شوف اللى بيحصل!!

كلمة منى

السكوت لا يضر فالأفواه المقفلة لا يدخلها التراب! (أنيس منصور) ولكننى إخترت التعامل مع التراب .. نورت بيتى الصغير ^_^

(إطلع براااا )

بيت الست هو مملكتها اللى من أول يوم بتحبها وبتتعلق بكل جزء فيها .. وخاصة المطبخ ، مين فينا مبتقضيش فى المطبخ وقت كبير من يومها ؟! ..
بعد المطبخ على طول بتيجى المراية .. أقصد يعنى الأوضة " أم مراية كبيرة " .. سواء أوضة النوم الأساسية أو أوضة الأطفال .. وممكن يكون كل جزء فى البيت فيه مراية .. مين فينا مبتقضيش وقت كبير بردوا من يومها قدام المراية ؟! ..
إنهاردة أنا هتكلم عن المطبخ ومشتقاته اللى برا المطبخ من مقشة قديماً " مكنسة حديثاً " ، زعافة ،منفضة ،مساحة ومريلة مطبخ أحياناً ..
على مر الأجيال وفى كل جوازة ولكل عروسة بنقابل سؤال بيقول .. وإنتى بقى على كدة بتعرفى تطبخى ؟؟ ، وكإنه الطبخ هو الشرط الأول وكإننا بنعيش علشان نطبخ وناكل وبس !!
وكان زمان العروسة بتتجوز بكراسة كاتباها لها جارتهم فلانة ولا خالتها أم فاروق ولا حتى مامتها مليانة بالوصفات والمساعدات المطبخية العبقرية كلها ، وبعد كدة شوفنا كتاب أبلة نظيرة اللى عدى على الكل بملوخياته بسلطاتة بباباغنوجة ، ومع ركب التطور بقينا ندخل موقع " هتطبخى إيه إنهاردة يا بهانة؟! " ونشوف الوصفة اللى تعجبنا ..
ومن مطبخى هذا .. كح كح أقصد يعنى من موقعى هذا ومن رأيى إن الستات بالنوسبة للمطبخ 3 أنواع ملهمش رابع ..

أولهم : : :

ست بيت جداً ، بتطبخ كل حاجة وأى حاجة ونفسها فى الأكل يجيب آخر الشارع .. بتهتم أوى بالسمن البلدى والحبهان وتحمير الفراخ ، بتحط شوية سكر على البسلة علشان تتظبط .. وهى دى أسرار المهنة ..و لما حماتها شافت كدة مصمصت شفايفها وقالت : هىء هىء جدعة يا حبيبتشى .. بس التسبيكة مش مظبوطة بردوا " قمة الرخامة "..
نضيفة أوى فى بيتها .. عدوة التراب والكركبة .. حمبلية .. بتكنس فى المكنوس .. بترتب شراشيب السجادة بالواحدة .. نقطة الميه تحت الحوض بتعصبها .. شقتها زى المراية وتقريباً بتكره اللى تزورها وتجيب معاها عيال .. وبيبقى نفسها ترميهم من البلكون " بكل بساطة " .. ولو يعنى لاقدر الله عجبت جوزها حماتها تقول " أمممممم .. ربى يا خايبة للغايبة .. آه مهو الراجل إبن مراته " ..

تانيهم : : :

ست على إيدها نقش الحنة ، مبتعرفش تطبخ لا كتير ولا قليل بس بتجرب ، من أنصار زيت الدرة والملح الخشن والفراخ المسلوقة :( ،
بتخيط الممبار والحمام المحشى بالإبرة والفتلة .. علشان الرز مينترش ، وهى دى طرائف المهنة .. ولما حماتها شافت كدة كانت هناك نفس المصمصة فى الشفايف وقالت : بلا خيبة على بنات الايام دى .. أومال اتعلمتى إيه فى بيتكوا ده الواد بيجينى هبيان ياكل عندى "نظرة خبيثة "
بيتها يضرب يقلب .. عدوة القطنة ؛ لإن القطنة مبتكدبش .. أطباق مطبخها كلها فى الحوض دائماً وأبداً .. دولابها مكركب .. وما خفى كان أعظم ..ودة على أساس انها مرفهه ومبتتهانش فى شغل البيت ..
ولو يعنى إن شاء الله أشتكى منها جوزها حماتها تقول " اكفى القدرة على فمها تطلع البت لامها .. واللى متعرفش ترقص يا اخويا تقول الارض عوجا "

تالتهم : : :

ست عادية وعلى حسب ، بتطبخ على قدها وزى ما تيجى ، ملعقة السمن بتساعد جنب الزيت والحبهان يحب الملح والفرخ فى الفرن أحسن ، كل يوم زى اللى فات مبتغرقش ..
ولما حماتها  شافت كدة " بدون مصمصة " قالت : ايه .. هو اللى تباتوا فيه تصبحوا فيه ؟! بكره يولف على غيرك " نظرة انتصار "
ولو يعنى جوزها زهق وفكر يشتكى حماتها تقول " أجوزك ست ستها .. واللى خدته القرعا دى - مراته -  تاخده يا حبيبى أم الشعور "

وزى ما الستات الغلابه المغلوب على أمرهن 3 أنواع .. فالرجالة بردوا 3 أنواع من وجهه نظرى النسائية البحتة *_*

أولهم : : :

الراجل الشيف .. بيعرف يطبخ إما بسبب ظروف شغله اللى مخلياه دايماً لوحدة .. أو دخل الجيش وبقى بيتصرف ..
بيحب البيت يكون هادى ورايق  .. وبيشجع الأكلة الحلوة ، ودايماً يدى أوامر بالنسبة للطبخ أو ترتيب البيت ، بيبدى مساعدة - بالغصب - جوا المطبخ  وبيكون رد فعل الست  "إطلع براااا " .

تانيهم : : :

الراجل اللى يادوب يسلق بيض .. يعمل شاى ، غير منظم بالمرة .. بيقلع جزمتة فى آخر أوضة فى البيت ، هدومة مفرقة فى كل أنحاء الشقة .. ودة نوع بيغيظ جداً .. وبيحب الميكب وعايز مادونا طول الوقت جوا البيت ، وبردوا بيتدخل فى شغل المطبخ بكل غلاسة وكإنه أبو العريف ومبتكونش ليه فايدة غير انه بيلخم ، وبيكون رد فعل الست " إطلع براااا ".

تالتهم : : :

الراجل المسالم اللى ملوش لا فى مطبخ ولا فى ترتيب بيت .. عملنا أكل بياكل معلمناش مش مهم  " مالها المطاعم " ، رتبا البيت وولعنا شموع وجو رومانسى يبقى كويس معملناش دة  " آدينى بتفرج على روتانا وخلاص " .. مبيبديش أى أعجاب ومبينبهرش ودة من غير سبب بقوله كدة من عندى " إطلع براااا " .

أرجع وأقول " ابنك على ما تربيه وجوزك على ما تعوديه " آى والله صح .. فى الأول دايماً كل حاجة بتكون صعبة وبيكون الطرفين متطبعوش بطباع بعض .. إنما بمرور الوقت المشاكل والإختلافات بتقل .. بس نحاول ، وناخد كل حاجة بروح حلوة ونخلى زعلنا جوا بيوتنا منعاً للتدخلات الحربية والأمثال ذات الدم الخفيف .. وسيظل أصحاب العقول فى نعيم :)

هناك ٤ تعليقات:

  1. حلوه أوي و عجبني ردة فعل الحماه اللي عادة مبيعجبهاش حاجه اسلوبك دمه خفيف و كلامك واقعي جداً بس أحب أضيف نوع من الرجاله اللي مبيعرفش يطبخ و بردو بيتدخل في المطبخ و مبيشلش الكوبايه من مكانها و بردو بيشتكي من قلة النظام و ده بردو أحب أقوله اطلع براااا
    تحياتي ليكي

    ردحذف
  2. زهرة

    اسلوبك فى السرد رائع غاليتى

    قصه جميله

    يسلم احساسك وقلمك


    كل عام وانت طيبه

    عيد اضحى مبارك

    ويارب العام القادم نزور النبى الغالى

    عيد سعيد

    تحياتى

    ردحذف
  3. جايدا

    ربنا يكرمك يا ست الكل

    وكل سنةو انتى طيبة وكل عيلتك بخير يا حبيبتى

    وربنا يسمع منك يارب :)

    نورتينى كالعادة :)

    ردحذف
  4. مدونتك رائعة
    يسرني ابداء رأيك في مدونتي
    http://helmalomomah.blogspot.com/

    ردحذف

قول حاجة يلا