفرحة ولو صغننة بعيط بردوااا (واضح انة لقب مجنونة لزق فيا )
قررت انة شلالات المية اللى بتفضل نازلة على وش حضرتى تقل شوية
قررت بردواا انى احس انى بعمل حاجة لحد يعنى اية طيب؟؟ يعنى يبقى لية هدف ؟؟ يووووة
خلصينا يعنى اية بردواا؟؟ يعنى اساعد حد محتاج لى او مش محتاج لى (رخامة بردوا هساعدة)

يعنى هتشتغلى فى مؤسسات خيرية ولا هتسرقى جيب قميص بابا كل يوم ؟؟

لا مش كدة ولا كدة انا هساعد ولو بكلمة ولو بنصيحة كدة تخلى حد مبسوط وحاسس انة مرتاح ويقولى جزاكى الله خيرااا
اصلها حلوة اوى اوى لما سمعتها امبارح كنت مبسوطة جدااا اصل امبارح يا اخوانا كان اول يوم فى تطبيق النظام الجديد

وادينى ماشية فى ظل تطبيق الغييرات اللى قررتها لحد ما نشوف اخرتها مع عقلى اللى مبيفصلش شوية دة
بس اللى عايزة اوصلة من الاخر علشان اريح واستريح
انى حاليا الحمد لله لاول مرة فى حياتى احس انى قررت صح لا وكمان اية نفذت يا جماعة
بس يارب استمر وميجيش حاجة غلسة فى النص تلخبط لى الدنيا
اصلى حسة انة كمان الناس بدات تحس الفرح فى وشى وخصوصا الناس اللى بردوا كانوا هما اللى بيحسوا لوية البوز والضيق ........

يلا يارب ثبتنى وبس مش هقول غير كدة