إقرأ الخبر على الفيس بوك

صفحتنا على الفيس بوك .. شباب إعلام ..الإعلام بتاع بكرة وعلشان كدة لازم نهتم بإنهاردة

عندنا هتلاقى أخبار كل يوم ..ويوم بيوم ..من غير ما تدور ..هتتابع الدنيا ..وعندنا بس هتقرأ الخبر ^_^.

بس دوس هنا

هتلاقينا مستنينك

دايماً معانا..

جبت الصورة اللى كانا فيها زمان أنا وماما وإخواتى ، وكنا صغيرين ، وكانت ماما حاضنانا وبنضحك ،أنا بحب الصورة دى أوى أوى مسكتها وفضلت أكلم ماما وحكيت لها كل الحكاوى ورغيت معاها كتير وقلت لها :

كل سنة وإنتى معايا يا حبيبتى كل سنة وإنتى جنبى فى فرحتى بضحكتك اللى هى هى ضحكتى وحسه بيا وكل سنة وانتى جنبى لما أحس بحزن ولا حد يزعلنى على طول تيجى وتقولى لى متزعليش وتمسحى دمعتى ، كل سنة وانا حته منك وانا نسخة منك وانا كلى زيك كل سنة يا ماما وانا لسة بحبك.

يا ماما أنا كويسة أوى الحمد لله ،مبسوطة بجد لأنك مبتغيبيش عليا ودايماً تيجى فى معادك ، وعارفة يا ماما.. إنهاردة مبكتش زى السنين اللى عدت زى ما وعدتك أنا دعيت لك وبعت لك هديهتك لحد عندك أكيد أكيد وصلت لك ..

دراستى كويسة وحياتى الحمد لله كويسة برضاكِ عنى وكمان إخواتى كويسين أوى وبيزاكروا ولسه زى ما انتى عايزة ..طيبين ، بس إنتى إبقى زوريهم بيقولوا إنك وحشتيهم .

وياماما الهدية اللى ربنا اداها لنا بعد منك مفرحانا ، مخليا حياتنا بجد سعيدة ، أنا بحبها أوى ..تعرفى إنها شبهك فى حاجت كتير ..أيوة شبه حنيتك وطيبتك وكلامك .

وزى ما قلتى لى وفهمتينى ..أنا فعلاً مليش غيرها فى الدنيا هى أمى وأختى وصحبتى وكل حاجة حلوة ، وكفايه يا ست الكل إنها بتتحمل عصبيتى وشقاوة الولاد منتى عارفه ..

ولما تعبت يا ماما الفترة اللى فاتت ..إنتى جتينى و زورتينى ..فاكرة؟؟ ، كانت هى جنبى كل يوم طول النهار وسهرانة معايا طول الليل وخايفه عليا من قلبها والله ياما كانت بتعيط لتعبى ..زيك زمان ، واياميها عرفت قد إيه أنا بردوا بحبها .

وبنقعد نرغى ونتكلم وأحكى لها وتحكى لى زى ما كنا يا ماما بنعمل ..ودايماً هى اللى تفكرنا وتقول ماما وست الكل الله يرحمها ، شفتِ قد إيه يا أمى ربنا كرمنا !!

أنا بس قلت أطمنك عليا وكمان عايزة أتطمن عليكى ..يارب تبقى فرحانة ومبسوطة وفى مكان أحلى بكتير من اللى إحنا فيه ، ودة يا ماما يكون ثوابك من ربنا على صبرك وإيمانك بإنه رحيم وهيعوضك خير ..

إتطمنى علينا أوى أوى لإننا بجد مرتاحين ومعانا حنانك لسه والأمان اللى كنتى بتحسسينا بيه ، ربنا هدانا بأحلى هديه ،وأحلى أم فى الدنيا والله بدعى ربنا يخليها لينا ..لإنها كل فرحتنا .

وبابا يا ماما لسة حنين زى زمان وفاكرك دايماً ،وإمبارح كان عيد ميلاده ..أكيد إنتى عارفة ، عملنا له تورتة وحطينا شمعة وكان يوم جميل وغنينا له ،وكمان غنينا لماما وبعد دة كله قمت دعيت لك ..

وإنهاردة حبيت أكتب لك يا أعظم إنسانة أقولك ياماما إنتى والله دايماً معانا ..

وحشتينى أوى

أستعيد الوعى

ينتابنى شعور باللاوجود..إحساس أشعر به عندما لا أستطيع الإمساك بالقلم أو حتى الجلوس أمام جهاز الحاسوب وسماع صوت مفاتيح الكتابة ، العديد من الأفكار هنا بالفعل وظلت تتراكم الواحدة فوق الأخرى حتى أصبحت وكأننى أحمل كلمات متشابكة مع بعضها لاأستطيع فصلها ووضع كل منها فى موضعه الصحيح .

هذا الشعور يدغدغنى داخلياً وأشعر كأنما نسيت الكلام أو حتى أجهل الكتابة وأتسائل لماذا وأنا أحمل الكثير، و إلى متى سأظل خارج نطاق نفسى ؟!!

وكيف يمكننى أن أستفيق ؟! ، ولكن بعد كل الشرود لا أقول سوى

" أن هذه فترة إستعادة الوعى"

يوم الأرف تاين

إمبارح كان يوم فزيع جداً خالص، إمبارح يا إخوانا كان يوم( الفلانتين) العزيم واللى بحب أقول عليه من وجهه نظرى كواحده مش إتيكيت يوم (الأرف تاين)، الواحد جاله ضغط والمرارة بدأت تشاور نفسها والمرحله الجايه ربنا يستر علينا من اللى بقينا بنشوفه فى شوارعنا وأى

مكان بنروحه ،وبحمد ربنا إنه عيد المايصين دة جه فى الأجازة لإنه جامعتنا الحبيبه بتبقى تحفه فى اليوم دة دايماً.

بتبقى حاجه تفتح النفس لإنك تنحرف أقصد يعنى تدور على حد يديلك حاجة أحمرة ولا يفتكرك حتى بماسيج كميله ولا أى حاجة وخلاص ،ومن أول اليوم دة ببدأ آخد بالى من كل اللى بيحصل حواليا جداً أصلى من النوع اللى مبيحبش يريح نفسه ويخليه فى حاله ،بحب أوى أنا وصحبتى نختار مكان جنب أتنين لونهم أحمر وجنبهم هدايا ونروح قاعدين، ونشوف بقى إيه المختلف اللى بيحصل عن أى يوم عادى .

وفعلاً والله يا إخوانا والحق يتقال يعنى بييكون يوم مفتوح خالص لأى حاجة بجحه وتافهه ،وتلاقى الجامعه متقسمه إتنين إتنين والإتنين ماسكين هدايا ويروحوا ماشين شويه وبعدين يقعدوا (معلش أنا بحب التفصيل) وبعدين بقى أول حاجة تحصل يبصوا بصه غريبه الشكل لأى واحدة قاعدة مع صحبتها وكأنهم بيقولوا ياختى متقومى من هنا مش لاقيه غير الحته دى ؟؟!!

وأنا طبعا بكل رخامه مبقومش لأنى أصلاً هنا مخصوص علشان أحرق دمهم ،وآدينى بشوف وبتفرج على الإحتفال، ويروح البيه الكوتوموتو أبو بنطلون واقع وشعر واقف متر فوقيه وسلسه فى رقبته وحاجات غريبه فى ايده وأكيد بعد دة كله نتوقع إنه أقل واجب يبقى إسمه ميمو قايل :هابى فلانتين داى يا بيبى .

وتبص بقى للبيبى وهى بترد ياااااااااااه بت ماشاء الله نفسى أعرف الست الوالدة كانت فين وبنتها نازله من باب الشقه ؟!! ، بلاش إنفعل ويلا هعد من واحد لعشرة أممممممممم ، تروح بقى هى :هابى فلانتين تو يو يا ميمو.

وميمو يقوم قايل :انا جبت لك هديه على قدى يا توتى بس يارب تعجبك (ويقول فى سره فين هديتى أنا يا حجه)...

تروح توتى مكسوفه قال يعنى وش كسوف: الله يا بيبى دى جامدة موت طحن..وتقوم مديه ميمو هديته .

يقول ميمو: هديتك هايله يا توتى ..بكد بكد ميرسى بكم ، وأكون أنا خلاص فاضل لى دقايق وأقوم أدور على أى طوبه وأبطح بيها ميمو وتوتى..

وطبعاً عيد الحب دة فسحه ،يعنى أى حاجة تتعمل فيه متاحه ومباحه ومفيهاش أى بجاحه ،يعنى بردوا تشوف حاجات ما يعلم بيها إلا ربنا وماشيين مشبكين إيديهم وعااااادى والدنيا جميله والجو ربيع وما خفى كان أعظم والله.

أنا على فكرة مش ضد إنه يكون فيه يوم جميل نجدد فيه حبنا لبعض، بس يوم مش عيد ، ويوم كل واحد غير التانى يعنى مش يوم موحد بتاريخ مقدس ،وبعدين يا جماعه يا مسلمين دة عيد إسمه الأساسى(عيد القديس فلانتين) بالله عليكوا يرضى ربنا نعمله عيد لينا ونحتفل بيه وكأنه من أعيادنا؟!!

وبعدين سبحان الله دايماً تلاقيه بين الشباب والبنات اللى هما صحاب وخلوا بالكم من صحاب دى يعنى لا هو فارق معاها ولا هى فارقه معاه ، يعنى مفيهاش حاجة لما الكوتوموتو يروح يدفع كام جنيه علشان يجيب للكتكوته حاجة علشان تفضل مصاحباه ودى والله جمله سمعتها من ولاد قالوا إحنا بنعمل كدة علشان كذا وكذا .

يعنى فين عيد الحب دة بين اى إتنين متجوزين؟!! لاعمرى شفت واحد داخل بيته وجايب لمراته بوكيه ورد أحمر ولا دبدوب ولا حتى شبشب بفينكه .

أنا بقول كويس أوى إننا نحب بعض ونحب نفسنا ونحب أهلنا بس حب يرضى الله وحب فى الله والحب اللى كدة هو اللى بيدوم وبيبقى وبيكبر وربنا بيبارك فيه ،نتقى الله يا شباب ويا بنات وكل واحد يعرف إن ليه أخت وليه أم وفى من الأيام هيبقى ليه بنت يعنى يفكر أوى فى بنات الناس وبلاش يظلمهم.

وكل بنت تعرف إن هى عين أهلها وكل ما ليهم وإن ثقه أهلها فيها مش ببلاش ،وكفايه أوى نظرة حب من عينيهم وهما عارفين قد إيه بنتهم دى كبيرة أوى فى نظرهم وفى نظر كل الدنيا .

أتمنى بجد إننا نعبر عن حبنا لبعض بطريقه غير (الأرف تاين ).

زعلايه :(

بجد أنا اسفه

أيوه غلطت

لأنى عملت غير ما إتعودت

بس قصدت..

إنى أوفر حاجه يعنى

ودة والله اللى منعنى

وقمت خرجت

وعدى الوقت

إتنرفزت

رجعت بسرعه

ولقيت حاجة غيرها تعصب بردوا يا ناس

قلت الله دى خناقه هتحصل أيوة خلاص

وحصل كل اللى إتوقعت

وزى ما قالوا قمت حذفت

اللى مخلى الدنيا تكشر طول الوقت

ورقنا شويه .. بس العيب جاى مالعصبيه

وكانت عين صحبتنا الحلوة

المتخانقه والغضبانه

اللى قالت لى :

ياختى برودك بيعصبنى

أيوة مهو إنتى مش غرمانه

قلت فى سرى الله أكبر

دة العقل يا ستى يادوب مش أكتر

بس قبل ما أنام كالعادة

بضحك بردوا

بعد ما كل الدنيا تروق

ولانامشى أبدا زعلانه

غنوة صغنونه

حاجه تنتوفه

وأدعى يارب طمن قلبى

وأفضل على طول فرحانه :)

سنوات الإمتحانات:)

فعلا بتعدى سنين بالنسبه لى تقولشى أنا بزاكر طول السنه يعنى ،أول ما بحس بقرب أستغفر الله العظيم الإمتحانات ببدأ رحله العذاب مع اللهم إحفظنا الكتب،اللى بتكون كالعادة طبعا ملهاش علاقه باللى إنت هتشتغله بعد كدة.

أيام الثانويه العاميه كنت دحاحه والله بس الحمد لله جيت أيام الامتحانات وتعبت،أصل عندنا حاجة حلوة أوى فى عائلات معظمنا وجيران معظمنا وأصحاب معظمنا إنهم ينجحونا ويدخلونا الكليه ويخرجونا ويشغلونا واحنا لسه فى ثانوى وطبعا دة من كلمه (الدكتورة عِلانه إن شاء الله )و(المنهدسه فُلانه بإذن الله)وغير كدة طبعا من المهن اللى كلها كليات من بتوع 99% وكأن الشعب كله عبقرى.

بالنسبه لقرايبك مثلاً جه ضيف يزوركم فى البيت وإنت مخرجتش تسلم عليه بعد ما جه بدقيقه وحتى من قبل ما حد من أهل البيت يدى مبرر لعدم خروجك بيكون رد فعله كالآتى:لالالا سيبوة يزاكر ربنا يعينه دلوقت يا حبه عينى شقيان من المزاكرة ..!!بلاش دى ..

راحوا مامتك وباباك أو حتى حد من إخواتك يزوروا حد بردوا من قرايبكم (تقريبا نفس الحد الأولانى) وانت مرحتش معاهم وقبل حتى ما يسألوا عنك بتقول أول كلمه كالآتى:أكيد عندة درس ومش فاضى وبعد كدة عندة مزاكرة يلا معلش مش عايزين نعطله..

نيجى بقى للجيران الرخمين (ومش كلهم طبعاً)،تكون مثلا من النوع اللى بينام بعد دروسه وبيصحى على بالليل ويطبق يزاكر يعنى حضرتك تقعد فى أوضتك فاتح النور وبتزاكر عادى وطبيعى تلاقى تانى يوم جارك أو جارتك الغتيته تقولك ايه بقى :إزيك يا حبيبتى عاش مين شافك ؟؟ لا بتطلعى فى بلكونه ولا شباك ..ربنا ينجحك دنا كل يوم بالليل أطلع أشوف نور أوضتك منور لحد الصبح وأقول زمانها بتزاكر ربنا معاكى دنتى مبتناميش يا بنتى !!

ودة طبعاً على أساس إنك مفروض تزاكر تحت السرير على شمعه علشان محدش يشوف النور بتاع الاوضه ،وعلى أساس بردوا إنها واقفه فى البلكونه من بالليل لحد الصبح بتتفرج على نور الاوضه تشوفه هيتقفل الساعه كام وتبقى تقولك .

ولا الزمايل فى الدرس ياااااااه حاجة فعلا غريبه جدا يعنى مثلاً عندك إمتحان فى الدرس وزاكرت ورحت وإمتحنت وحليت وللأسف جبت درجه عاليه بيكون رد الفعل كدة:إنتى ايه يابنتى مزاكرة من ورانا ولا ايه ؟؟ منتى شاطرة آخرة حاجه ودحاحه كمان .!!

على أساس إنك لما تيجى تزاكر لابد وحتماً ولازم تكلم كل صحابك تقولهم أنا داخل أزاكر حد عايز منى حاجة ؟؟!

فعلاً بقى الحل إنك لا تجاوب سؤال ولا تحضر إمتحان من أساسه ..وكمان تزاكر فى أوضه تكون مش على الشارع يعنى من غير شبابيك ولا بلكونات وكمان لما حد ييجى يزوركم تخرج جرى تقابله من عند البوابه تحت وتفضل قاعد على رجله لحد ما يمشى علشان تثبت له إنك بتضيع وقت وفاشل وتخرج كل يوم عند حد من قرايبك رايح جاى ودة دليل على إنك فاضى.

دى نصايح النجاح يعنى بما إنى الحمد لله اخدت على دماغى ايام ثانوى وكرهت المزاكرة والكتب وتعبت أيام الامتحانات وكنت بزاكر فى السرير وطبعا كان مجموع غير المتوقع وإترتب عليه خطه غير متوقعه لخبطت لى الدنيا خالص .

وكان كل ما حد يشوفنى يقول يا عينى يلا معلش نصيب ،وزى ما يكون خلاص هموت ومينفعش مطلعش دكتورة ولا مهندسه ولا وزيرة ولا سفيرة وإن دة أقل واجب يعنى .

آه زعلت جداً على نفسى وعلى مجهودى وعلى حلمى اللى حلمته كتير إنى ادخل كليه معينه وضاعت منى ،وفى أول ايام الجامعه كان صعب إنى اروح كليه غير اللى ياما رسمتها فى دماغى وبردوا بسبب تعب نفسيتى عييت فترة كبيرة وفين وفين لما قدرت أنزل كليتى.

وإكتشفت بعد فترة إنى فعلاً سعيدة بدراستى أوى وإنه دة طموحى ودى نفسى اللى أقدر احققها وتكون صح فى المكان دة وعرفت إنه ساعات كتير الأحلام بتبقى مش صح ومش مناسبه لينا بس ربنا بقى بيختار الخير.

وعدت أول سنه وكنت متعودة بقى إنى مادام فى دراسه يبقى بزاكر ومن أول يوم وفعلاً تقديراتى كانت عاليه فى الترمين ولقيت نفسى جداً فى دراسه الإعلام لإنها شيقه وممتعه لحد بجد عايز يوصل رساله وخاصه لو عندة أسلوب بيميزة.

وجت السنه دى والحقيقه من أولها رخمه بكل موادها ،والإمتحانات كانت عبارة عن عقاب مش شويه أسئله بنجاوبها ،مخرجتش من ولا إمتحان مبسوطه غير مادة التخصص اللى المفروض اجيب فيها تقدير عالى وهى (الصحافه)،خرجت منها وحسه إنى لو مجبتش (إمتياز جداً)أبقى اتظلمت...

وجيت بعد ما إمتحنت مادتين جالى برد جامد متبوع بقى بإنخفاض حاد فى الضغط وكان السبب فى إن مادة تتأجل خلال الإمتحانات والحمد لله على كل شىء.

بدعى ربنا بس إن السنه تعدى على خير وكفايه مادة وباقى المواد تعدى حتى لو بتقدير( مبلول) ، ويارب إكرمنى وأدخل الشعبه اللى بتمناها ..

ويارب أنجح ^_^.

شعب محترم

مبروك لينا ، ومبروك علينا ،مفرحتش بإننا كسبنا كورة قد ما فرحت بإننا كسبنا فرحه وردينا كرامه وأثبتنا مش بس لينا وليهم إننا شعب يستاهل لأ ..دة اثبتنا للدنيا كلها إننا مصر أم الدنيا ، لعبنا بإحترام (ولو إنى مبفهمش حاجة فى الكورة أصلا) وبروح رياضيه جميله وأعصاب هاديه .

مش هقول كتير..لأن كل اللى هقوله كل الناس حساه وفهماة زيى بالظبط ، بس بدعى ربنا تكمل فرحتنا وربنا يكرمنا بكرة .

بجد شكل العلم حلو أوى فى ايد كل الناس ، وإحساس الإنتماء حلو حتى لو بسبب الكورة ، أنا عن نفسى بحب البلد دى أوى وبعشق إسم مصر لإن مصر تستاهل حبنا كلنا .

السنه دى هكون أنا

يوم غريب

يوم عجيب

والشمسة ساطعة

والفرحة طالعة

من عيون المبسوطين

ومهنيين

قال اية دا عيد !!

وعيد سعيد
كبرت شوية بنت بضفاير

ايام وعدت يوم وعشرة

ولا مية ....

وكأنة فى عينية

عمرى فى يومين

مش مهم عشت لية وازاى وفين

المهم العمر عدى ولسة قلبى

مهوش حزين.......

المهم لقيت لى يومها حد قالى

عام سعيد

كلمة حلوة وحبة حنان بيهم بجد

بحس عيد

مش اى عيد

السنة دى دة عيد سعيد

كل عام زى التاريخ دة وصبح انهاردة تفوت سنة

كنت بحزن آة وبفرح فرحة لكن ..............متأنئنة

من كام سنة ...

بنوتة حلوةفستانها نونو........يا دوب كدة

عايزة تورتة وعيد ميلاد

وعروسة لعبة وبدلالها متأكدة

انة بابا مش هيرفض

طلب الاميرة أم الضفيرة

وكلة جاهز للميلاد

دقت ساعات......

والشمع لسة منطفاش

سرحِت شوية ...

هى شمعة واحدة بردوا!!

هى نفخة واحدة تكفى لوداع سنة!!!!

شمعة واحدة لوداع سنة؟؟

آآآة من الوداع ودموع بلاش

العمر لسة منتهاااش

وفاتت سنة...........

والصبح شقشق

عصفور مبحلق

للحلوة صاحية

من غير ضفاير

وشريطة حمرة مش لاقيها

فستانها ايوة السنة دى مجاش عليها

وتانى زى السنة اللى عدت

تورتاية بردوا بشمعة واحدة

وهدية لكن مش عروسة

العروسة دى كان زمااااان

انهاردة جالها بوسة

على الخد دة والخد دة

من ماما قالت كبرنا حبة

ودعواية منها .............

دا كل ما اكبر بزيد محبة

وهدية بردوا من بابا جتلى

دة كان حجاب على قد سنى

لونة احمر......... زى الشريطة

وكانت هدية ليها زكرى

فى دولاب هدومى لحد انهاردة

وما بين جديدى كانت يا بابا ...

احلى طرحة

وفاتت سنة ............

لا مش سنة

فاتت سنين

لا طفينا شمعة

ولا دوقنا فرحة

عدت ليالى.. ايام علينا

كبرنا فيها.... شفنا فيها

ازاى بنكبر ندفع تمن

سنين تروح وسنين تعدى

يدور الزمن

وصباح يشقشق

عصفورنا فينة؟؟؟

قادر يطير لحد بيتنا ؟؟

ولا الزمن كسّر جناحة

كان يوم مبحلق عند شباكى هنا

كان من سنة!!؟؟

لا من سنين ....

دا الكلب حارس بوابتنا

الزمن سكت نباحة.....

يبقى عصفرى الجميل

مش هيتكسر جناحة؟؟؟

المهم............

اليوم دة عيد

يبقى لازم اشوف مرايتى

لجل ما تقولى الحكاية....

هو الزمن كبّر جروحنا

ولا زاد شوية طولنا؟؟؟

عن طول اميرة الرواية

قالت المراية

السنين عدت علينا

كبّرت احلامنا فينا

مبقاش عروسة تشد جوفنا من الناحيتين

لجل ما الضحكة تجلجل قاتلة للكبت الحزين

بقى حلم لينا..... الشمعة تبقى شمعتين

ويوم ميلادى

السنة دى..

شمعة واحدة مش كفاية

السنة دى ..

كانوا شمعتين

واحدة نسيتنا اللى فات

والتانية جاية بالامل

الفرح جاى ....مش محتمل

خلص السكات هربت دموع مات الملل

ويوم ميلادى

السنة دى..

لقيتنى شابة عليا واجب

اكون أناااا

لقيتنى لازم اهدى وردة

من فازة حلوة

فى جنينة شاردة

الوردة دية هى أنا

لما بنفسى اكون أنا

لما ألاقى حد جنبى

حد بيفرح لى قلبى

مش كتير اديلوا عمرى

لو عشانى هيبقى دايماً

زى ما بينده لة ربى ...

وفى ساعتها هلاقى دربى

ومن هنا بكل الهنا ......قلت

السنة دى هكون أنا ........

شيكا بيكا..بعشقها

بقينا فى 2010

عدى أسبوع بالظبط من سنه 2010 وبقينا فى سنه جديدة لسه فى كيسها ، وكأن أول يوم من 2009 كان إمبارح (الأيام مبقاش فيها فركه)..وأنا عن نفسى جيت كدة من كام يوم قلت يااااه كل دة عدى وفات ؟؟ طيب يا ترى إنهاردة أحسن ولا إمبارح ؟! كنت الحقيقه كل سنه بقول يلا مش مهم إمتى أحسن؟؟ أدينا عايشين وخلاص ،بس السنه دى حسيت إنها مختلفه بكل المقاييس ،تفكير إختلف واسلوب إختلف وحاجات كتير جداً ، وأعترفت إنها أحسن وأنجح سنه فى حياتى من ناحيه كل حاجة ، حسيت فيها بنجاح كبير ومريح ومُرضى ، وكنت لأول مرة بلاقى نفسى بجد ، يعنى بعرف إمتى أكون مبسوطه و إمتى لاء ؟ ، وعرفت أنا عايزة إيه ؟ ، ودة كان الأول صعب إنى أعرفه وعلشان كدة كنت بشوف إنى مستحيل أتقدم لأنى مش عارفه هروح فين ؟!

ما علينا من اللى فات وعدى ، بدعى ربنا إنه السنه دى تبقى أحسن من اللى فاتت ، وتبقى أنجح ، وكلمه إتعلمتها السنه اللى فاتت وخلتنى أشوف اللى جاى بنظرة تانيه وهى ( بكرة هيبقى أحسن إن شاء الله ) .

ومبطلش رخامه بردوا ، وأفضل أقلق وأرجع أتطمن بكلمه حلوة ، وننجح دايماً فى كل حاجة ...يارب .

وبقول أنه أحسن حاجة حصلت لى فى 2009 إنى شفت الدنيا أحلى وحبيت نفسى أكتر وسامحت كل الناس مهما كانوا وعرفت حاجة وتأكدت منها (الحلم ممكن أوى يبقى حقيقه ..مادام هنعيش علشان نحققه ..ونعامل ربنا دايماً ..ربنا كريم ومش هيخذلنا..لأن بجد نفسك تستاهل ..ولسه فيه ناس تستاهل كل حاجة حلوة ).

تفتكروا أنتوا بقى اللى فات من حياتكم أحسن ولا دلوقت؟؟

وإيه أحسن حاجة حصلت لك فى 2009 ؟

ولا أقولكوا ، إيه أحسن حاجة حصلت فى عمركوا ؟

وهتعملوا إيه علشان بكرة يبقى أحسن ؟

كل دى أسئله هنرتاح لو جاوبنا عليها وهتكون بدايه لنجاح أكيد لما تعرف نفسك صح ^_^.

طريقنا إلى أين؟!

يرحمكم الله يا أبو سريع:)

وآدى البدايه..عطسه صغننه وسقعه تحس انها ماشيه جواااك (أستر يارب) ، عيانه جداً جداً والبرد مخلص عليا ، بس كل ما بكلم حد يقولى عندى برد عندى برد مش عارفه إيه الحكايه دى؟!!

درجه حرارتى أرتفعت شويه بس الحمد لله دلوقت أحسن بس خلوا بالكوا (الحرارة نزلت ) يعنى بريئه ، وكنت دايخه شويه بس خلوا بالكوا (الدوخه مشيت) يعنى بريئه ،ولسه باقى شويه عطس وكح كح (إبعدوا شويه لتتعدوا) ..مع علب مناديل داخله خارجه تقولشى باكلها؟!!

وبكره النوم طول اليوم بقى فى السرير (قال سرير قال) لا طبعاً ،قمت ونشرت الغسيل مع انى كنت واقفه بالعافيه ،بس النشاط بيجيب نشاط

والنوم والكسل بيزود التعب اكتر ..

كنت إمبارح بالليل بقول ياااااااااه حالات (اللهم احفظنا ) انفلونزا الخنازير بتزيد وحالات الوفاة كترت ياااارب أستر وميزيدوش حاله كمان ،

يعنى الواحد كدة لسه معملش لربنا حاجه زى ما يحب ، وكنت خلاص من كتر التعب حسه أنه الصبح مش هييجى عليه .

بس أهو أدينى زى الفل الحمد لله وربنا كريييييييم اوى ، ولسه هفضل موجودة أرخم على البشريه كدة وأفترى على البنى آدمين....وبس .

(أدعوا لى ربنا يشفينى )