شوف اللى بيحصل!!

كلمة منى

السكوت لا يضر فالأفواه المقفلة لا يدخلها التراب! (أنيس منصور) ولكننى إخترت التعامل مع التراب .. نورت بيتى الصغير ^_^

ربع نية

فى 2009 شهر أكتوبر قرينا خبر إن اليونيسف عينت الفنانة اسم النبى حارسها وصاينها نانسى عجرم سفيرة للنوايا الحسنة فى منطقه الشرق الأوسط وشمال أفريقيا ودة كان بمناسبة شعبيتها العالية وحبها للأطفال واهتمامها الفزيع بيهم على اساس انها أم شابة ودى طبعا حاجة تميزها عن كل بنات حوا ، اتعجبت جداً من القرار دة وقلت ربنا يعينها والله ، هى يعنى هتكون فاضية لإيه ولا لإيه .. حفلات وسهرات وسفريات ومع دة كلوا نوايا حسنة .. طب هتفضى تنزل الشوارع امتى تشوف سكانها من الأطفال ، وتتفرج على التسول والسرقة والإدمان والجوع والمرض والانتهاك الجنسى والامهات الصغار وغيرها وغيرها ، الحقيقة عزرتها مهى بردوا مش فاضية .. حاجة جميلة إننا نحب الأطفال ونشخبط لهم شخابيط .. أقصد نغنى لهم .. لكن مش كل من غنى يبقى سفير ، ولا كل من قال لطفل يا خراشى على الطعامة يا توتو يتكلم فى حقوق طفل ويحط خطط وهمية كعادة كل الخطط ،وجهه نظر البعض بتكون متلخصة فى نقطتين ..
* إما دول أطفال ولدوا فى الشارع فبالتالى دة بيتهم اللى ميعرفوش غيره وكبروا متسولين لإن دة الحل الوحيد علشان يعيشوا وبكدة يستحقوا المساعدة اللى بتتأخر لحد ما بيقوا هما امهات وأبهات لجيل تانى بمشاكل تانية .
*إما دول مش أطفال عاديين .. دول مجرمين وعالة على المجتمع ووجودهم غير حضارى بالمرة وبيشكل عبء كبير على اصحاب العربيات المتلمعة فى الشوارع لإن ذنبهم إنهم حرامية أحياناً " لسندويتش من محل ، لقزازة ساقع من كشك ، لهدمة نضيفة من على حبل " علشان يعيشوا مش أكتر .. ،مدمنين بردوا أحياناً " كووله مش غالية " بس أهو مزاج ورفاهية ومكافأة من الكبار للى يستاهل من الصغيرين ،متسولين دايماً " حاجة لله يا أبلة .. حاجة لله يا بيه " بيلزقوا زى الدبان وبحركة ايد ولا رجل بردوا بيمشوا من حوالينا .. أحياناً مبصدقش نظرتهم وبحس إن مش دول اللى يستاهلوا .. لكن ليه وصلنا لإننا نمتهن المسكنة علشان نكسب قرش !!
وفى النظرتين دول فيه فئة مظلومة وتستحق ، وفئة تانية مظلومة بردوا لكن قد ما إتظلمت قد ما جنت على نفسها واستسهلت مد الإيد وبنشوف إنها متستحقش ، ونهاية المطاف زى ما بسمعها دايماً .. السيئة بتعم ، وكلة بيتحط تحت بند "الله يحنن عليك " ..
مش محتاجين نتفرج عليهم علشان نعرفهم ، لإنهم حوالينا فى كل مكان .. زى ما يكون بيفكرونا ويقولوا إحنا هنا ناس شبهكم شوفونا بس وعالجونا .. احنا مرضى بمرض اتولدنا بيه .. محتاجين متابعه منكم يمكن نبقى أصحاء فى يوم زيكم ، بس الحقيقة مقدرش أنكر إن سفراء النوايا الحسنة على مر كام سنة عدت اتجعموا واللهم اجعلة خير عملوا" فيديو يناشد حقوق الطفل " وكان احتفالاً بمرور عشرين عام على اتفاقية حقوق الطفل ، حقيقى شافوا فيه كل اللى اتمنيت إنه يوصل لهم لكن يكفى انهم شافوه وعرضوه والناس صقفت للفكرة ورفعنا لها القبعات .
عايزة أوصل من كل دة لنقطة إن ليه مشكلة كبيرة زى دى بتهاجم بلدنا وعمالين نلف حواليها بمسلسلات واتفاقيات ونصوص دستور وفيديوهات وتعيين سفرا وكلام على ورق ، فين الحل الحقيقى والخطوة اللى ممكن يوم تتحسب لنا ؟! ، من وجهه نظرى إن وجود طفل شوارع بكل مشاكله أكبر بكتير من وجود عاطل ، ولا ليه أقول عاطل ؟ هوا مشاكل البطالة كانت إتحلت ؟! ، طب تسمحوا لى أقول أكبر من وجود حيوانات نادرة بنجرم صيدها ؟!! ولا حقوق حيوان لازم نحترمها ؟! ولا تجميل بيئة مفروض علينا ؟! .. آسفة جداً على التشبيه .. لكن أظن إنه مناسب ..
وآدى تشجيع أطفال مصر للشخبطة والشخابيط ورسومات الحيط ، فينك ياستى تيجى تشوفى ؟ ، يمكن نجاح غنوة وكتابة سطر منها على حيط مدرسة يخليكى تشوفى مصالح اللى كتب .. ودى هتبقى كلمة شكر مش على ورق .

هناك ٧ تعليقات:

  1. انا برضه عايزة اعرف هما بيختاروا بتوع النوايا الحسنة على أساس إيه

    ردحذف
  2. نفسي سؤالي يا موناليزا !!

    بيختاروهم علي اساس ايه ؟

    وتامر اللى اصبح سفير الطفولة دا :D

    يعني انا ممكن ف يوم ابقي سفيرة الحلبسة مثلا :D :D

    ردحذف
  3. يا موناليزا يا حبيبتى بيختاروهم بالنية .. طول ما نيتهم صافيه الحمد لله ربنا بيكرمهم آخر كرم ..

    وربنا يدى كل واحد على قد نيتة *_^

    وبعدين يا ريمو دة تمورة دة سفير الطفولة والشباب والكهول والامومة والشيوخ والبطاطس المحمرة :)

    لو حد عرف للسؤال دة إجابة لا قدر الله .. ييجى يقول لنا

    ردحذف
  4. انما الاعمال بالنيات...^_^
    يا زهرة ازاى تتكلمى عن طنط نانسى اللى هتنقز الاطفال كده...تؤتؤتؤتؤتؤ مينفعش
    هههههههههه
    هم يضحك وهم يبكى
    وادينا صابرين لغاية ما نشوف تنت نانسى هتعمل ايه
    مش كفاية اعلان الزبادى اللى عملاه
    ههههههههههههههه
    بس صراحة اطفال الشوارع بقوا جزء لا يتجزأ من الشارع
    ماشاء الله
    دحنا حتى لما بنشري حاجة ناكلها ولا لما نشربها بنعمل حسابنا انها مش هتعمر معانا ..^_^
    لانها ولله الحمد زى ما قولتلى بتتنتش مننا
    بس اوقات بنلاقيهم جايبين من عند كنتااااااكى !!!!!!!!!!!!!!!!!!!!!
    وفيه ناس بتبقى مشغلاهم كمهنة يعنى !!!
    ....
    بوست جميييييييل جدا يا زهرة
    دمتى متألقة
    وعلى فكرة اول مرة اخد بالى ان عندك كزا اغنية ورا بعض
    بس حاجة جامدة ...جووووو اووووون..^_^

    ردحذف
  5. انتى أجمل يا سارة ..
    مهو انتى لو بتقعدى عندى شوية ومبتطلعيش تجرى على طول كنتى أخدتى بالك من زمان *_^

    نورتينى :)

    ردحذف
  6. العزيزه زهره
    تحياتى
    اهلا بيكى فى فشكول ونورتيى وشرفتينى وان شاء الله يدوم التواصل عبر لمدون وخصوصا انى راجع للتدوين فى رمصان
    يا ترى يا زهره ما عندكيش وسطه عشان يعينونى انا كمان سفير للنوايا الحسنه . . يا ترى كام دولار فى الشهر وانا اسوى الهوايل احسن من كل السفراء بتوع الغناءولرقص دول

    ردحذف
  7. عمنا فشكول

    حضرتك اللى هتمتعنا بتدويناتك .. وربنا يكرمك

    بالنسبة بقى للوسطة .. يا ريت عندى والله مكنش يتعز .. وأهو أحسن من مفيش .. وأنا والله بتفرج بانتظام على سبيس تون .. ومتابعة توم اند جيرى :)

    خليها على الله

    نورتنى جدااااا

    ردحذف

قول حاجة يلا