الآنــ .. حبيبــــــــــى وأكثر

فى الليلة التى قدرها لنا الله منذ ولدنا أنا وأنت ، كانت ليلة التاسع والعشرون من رمضان .. أصبحت لك زوجه وأنت لى كيان .. أنت تعنى كل مرادفات السعادة .. كل معانى الحب  .. كل نبتات الحياه .

طالما أعددت لهذه الليلة كلمات وكلمات ولكنها تبخرت جميعاً .. وفضلت السكوت ومحاولة استيعاب كل مايدور .. حتى إننى ضحكت كثيراً من نفسى عندما أمسكت بالقلم لأوقع عهد زواجنا .. وارتبكت وارتعشت أصابعى واخطأت فى اسمى :))) 

اشعر بالكثير لكن عفواً .. تغمرنى السعادة حتى إننى الآن ابتسم فقط .. وجئت لأشارككم بسمتى .

سألته من قبل " إلى متى سأنتظر " ، ومن هنـــــــــا أتى وكان عقد قراننا حمداً لله .. أدعو الله أن يبارك لى فيه و يجعله لى زوج الدنيا والآخره ويجلعنى له قرة عين.. وأشكرك يارب على أن جعلته لى قدراً :)) 

ودعواتكم بظهر الغيب لنا بالسعادة ،،

مش كراكيب

هى حاجات كتيرة أوى ، فوق ما كنت أتصور لقيتها مبتخلصش ، على قد ما فكرت كتير وسألت نفسى .. طيب هودى دة كله فيييين ؟!! ، على قد ما سرحت .. سرحت فى كل حاجة فيهم شوية ، ابتسمت وأوقات ضحكت بصوت عالى وحاجات تانيه خليتنى أدمع وحاجات مكانش نفسى أشوفها وعلى طول قطعتها .. والكيس إتملى على الآخر وبقوا اتنين وأكتر .

الأوضه منظمه أوى ومش مبهدلة لكن كل دة جوا إدراج ومستخبى .. لإن كل حاجة فيه جزء من اللى فات وعدى علينا وبردوا استخبى .. بقينا مش شايفينه لكن دايما بنفتكره وبنحس بيه والحاجات دى باقيه منه جوا درج فى أوضتنا علشان تقول .. " أنا هنا اوعى تنسانى " ، جوابات كتبتها ماما لبابا وقت ما كان مسافر وكانت الوسيلة الأكثر إكتساحاً .. وكان لفظ الكيبورد وقتها يعاقب عليه القانون ويصيب المرء بالاذبهلال ... وكمان شرايط كاسيت بقى فيها صوتها وضحكاتها وصوتنا إحنا كمان وإحنا أضغر بسنين كتير من دلوقت !! ، هى مبقتش موجودة بس لما بحب احسها أوى .. بسمع صوتها اللى باقى وأحس بيها .

صورنا القديمه كلها .. من وقت سبوعنا والشمع والمغات والرز بلبن والضفاير وبعدين المدرسة ولحد ما كبرنا وبقت صورتى وأنا عروسة نسخه تانيه من ملامح أمى وهى عروسه بردوا :)) .

ورق الثانوية العامة بكل شخابيطة ومواعيد الدروس االى كنت بكتبها فى آخر ورقه فى الكشكول ،وخط مدرس الرياضيات وهو كاتبلى " هتروحـــــــــــــى النار " علشان كنت فاشله فى المادة أوى ، وقلوب وورد وروسومات وقت ما بسرح بخيالى ، وشويه أدعية فى وقت الإمتحانات.

والأجندة خبيت فيها كل اللى حسيت بيه من أول قصيدة أو خاطرة كتبتها .. أحياناً بقرأ كلام زمان كتبته وبكون حسه انه دة مش أنا ، أوقات بضحك على نفسى ، وأوقات بقول برافو ،وأوقات بقول أنا إمتى كنت كدة ؟!! .. وكتب إشترتها وقتها من مصروفى وفضلت أقراها لحد ما حفظتها .. وروايات كتير قصصها وأساميها عاشت معايا وجوايا .

مع كل دة إكتشفت إنه دة ماضى حلو أوى بنيت عليه شخصيتى وأحلامى ببكرة اللى أنا بعيشه دلوقت ، ومن هنا مش معتبرة أبداً إن دى كراكيب ومش متخيله بردوا إنى فى يوم ممكن أفتح درج من دول ألقاه فـــــــــــــــــــاضى .. وقتها هحس إنى مجوفه من جوا .

وعلشان كدة بدعى ربنا ألاقى مكان فى بيتى الجديد لكل كراكيبى .. أقصد للسنين اللى فاتت من عمرى :)))

وحدك أنت

وأدركتُ أنكَ عشقىَ الوحيد 

عندما تذكرتُ الأمس ..

فالأمسُ عندى

راهباً مسجونٌ يبكى

خوفٌ وشجونٌ تعوى

بركانُ دموعٍ يسرى

وصقيعُ المطرِ يدغدغنى

وأخــــــــافُ البحر

مع أن الموجُ يصاحبنى

ويقلبُ أيامى صدفاً 

وآتى للشطِ لأحملها 

فتجرحنى .. وتدمينى

ويسيلُ الحبُ على جسدى

وتخورُ قواىَ على الأرضِ

لتحميــــــــــــــــــــــنى

وينهارُ الدمعُ على جفنى

فيكويـــــــــــــــــــــنى

وبذلك كانت ذكرى أمسى

أما اليوم .. وبعد اليوم 

فوحدكَ أنت 

بعشقكَ أنت

ترضيــــــــــــــــــنى

وأعترف يا حبيبى

أنكَ الحياه

انكَ وجهىَ فى المرآه

أنكَ أرض كونى وسماه

أنك ربيع العمرِ ومناه

ولأعترف

بأن قلبى فى راحتيكَ

ولا أخـــــــــــــــــاف

بأن فرحى يساوى نظرةَ مقلتيكَ

ولاأخــــــــــــــــــاف

بأن عمرى عبداً لديكَ

ولاأخــــــــــــــــــاف

بأن روحى أقربُها منى إليكَ

ولاأخــــــــــــــــــاف

لأن الخوفَ معصيتى

وعشقُكَ علمنى أن أتوب

أن أدوب

ونسيتُ خوفى للأبد 

ولكننى كرهتُ السفر

أنا أريدكــــــــــــــــــ

وفى كلَ يومٍ أقولها

لكل الصور

متى ستأتى لتحتوينى ؟!

يا ألفَ لونٍ للزهر

يا ألفَ وجهٍ للقمر

أنا افتَقدتُك بكلِ الجنون

فإلى متى سأنتظر ؟!!

يا بلدنا يا بلــــــــــــــــــد

وأنا بكركب كعادتى وبدعبس كدة فى جعبة عمونا النت .. قريت الكلام دة وعجبنى .. وسريعاً لطشته هنا علشان ميتوهش منى وأدور عليه >________<

■ الرئيس أمرنى أن أقول الصدق.. من بيان د. عاطف عبيد، رئيس الوزراء الأسبق، أمام مجلس الشورى «الأخبار».

 ■ الرئيس يسأل محافظ الشرقية: بلدك إيه؟.. والمحافظ يرد: «اللى تأمر بيه يا ريس».. عنوان «المصرى اليوم».

■ اللى بيقولوا لأه خلصوا.. وزير الإسكان الأسبق حسب الله الكفراوى «الوفد».

■ الفترة المقبلة الأسوأ فى تاريخ مصر.. محمد حسنين هيكل «المصرى اليوم».

■ دولة بلا تحويلة ونظام بلا قضبان.. أكرم القصاص «العربى».

■ لا أستند إلى جدار فى مصر الآن إلا وأجده آيلا للسقوط.. يوسف القعيد «الأسبوع».

■ مصر تحولت إلى متعهد تنظيم حفلات، ولا تأثير لها فى المؤتمرات.. عنوان «ميديل إيست تايمز».

■ نعيش فى نظام شبه رئاسى شبه برلمانى، وصحافة شبه حرة، وحكم شبه ديمقراطى.. يعنى إحنا شبه عايشين.. حسن الزوام «الميدان».■ البلد خوَّخ.. حمدى رزق «المصرى اليوم».

■ مصر تحولت إلى مصرين.. مصر المنتجعات وملاعب الجولف.. ومصر التى يكاد أهلها يسدون رمقهم.. توماس فريدمان «نيويورك تايمز».

■ السلطة تزوجت الثروة فأنجبت «الفساد».. د. مصطفى الفقى «الخميس».

 

■ يا أيها المسؤولون المطرمخون القاعدون على قلب هذا الوطن.. اللى ياكل لوحده يزور.. وليد كساب «الدستور».
■ لما مصر اسمها المحروسة، آمال اتنهبت ليه؟.. إبراهيم هدهد «الغد».

■ سمى وزير الداخلية بالعادلى لأنه يقلب المواطن ويعدله؟ ثم يقلبه ويعدله، ثم يتركه بعد ذلك يمشى عدل.. د. نصار عبدالله «الفجر».

■ يارب إن كان قد تبقى لنا هامش بسيط من الاستجابة، فلا تسلط علينا بذنوبنا من لا يخافك ولا يرحمنا.. وأنت تعرفه من غير ما اتطوع بالإبلاغ عن اسمه.. أحمد الجمال «العربى».

■ جاء اليوم الذى نحسد فيه موريتانيا أنها تخلصت من عهد ولد الطايع، بينما نحن ندخل فى عهد طايع الولد.. بلال فضل «الدستور».

 

■ يا شعبى حبيبى، يا روحى يا بيبى، حاحطك فى جيبى، يا ابن الحلال..
وأمرمط سعادتك، واهزأ سيادتك، وأخللى كرامتك فى حالة هزال..
وتعيش قضية، وتصبح رزية، وباقى حياتك تعيش فى انعزال..
حتقبل حاحبك، حترفض حلبّك، حتطلع تنزل، حاجيب لك جمال..
الشاعر أحمد فؤاد نجم «البديل»

■ نطالب بالتوريث.. ابن التربى أحق بمهنة أبيه.. رئيس رابطة التربية فى مصر الحاج عبدالعزيز صالح «الميدان».

■ خذوها من الآخر واذهبوا إلى أقرب مستشفى للأمراض العقلية إذا كنتم تأملون فى إصلاح أو تعديل دستورى فى مصر.. عبدالحليم قنديل «الكرامة».

 

 ■ سكوت، حنزور.. سليمان الحكيم «العربى».

■ كلنا إخوان.. مفيش حاجة اسمها إخوان مسلمين.. د. فتحى سرور «المصرى اليوم».

■ الإخوان المسلمون مثل إسرائيل كيانات غير شرعية.. د. مفيد شهاب «الجمهورية».

■ كل شيعة مصر يمكن جمعهم فى ميكروباص واحد.. فهمى هويدى «اليوم السابع».

 

 ■ مصر دولة غنية ولكنها تدار بعقلية فقيرة.. د. صبرى الشبراوى «الجمهورية».

 

■ مصر هى البلد الذى تجد فيه الحذاء فى الفاترينة والرغيف على الرصيف..

وجدى زين الدين «الوفد».

■ مصر ليست أمى.. دى مرات أبويا.. أسامة غريب «المصرى اليوم».

■ مصر رائدة فى الخير والشر.. فيها أحسن قارئ قرآن وأحسن أديب، وأحسن راقصة وأحسن فرعون..

د. يوسف القرضاوى «قناة اليوم».

■ مصر للبيع لأدنى سعر.. حازم هاشم «الوفد».

■ حكومة ولاد الأصول باعت أصول البلد.. حسين عبدربه «الأسبوع».


■ يا ترى العزا فين النهاردة.. فى عمر مكرم وللا فى عمر أفندى.. محمد عمر «أخبار اليوم».

■ بيعوا كل الذى تريدون بيعه، ولكن اعتبرونا نحن المواطنين جمعية عمومية يجب استشارتها.. صلاح منتصر «الأهرام».

■ الحكومة تتصرف فى ثروة مصر كما يتصرف الشاب السفيه فى ثروة أبيه..

الراحل جمال بدوى «الوفد».

■ المَكَنْ دون صيانة منذ ٤٠ عاما، والتعيينات توقفت منذ عام ١٩٨٦، وعدد العمال انخفض من ٢٨ ألف عامل إلى أقل من ١٢ ألفا، والآن يريدون محاسبتنا على الخسائر.. يروحوا يحاسبوا اللى خربها.. من أقوال عمال غزل كفر الدوار «الدستور».

■ على كثرة ما نتحدث عن رجال الأعمال وعن التصنيع، لم نصنع حتى اليوم ساعة مصرية ولا جهاز راديو أو تليفزيون.. الراحل د. عبدالقادر القط «الأهرام».

■ احنا بتوع الأستيكة.. طلعت المغاورى «الوفد»، تعليقا على تصنيع أول أستيكة مصرية.


■ احنا اللى صدرنا المعسل.. حسن عامر «الفجر».

■ سلط الله علينا من أعمالنا رجال أعمالنا.. محمد أبوكريشة «الجمهورية».

■ أتحدى أى مسؤول أن يعلن عن ملاك الصف الأول فى الساحل الشمالى، لأنه سيكتشف أن الذين يحتكرون البحر هم الذين يحتكرون البر.. سيد على «الأهرام».


■ معظم الهاربين بفلوسنا كانوا يقيمون لنا موائد الرحمن، وأتارى إحنا اللى عازمينهم..

جلال عامر «البديل».

■ لماذا لا يصاب المتهمون بالفساد بالمرض إلا بعد سقوطهم، فيهربون بحجة السفر للعلاج؟..

وائل الإبراشى «صوت الأمة».

■ السجون المصرية أفضل من أوروبا، واسألوا سفراء أمريكا وبلجيكا وبريطانيا،.. مساعد وزير الداخلية لشؤون السجون، لواء نبيل العادلى «الجمهورية».

■ رشوت محافظ الجيزة السابق، ماهر الجندى، بناء على فتوى بمشروعية الرشوة ما دمنا مكرهين.. رجل الأعمال عمرو حليقة، الذى برئ فى قضية المحافظ «العربى».

■ كشف رئيس جهاز المحاسبات أن خسائر مشروع فوسفات أبوطرطور بلغت ١٠ مليارات و٨٠٠ مليون جنيه.. هل يعنى ذلك أن الحرامية لبسونا طراطير، أنا أبوطرطور، وأنت أبوطرطور، وهو أبوطرطور، وكلنا طراطير؟.. أحمد رجب «الأخبار».

■ لو كان صحيحاً أن منتجات توشكى تصدر إلى أسواق أوروبا، فمتى تصل إلى أسواق مصر؟.. عبدالعال الباقورى «العربى».

■ اسألوا من عين صاحب العبارة الغارقة فى مجلس الشورى لتعرفوا هوية من يسانده..

مصطفى بكرى «الأسبوع».

■ إنتو مالكم؟.. اللى ماتوا فى العبارة من أهلنا.. همه صعايدة وإحنا اللى بندافع عنهم، وإحنا رضينا باللى حصل، وخلاص عايزين نقفل الموضوع على كده.. كتر خير الحكومة على اللى عملته.. كتر خيرها.. نائب الحزب الوطنى عبدالرحيم الغول «الفجر».

■ عندنا أسرع قطار فى العالم.. من القاهرة للجنة بدون توقف.. الرسام عز العرب «التجمع».

■ إحنا هنا بنموت على البطىء.. لما نموت هناك على شاطئ إيطاليا مرة واحدة يبقى أحسن.. شاب يحلم بالهجرة «أكتوبر».

■ ماحدش فى مصر بيبات جعان.. الفقير بيمشى فى الشارع يلاقى الناس تقدم له العصير والبلح.. نائب الحزب الوطنى عبده أبوعيشة «صباح الخير».

■ صحيح إن مفيش حد فى مصر بيبات من غير عشا.. لكن مشكلتنا الحقيقة مع الحكومة مش فى العشا.. المشكلة فى الفطار والغدا.. مجدى حسنين «أكتوبر».

■ يعنى إيه رأس سنة؟.. صبى القهوجى عبدالعظيم «الأهالى».

■ الجامعة زى الفل، ورغيف العيش زى الفل، والديمقراطية موجودة، والحديد موجود، طيب مصر حزينة ليه؟.. سؤال الطالب بلال دياب لرئيس الوزراء أثناء محاضرة له بجامعة القاهرة «البديل».

■ ماحدش بيحاسب الفلاح على الميه فى مصر لأنها ببلاش.. وأبوبلاش كتر منه.. رئيس الوزراء د. أحمد نظيف «المصرى اليوم».

■ لماذا يثور المواطنون لعدم توافر مياه الشرب؟.. ماتشربوا ميه معدنية..

محمد على خير «الميدان».

■ من ينقذنا من أغذية الدمار الشامل؟..

القارئ سمير رشدى «الجمهورية».

■ السحابة السوداء نتيجة مرتفع جوى يؤدى لزيادة الضباب الدخانى..

وزير البيئة د. ممدوح رياض «الأهرام».

■ المشروع القومى للإسكان مجرد كلام عشان يريحوا الناس نفسيا..

وزير الإسكان الأسبق صلاح حسب الله «البديل».

■ الحكومة هى التى تشترى القماش، وهى الزبون الوحيد، وترزية مجلس الشعب يفصلون على مقاسها.. وفى النهاية يلبسها المواطن.. عصام كامل «الأحرار».

■ بعد كمبيوتر لكل طالب، إن شاء الله ستوفر الوزارة كرسى لكل طالب فى الخطة الخمسينية القادمة.. الرسام محمد حسن «الأحرار».

■ تتحدثون عن كرة القدم.. الجنازة حارة والميت لا مؤاخذة.. محمد جابر «مجلة الإذاعة والتليفزيون».

■ الانتماء الآن إلى الفلوس وليس إلى الفانلة.. المدير الفنى للمنتخب الأوليمبى

شوقى غريب «نص الدنيا».

■ أغانى اليومين دول كلمة واحدة ونغمة واحدة وهيصة كدابة.. حاجة تجيب الصداع..

الفنانة الراحلة أمينة رزق «الكواكب».

■ نعم أغنى للسكرانين، لأنى لم أجد فايقين أغنى لهم.. المطرب الشعبى

سعد الصغير «القاهرة».

■ إشمعنى فيلمى أنا عايزين تفهموه؟..

المخرج داود عبدالسيد «العربى».

■ شارع عباس العقاد أكثر شهرة من العقاد نفسه..

د. رفيق الصبان «أكتوبر».


■ الواقع الثقافى متدهور، ومحاصر بشبكات المنافع وغياب الضمير.. الشاعر محمد إبراهيم أبوسنة «الهلال».

■ لم يعد لإذاعة صوت العرب بريق، ومحطات التليفزيون بدأت تخبو، ومصر لم يعد فيها مد ثقافى.. حاكم الشارقة د. سلطان القاسمى «الدستور».

■ الصحافة حرة تنتقد ما تريد، وإحنا كمان نقرأ ما نريد.. وزير التعليم العالى

د. هانى هلال «الأهالى».

■ لم تفرق الصحف والقنوات التليفزيونية بين تغطية الأخبار والتغطية على الأخبار..

سلامة أحمد سلامة «الأهرام»

■ الحكومة تسعى إلى تحويل السلطة الرابعة إلى السلطة الراكعة..

الروائى بهاء طاهر «الوفد».

■ وجهوا للمعارضين تهمة إهانة الرئيس، فماذا عن تهمة إهانة الشعب؟..

إبراهيم عيسى «الدستور».

■ البركان سينفجر دون سابق إنذار، والطوفان سيجتاح كل من يقف فى طريقه لا محالة..

د. رؤوف عباس «الكرامة».

■ مصر الآن تعيش مرحلة فك الجبس..

أسامة أنور عكاشة «نص الدنيا».

■ ورد الجناين بيفتح فى مصر..

هويدا طه «القدس العربى».

■ أيها الشعب الحبيب المهاود.. رجاء لا تنظر إلى نصف الكوب الفاضى.. إكسر الكباية كلها..

القارئ إبراهيم عطا الله «الدستور».

■ كفاية.. الشعب لابد أن يسترد حقه..

رئيس الوزراء الأسبق الراحل د. عزيز صدقى «الأسبوع».

■ والله الذى لا إله إلا هو لن نكون قطيعا من الأغنام، ولن نقصف أقلامنا، ولن نكمم أفواهنا، ولن نستعبد بعد اليوم..

المستشارة نهى الزينى «صوت الأمة».

 ـــــــــــــــــــــــــــــــــــــــــــــــــــــــــــــــــــ

 

وهذا كل ما حدث ..

رمضان كريم

كل سنة وكل الناس الطيبين اللى عرفتهم من هنا بخير ، كل سنه واحنا لسه بنفتكر بعض ببوست حلو ولا مناسبة جمعتنا ، وكل رمضان واحنا لسه مجتمعين وزى ما احنا طيبين ولسه بردوا مدونين على قد الحال .

بيتى هنا وحشنى جداً ، كتابات الناس اللى بزورهم إفتقدتها ، بدخل بقالى فترة أشوف التراب مخيم هنا وأقول امتى أرجع تانى ، مناسبات وأحداث كتير عدت علينا وانا مش هنا .

أعتبرونى كنت مسافرة مكان بعيد وبلد غريبة متمناش إنى أروحها تانى أبداً .. و الحمد لله أنارجعت منها .

ربنا يحلى كل ايامنا وكل رمضان يعدى علينا نبقى أسعد وأنجح وعلى طاعه ربنا أدوم ، وأنا رمضان السنه دى مختلف جداً بالنسبه لى وهشكر ربنا فيه على حاجات كتير ..

          رمضان كريم علينا :)

عيد سعيد

كل سنة وإنتم طيبين وبخير وفى سعادة وهنا يارب ، والعيد الجاى إن شاء الله يبقى ربنا كتب لنا حجة ، وكل عيد ييجى علينا يبقى أحسن من اللى قبله .

يارب كل سنة نفتكر بعض ونيجى نقول .. كل سنة وإحنا متجمعين

ربنا يكرمكم دايماً يا أحسن ناس :)

وبما إنه عيد دبح ولحمة .. آآآدى العيدية  " مهو بردوا كل وقت وليه آدانه " :)

وعلشان أبقى عملت اللى عليا .. شويتها لكم كمااان

عيد سعيد

وبحبكم فى الله ^_^

(إطلع براااا )

بيت الست هو مملكتها اللى من أول يوم بتحبها وبتتعلق بكل جزء فيها .. وخاصة المطبخ ، مين فينا مبتقضيش فى المطبخ وقت كبير من يومها ؟! ..

بعد المطبخ على طول بتيجى المراية .. أقصد يعنى الأوضة " أم مراية كبيرة " .. سواء أوضة النوم الأساسية أو أوضة الأطفال .. وممكن يكون كل جزء فى البيت فيه مراية .. مين فينا مبتقضيش وقت كبير بردوا من يومها قدام المراية ؟! ..

إنهاردة أنا هتكلم عن المطبخ ومشتقاته اللى برا المطبخ من مقشة قديماً " مكنسة حديثاً " ، زعافة ،منفضة ،مساحة ومريلة مطبخ أحياناً ..

على مر الأجيال وفى كل جوازة ولكل عروسة بنقابل سؤال بيقول .. وإنتى بقى على كدة بتعرفى تطبخى ؟؟ ، وكإنه الطبخ هو الشرط الأول وكإننا بنعيش علشان نطبخ وناكل وبس !!

وكان زمان العروسة بتتجوز بكراسة كاتباها لها جارتهم فلانة ولا خالتها أم فاروق ولا حتى مامتها مليانة بالوصفات والمساعدات المطبخية العبقرية كلها ، وبعد كدة شوفنا كتاب أبلة نظيرة اللى عدى على الكل بملوخياته بسلطاتة بباباغنوجة ، ومع ركب التطور بقينا ندخل موقع " هتطبخى إيه إنهاردة يا بهانة؟! " ونشوف الوصفة اللى تعجبنا ..

ومن مطبخى هذا .. كح كح أقصد يعنى من موقعى هذا ومن رأيى إن الستات بالنوسبة للمطبخ 3 أنواع ملهمش رابع ..

أولهم : : :

ست بيت جداً ، بتطبخ كل حاجة وأى حاجة ونفسها فى الأكل يجيب آخر الشارع .. بتهتم أوى بالسمن البلدى والحبهان وتحمير الفراخ ، بتحط شوية سكر على البسلة علشان تتظبط .. وهى دى أسرار المهنة ..و لما حماتها شافت كدة مصمصت شفايفها وقالت : هىء هىء جدعة يا حبيبتشى .. بس التسبيكة مش مظبوطة بردوا " قمة الرخامة "..

نضيفة أوى فى بيتها .. عدوة التراب والكركبة .. حمبلية .. بتكنس فى المكنوس .. بترتب شراشيب السجادة بالواحدة .. نقطة الميه تحت الحوض بتعصبها .. شقتها زى المراية وتقريباً بتكره اللى تزورها وتجيب معاها عيال .. وبيبقى نفسها ترميهم من البلكون " بكل بساطة " .. ولو يعنى لاقدر الله عجبت جوزها حماتها تقول " أمممممم .. ربى يا خايبة للغايبة .. آه مهو الراجل إبن مراته " ..

تانيهم : : :

ست على إيدها نقش الحنة ، مبتعرفش تطبخ لا كتير ولا قليل بس بتجرب ، من أنصار زيت الدرة والملح الخشن والفراخ المسلوقة :( ،

بتخيط الممبار والحمام المحشى بالإبرة والفتلة .. علشان الرز مينترش ، وهى دى طرائف المهنة .. ولما حماتها شافت كدة كانت هناك نفس المصمصة فى الشفايف وقالت : بلا خيبة على بنات الايام دى .. أومال اتعلمتى إيه فى بيتكوا ده الواد بيجينى هبيان ياكل عندى "نظرة خبيثة "

بيتها يضرب يقلب .. عدوة القطنة ؛ لإن القطنة مبتكدبش .. أطباق مطبخها كلها فى الحوض دائماً وأبداً .. دولابها مكركب .. وما خفى كان أعظم ..ودة على أساس انها مرفهه ومبتتهانش فى شغل البيت ..

ولو يعنى إن شاء الله أشتكى منها جوزها حماتها تقول " اكفى القدرة على فمها تطلع البت لامها .. واللى متعرفش ترقص يا اخويا تقول الارض عوجا "

تالتهم : : :

ست عادية وعلى حسب ، بتطبخ على قدها وزى ما تيجى ، ملعقة السمن بتساعد جنب الزيت والحبهان يحب الملح والفرخ فى الفرن أحسن ، كل يوم زى اللى فات مبتغرقش ..

ولما حماتها  شافت كدة " بدون مصمصة " قالت : ايه .. هو اللى تباتوا فيه تصبحوا فيه ؟! بكره يولف على غيرك " نظرة انتصار "

ولو يعنى جوزها زهق وفكر يشتكى حماتها تقول " أجوزك ست ستها .. واللى خدته القرعا دى - مراته -  تاخده يا حبيبى أم الشعور "

وزى ما الستات الغلابه المغلوب على أمرهن 3 أنواع .. فالرجالة بردوا 3 أنواع من وجهه نظرى النسائية البحتة *_*

أولهم : : :

الراجل الشيف .. بيعرف يطبخ إما بسبب ظروف شغله اللى مخلياه دايماً لوحدة .. أو دخل الجيش وبقى بيتصرف ..

بيحب البيت يكون هادى ورايق  .. وبيشجع الأكلة الحلوة ، ودايماً يدى أوامر بالنسبة للطبخ أو ترتيب البيت ، بيبدى مساعدة - بالغصب - جوا المطبخ  وبيكون رد فعل الست  "إطلع براااا " .

تانيهم : : :

الراجل اللى يادوب يسلق بيض .. يعمل شاى ، غير منظم بالمرة .. بيقلع جزمتة فى آخر أوضة فى البيت ، هدومة مفرقة فى كل أنحاء الشقة .. ودة نوع بيغيظ جداً .. وبيحب الميكب وعايز مادونا طول الوقت جوا البيت ، وبردوا بيتدخل فى شغل المطبخ بكل غلاسة وكإنه أبو العريف ومبتكونش ليه فايدة غير انه بيلخم ، وبيكون رد فعل الست " إطلع براااا ".

تالتهم : : :

الراجل المسالم اللى ملوش لا فى مطبخ ولا فى ترتيب بيت .. عملنا أكل بياكل معلمناش مش مهم  " مالها المطاعم " ، رتبا البيت وولعنا شموع وجو رومانسى يبقى كويس معملناش دة  " آدينى بتفرج على روتانا وخلاص " .. مبيبديش أى أعجاب ومبينبهرش ودة من غير سبب بقوله كدة من عندى " إطلع براااا " .

أرجع وأقول " ابنك على ما تربيه وجوزك على ما تعوديه " آى والله صح .. فى الأول دايماً كل حاجة بتكون صعبة وبيكون الطرفين متطبعوش بطباع بعض .. إنما بمرور الوقت المشاكل والإختلافات بتقل .. بس نحاول ، وناخد كل حاجة بروح حلوة ونخلى زعلنا جوا بيوتنا منعاً للتدخلات الحربية والأمثال ذات الدم الخفيف .. وسيظل أصحاب العقول فى نعيم :)

فنجان دم

مدخل:

الدم سايح فوق جبين الشمس

ومغرق شواشى الخلا....

لا قدرت أزمزم دمعتى

ولا جتتى

ولا حتى ضميتك ولا.....

للاسف...

احنا اتوجدنا فى شئ

ميفرقشى كتير عن مزبلا....

(1)

فى بلدنا الخندق

على كل حيطان شوارعها الاضيق من القبر...

على قهوه عم خليل

ابو قلب اصيل

بياع الصبر...

كان كل مناه

يتقابل مع روحه فى يوم على شبر فى شبر....

على اول صفحه كراسه للبنت الرقه

وع الضحكه ...

وعلى اول دكه اتجمعنا

وعلى مدخل بيتنا اللى جمعنا

كان اول مره

كلمتك ....

وبسرعه خاصمتك....

علشان حسيت بالخوف كالعاده

م الضحكه لتطلع بزياده....

واموت م الضحك

انا خايف فعلا اموت م الضحك

مع انى باروح على طول السيرك...

او للتصحيح

انا عايش على آخر كرسى

آخر كرسى فى حضن السيرك....

السيرك...

لما اللى ما بينى وبينك

لقمه العيش ......

وان لقينا القمه ناشفه وحاف

نفتفتها ومبتقضيش...

يا اللى علمتوا الجنين فى بطن امه" يخاف"

علشان يعيش...

يمشى جمب الحيط

مكتف دمعته علشان يعيش...

ويقوم ينام وينام يقوم

ويروح وييجى كوم ورق

زى القهاوى والكراسى ع الطرق

ملعون ابو العيشه اللى مش زى البشر...

ملعون يا داء الانتظار والفشخره

والمنظره ...

لما على اول بلاد المسلمين هجم التتر...

يا اللى علمتونا كيف الحب يطلع من القلوب

ويحن له حتى الحجر

القلوب زى الغجر....

القلوب يا سيدنا ومولانا

من طوابير الحياه المؤرفه

الهم فى ضلوعها انفجر...

القلوب كيف الغجر

مالها مله ولا دين..

او شريعه او قانون

اصلبونا كيف نكون...

واعملونا جذوع شجر

ريحونا من العلام...

كنتوا ليه بتعلمونا لما قوله "آآآه"

بتبقى عندكم دايما حرام....

واما حد بيستغيث بيكم حرام

اقتلونا واقتلوا فينا الكلام ..

ريحونا من العلام

ريحونا من العلام

(2)

فى بلدنا الخندق

الليل انشق من الرهبه...

وفتحلنا كام مليون تربه....

على كل وشوش الصبح الجاى

من غير ازاى...

الحزن اتعود فى بلدنا

يطلع محروق من جوف الناى...

وانا قلبى اتعود فى لقانا

ومن اول ضحكه

واول كلمه

واول نظره باقول باى باى....

وأنا.....

مش مجنون ولا لسه صغير

دالحزن مخرم فى ضلوعى زى المسامير....

الحزن وبس

الشئ الفاضل فى بلدنا عايش بضمير...

ولا عمره

استندل مع مخلوق على وش الارض

ساعه ما نقله يا حزن تعالا

بييجى قوام....

يا حزن استنا

بيفرش كل ضلوعه

وانام.....

الناس دلوقتى بتاكل حزن وتشرب حزن

كانه طعام....

الناس دوقتى من اول

يوم على وش الارض

وهيا بتصرخ

جاى الفرح

جاى الفرح....

طب ييجى الفرح منين يا اخوانا

وفى بلدنا مقتول القمح....؟!!

والجرح على كل وشوش الصبح الجاى

وأنا لسه بادور ع الشئ التايه

جواى....

والليل انشق من الرهبه

ورمانى فى تربه

من غير ازاى....

الفرح اتعود فى بلدنا يطلع محروق

من جوف الناى.....

(3)

على اول دكه قعدنا عليها فى الكتاب

وقريت الالف المصلوب على كل كتاب

ولقيت الشيخ المتسلطن بالعمه قماش.....

متسلطن زى السلاطين

مقصدشى مثلا مثلا

انه كان حشاش ....

ولا كان نتاش ....

ولا عمر الشيخ المتسلطن

الجن شقيق العفريته

كان يقوم غشاش.....

ولا كان كالحجره الناشفه العالقا فى زورى

كان كل الدنيا فى حساباته

على حسب الدور...

الكلمه

على حسب الدور....

والآهه

على حسب الدور...

واللقمه

على حسب الدور...

وانا عمرى ما حصلتش دورى

ولا هاقبل يا فضيله الشيخ حساباتك

والموت

الموت بالدور....

دانا عمرى يا عالم ما شهدتش فى بلدكم زور ...

وده.....

كان راجل عادى

لكن كان ضخم وعلى طول بيسد الباب

والصوت يطلع زى الكرباج:

"اقرا يا واد انته سوره الاخلاص"

طب قولى يا شيخ معناها ايه سوره الاخلاص

معناها النمله فى بلدنا تمشى بحراس...

والكلب بيمشى بحراس

وانى اسكت زى المجانين

واسنكر قلبى بميت ترباس....

ما انتوا يا شيخ المشايخ بالشريعه والقانون

صبيتوا فى عيونا النحاس...

وف قلوبنا العيله الطفله النحاس

طب منين تطلع الكلمه مع الاحساس

ولا ليه احفظ واصم فى سوره الاخلاص

مش حافظ....

مش حافظ....

انا مليت من الفرجه فى جتت الناس....

مش حافظ...

برقلى وقال :

يا ابن العفاريت بتجادل ليه؟!!

وحدفنى بفرده قباب...

كان زى الالف المصلوب على كل كتاب

حرمت من يومها اعتب تانى الكتاب......

(4)

[فى بلدنا الخندق

باتصادف دايما بعيونك على كل زقاق...

وافرح من قلبى

لكن الفرح بيبقى ساعات م الخوف حرااااق...

وعيونك ام ضفيرتين

خلونى احس

خلونى اضم الارض الصهد

من الاشواق....

اختصروا كل المسافات بين العشاق.....

فى عيونك ام ضفيرتين

باتصادف دايما ببلدنا الخندق

اضيق من نن العين.....

والعين دى مرايا البنى ادميين

والعين...

دى الكلمه المكتومه فى قلبى

وبقاااااالها سنين......

العين م الخوف اللى مكلبش كل الاشياء

بتدمع طين...

وبتنزف م الفرحه الهم...

تتخيل

فنجان القهوه بتاعى امبارح

كان مكليان دم....

معرفتش غير مع اخر شفطه من الفنجان والله يا عم

غير انى شربت امبارح

فنجان دم....

كان مر ومرارته فى قلبى بتسالنى :

الدم اللى انته شربته امبارح من مين؟!!

من دم الفرحه

ولا الاحلام

ولا كان دم البنى ادميين؟!!!

ولا كان دم الخوف اللى مكلبش كل الاشياء

واتدارى عن نن العين؟!!

يا بلدنا الخندق يا اللى اضيق من نن العين

يا بلدنا الخندق يا اللى اضيق من نن العين

دورت فى روحك ...

وفى روحى...

ومعرفتش لسه انا اطلع مين

فى بلدنا الخندق اللى اضيق من نن العين

معرفتش لسه انا اطلع مين

انا اطلع مين؟!!

خروج:

الدم سايح من عيون الشمس

رشرش وشوش الاوليا

والدنيا هجت فى الشوارع

مستغيثا وعاريا

للاسف...

احنا خلاص خلصنا زمن الانبيا

وبقينا فى زمن المسوخ

اللى فيه لازم يموتوا الابريا

لازم يموتوا الابريا

يموتوا الابريا


........................................


فنجان الدم

المتحوج من دمى

من دم ابويا وأمى

وأخويا وأختى

والخال والعم

فنجان الدم

اللى مراره

معمول مخصوص

علشان بنى ادم

منقوع ف الهم

محصور بالامه

مطحون باهاته

والدنيا بتعصر ف جنابه

بينزْل هم

وجراحه بتنزف هم

ودموعه

بتنزل هم

فنجان الدم

اللى الخال شربه

وبيسأل

"الدم اللى شربته امبارح

كان من مين؟؟"

دم الفرحة

ولا الخوف

ولا الاحلام

ولا البنى ادمين

وَلاَ دول وَلاَ دول

دا الدم اللى شربته امبارح

منقوع ف بلدنا

متعتق

ف اكوام الطين

الدم اللى شربته ياخال

كان دم جدودك

وجدودى

كان دم عروسة النيل

ام ضفيرتين

فنجان الدم اللى شربته

ولا تعرف جبته منين

كان دم بلدنا المقتولة

دى الكلمة المكتومة ف قلبى

وبقالها سنين

 

...................................

فنجان الخال كان مليان دم ؟

لا هو دم جدود ولا دم الناس

الدم دة وهم دموعنا المحروقة على كوم

اخلاص

الدم دة صرخة صوت فى قلوبنا بميت

وسواس

الدم دة ضل فى شارع فاضى

موت زرعة

وحجب الشمسة

وجاب الفرحة

صلبها

على شجرة عمر كتير من الناس

الدم دة حكم بقتل الحب

وشهادة زور من برا القلب

خوف من القاضى مبرق عينة

قول يابنى انت مين بيحب؟؟؟

مش انا يا قاضينا اللى بحب

مبقتش بحب ولا اعرف احب

ولا حتى هدافع عن كلمة حب

نطق الحكم فى صورة دم

بخنق وشنق وقتل الحب

وسال الدم

يبقى الدم ياخال كان وهم

كان دمعة عين مظلومة

وصرخة صوت طالع من القلب

المشنوق

فى محكمة الدنيا

بكٍت عين مولود يااخوانا على كتف الام

نزعت فرحة لعروسة بطرحة وجابت هم

ونزل الدم ساعتها فى ساحة الحكم

وسكت الصوت المنبوح من جوا الفم

اتارى ياسيدى قاضى الحب بحاله

أصم

وراح الحب

وسال الدم

مخدتش بالى ساعتها

غير وانا ماشى بلملم غم

وفى وسط الزحمه الموجوده

انطلق السهم

خربش ايدى وأنا بشرب فنجان القهوة بتاعى ياعم

أتارى السهم المبعوت كان قاصد قلبى المكبوت

وشفت الدم فى آخر نقطة فى فنجانى

بعد ما كنت شربت معاه غيم أحزانى

ورفعت ايديه المجروحه على خدى المرسوم

على اللوحة

ومسحت الدمعة اللى راسمها بالقلم الأحمر

خطيت الضحكة على شفافى

باللون الوردى

ورسمت النور

طالع من القمر السارح

لجل ما اشوف فنجان الدم المكسور

الفالت من ايدى من ليلة امبارح

..........................


" توضيح مهم جداً "

* القصيدة دى غالية على قلبى بجد 
متخصنيش لوحدى ولا هيا فكرتى .. أنا بس ضفت عليها اللى حسيته


_ أول جزء منها اللى باللون الأوسود كاتبه " أدونيس " وهو الدكتور محمود مخلف
ودة لينك الموضوع أول ما كتبه
فنجان دم جزء أول


_تانى جزء منها اللى باللون الأحمر كاتبه "سنترافيش "وهو الدكتور أحمد سليمان
ودة لينك الموضوع أول ما كتبه
فنجان دم جزء تانى


ودة لينك مدونته
سكاكر


_تالت جزء منها آخر جزء اللى باللون البنفسجى كتبته أنا كح كح  "زهرة12" اللى هيا زهرة
ودة لينك الموضوع أول ما كتبته
فنجان دم جزء تالت


ودة كله كان أيام ما كان منتدى شبابنا بيجمعنا وقبل ما الناس المحترمة دى تتخرج وبس :)