استغماية

غمي عيونك
سد ودانك
إفتح بقك
قول انا فين
الشاطر فيكو
يحزر فزر
في دقيقتين
والإشطر منه
اللي يحزرها
في غمضة عين
والإشطر خالص ما يحزرش
يقول انا فين
والإشطر أشطر
اللي يبص يشوف بالعين
انا فين ؟
فيه ناس
اختلف في الموضوع
وحكاوي اتقالت
عن مواضيع
والناس لا مؤاخذة
في زمن الجوع
يتعشوا كلام
يفطروا تشنيع !
فيه واحد شافني
بلبده ولاسه
في باب اللوق
والتاني
لمحني بقفصين موز
علي باب السوق
والتالت شافني
في كاديلاك
راكب مع بنتين
والرابع
شافني ف طنطا
بابيع
بلابيع ونشوق !
وصحافه الصاوي
والورداوي
والجمال
وأباظه ولاظه
وباقي الدلاديل
والأندال
بتأكد جدا
جدا جدا بالتدقيق
إن انا محبوس
وباروح يوميا
للتحقيق!
طب اصدق مين
وأكدب مين ؟!
ماهي حاجه تمخول أيها عاقل
وانا مجنون
وباكلم نفسي
وعقلي صراحه
ماهوش مضمون
لو كنت بلبده ولاسه
وماشي ف باب اللوق
طب إيه مشاني
مفلس جدا
جنب السوق ؟!
لوكنت بدأت
كتاجر فاكهه
وبقفصين ؟
مش كنت زماني
معلم طمبه
وجوز اتنين؟
لوكنت ف كاديلاك
زي ما قال
التالت بيه
ومعايا بنات
زي الشربات
طب ح انزل ليه ؟!
لوكنت يا طنطا
بابيع بلابيع
وسطل وبخور
مش كنت زماني
مدير على جامع
أو مأمور ؟
وصحيح الصاوي
والورداوي
والجمال
حابسين أفكار الناس
في بلدنا
وعال العال
إياك قاصدين
إن انا مسجون
زي الملايين ؟
كده يبقي تمام
ولأول مره
ح اقول " صادقين "
بس انا لا مؤاخذه
وبالتدقيق
ماحصلشي معايا
ولا تحقيق !
مش حاجه تحير
طب أنا فين ؟
حزرتوا خلاص
فزرتوا خلاص ؟
عارفين
أنا فين
أنا ساكن قلبي ومتونس
بالناس
والناس الونسه كتير
ماليين القلب
وشاغلينه
سارحين في الدم
وفي التفكير
وجناين قلبي العمرانه
بالناس
الأزهار
العصافير
سايعاني
وسايعه اللي باحبه
وتساعي معايا
رفاقه كتير
شايفين انا فين ؟
الشاطر فيكو
يحزر فزر
في دقيقتين
والأشطر طبعا
حيحزرها
في غمضة عين
أنا ...... فين ؟

الشاعر/أحمد فؤاد نجم

أنا لا أتذكركم !!

كانت غفوة..وتداركت وأنا أصحو أنى أمسك بدفترٍ وقلمٍ منساب بين أصابعى ،وعلى صفحات الدفتر رُسمت دوائر دوائر لا تنتهى ولا تلتقى ..تشغل كل فراغ فى الصفحات ..

صَحوتُ فلم أتذكر أى شىء ..وكأنه قد مُحى كلُ شىء ، لمن الدفتر ؟! ، ومن أنا؟! ، وأين أنا ؟! ..

كل ما شعرت به تساؤلاتٍ من فراغ وبقيت أتحسس كل ما حولى وكأننى أفتش عن نفسى ، وجدتُ أقلاماً ودفاتر ووجدتُ فراش بلون الزهر وكان هناك أدراجاً وخزائن ، وجدتُ صوراً معلقة ، وجدتُ حياه.. ولم أدرى لمن تكون !!

ومازلت فى الغرفة.. وصوت دقاتِ الساعة رتيب مزعج ..وسكوت قاتل يحوينى ، أمسك بالدفتر والقلم وكأنهما ماضٍ متصل بالحاضر ..جسر ما بين كان والآن ..

البابُ مفتوحاً ..مشيتُ إلى الخارج ..أبوابٌ موصدة وكأنه منزل ..نعم هو منزل ..قرعت كل الأبواب فلا مجيب ..أرى نوراً بالداخل واستشعر حياه ولكن ..لا مجيب هرولت إلى بابٍ مفتوح ونزلت درجاً ..أرى أشخاصاً يسيرون ، وهنا يتكلمون ، وهنا صغار يلعبون ، وهنا حول شىء لا أدركه يصطفون ..

ركضت وبقيت أركض وأركض والكل ينظر إلىّ .. والدمع ينساب منى ..أتوسل بمن أقابل ليقول لى من أنا ؟! ، بالله عليكم من أنا ؟! ، أتعرفوننى ؟! ، لا أحد يعطى جواب وكأنهم لا يفهمون ..والدمع لا يتوقف وكأنه الأنفاس لأحيا ، توسلت بالجميع لا أحد ساعدنى ..

وخُيل لى أننى قطعت كل المسافات ، أنا الآن لا أرى أحداً حولى والمكان متسع لمد البصر ، أنا وحدى ،قدماى لا تحملانى وكيانى يرتعد وأشعر بالإنتهاء..

أحسست وكأنى اعتصر ..وكأن يدان تخنقان داخلى ، فتأوهت بكل قوتى ولكن .. لم أسمع صوتى !! وهم أيضاً كانوا لا يسمعون ، ورأيتنى .. نعم .. كنتُ أنا ، وكأننى فى المرآة ..وسألتنى أنا : أتتذكرين من هم خذلوكِ ، من باعوا الحنان وفارقوكِ ؟؟ ، قلت :لا لا أتذكر..

قالت أنا :أتتذكرين ضحكاتكِ التى طالما إختلطت دمعاً .. وكأنكِ تنذرين بالحرمان منها وتبكينها قبل أن تترككِ ؟؟ ، قلت :لا لا أتذكر..

قالت أنا :أتتذكرين أحلامكِ ..أحلامكِ التى بنيتيها قصور وأفراح ، وحدائق ابتسامات ، وزهر طبل وزمر ، وفراشات حب وشوق ، وبحور انغام.. أتتذكرين أنها بقيت وماتت احلام ؟؟

أتتذكرين قولكِ "ليتنى لم أحلم ..لو لم أذق حلاوتها لما حزنت " ؟؟ ، قلت :لا لا أتذكر ..

قالت أنا :أتتذكرين إيمانك بأن الفرح ليس لكِ ,, لا يشبهك .. لا يتناسق مع ألوانك .. وها انت غيرت الألوان ، ها انت حطمتى إيمانك المعتاد ؛ لتسرقى لذة حلم ،نشوة أمان ..لتصنعى حياة تحبينها ولو لمرة ..

إقتربتى أكثر لتلمسى الأحلام ولتدركيها حقيقة .. لتحتضنيها وتدفىء برد أوصالك ، ولكن لا الأحلام الآن حقيقة ولا إيمانك كان خاطىء ودوامة الكابوس .. تبتلع كل شىء ..

صرخت :لا لا أتذكر ..لا أريد أن أتذكر وبكيت .. بكيت وعندها سمعت صوتى وتداركت الأشياء ورأيت صفحة الدفتر المبتلة ..فعرفت أنها كانت أمنية ..

كم تمنيت لو لم أتذكر ، أن أعيد تقييم الحياة من جديد ، وأن أفقد إحساسى بالأشياء ، وأفقد شعورى بحبها ..

أن أجد عقلى هو المنهاج لأتعلم الدنيا من جديد ، فلا شىء غير ما يعلموننى إياه ..وعندها لا أصبح أنا ، سأكون مثلهم جميعاً ..روح عادية ..

وعندما يعاودنى الحنين لأكون أنا ..لأتسائل كيف كنت ؟! ،سأصرخ فى كل شىءٍ يُبكينى بقولى " أنا لا أتذكركم ".

عيد ميلادى

إمبارح اللى خلص دة .. كان عيد ميلادى ..إحتفلت بيه فى اللجنة بتاعة أول يوم إمتحانات .. والحمد لله ربنا نصفنى وفرحنى وحليت كويس ،وهى دى هديتى على الصبح كدة ،السنة اللى فاتت كان عندى كلام كتير وكان إحساس اليوم دة مختلف تماماً من أوله لآخره ،لإنة كان أجمل وعمرى فى حياتى ما هنساه .. مهما عشت وكبرت ،كان إحتفال صغنن بس فرحت فيه من قلبى..

السنة اللى فاتت قلت "السنة دى هكون أنا "

بس السنة دى معنديش حاجة أقولها ..غير إنه بتمنى من ربنا دايماً يهدينى لطاعته ويهدينى لنفسى ..ويملأ قلبى بحبه وأفضل أحب كل الناس فيه .. ويكتب لى الخير ويرضينى بيه .. ويكرمنى دايماً بإنى أحترم نفسى كمسلمة وأحترم حريتى كبنت وأحترم أى حد كإنسانة ..

وأنا جية قلت أجيب شيكولاتة حبيبتى أتسلى فيها بينما انا بكتب البوست .. والبوست خلص والشيكولاتة بح ^_*

كل سنة وأنا زهرة

هتتبرع ؟!

إمبارح بينما أنا بشوف برنامج " الطبعة الأولى " لإنى حقيقى معجبة بأسلوب أستاذ /أحمد المسلمانى ، بيوضح رأيه بهدوء وبحس إنه مثقف جداً ، المهم ..كان من آخر الأخبار اللى تعرض ليها مشكلة ورد النيل اللى طبعاً سبب لكون المظهر غير مرضى على الإطلاق ،ودى مشكلة أزلية وكالعادة محدش فكر فى حل ،ولا يفكروا فى حل ليه؟؟ هما كانوا فكروا يبطلوا يشربوا الناس مياه غير مطابقة لأدنى مواصفات صحية الأول ..
الخبر اللى عرضه أستاذ أحمد كان من جريدة المصرى اليوم هنا

وتعليقه الساخر على الخبر كُتب فى جريدة بشاير هنا

بقى يوم ما حد يتحرك ويقدم فكرة محترمة يكون هو دة رد الحكومة عليها ؟!! ،وكعادة كل حاجة فى بلدنا بنلاقى الروتين" حيطة سد " فى وش كل حاجة فالحة ،بس هما معزورين بردوا لازم نسأل نفسنا .. البط هيبقى عهدة مين ؟؟ ولو بطة تاهت الحكومة هتتصرف إزاى ؟؟ ولو بطة ربنا كرمها وباضت إيه مصير الزيادة ؟؟ هل هتتطبخ فى الوزارة ويبقى حقهم ؟؟ ولا هتتاخد دكاكينى من الشعب اللى واقف طوابير مستنى بط الحكومة ؟؟ ..وبعد ما نجاوب على كل دة .. نتكاتف بكام جروب على الفيس بوء وكام إعلان تشجيعى ونقف جنب النيل وورد النيل .. علشان الخطوة الجية هيطلعوا متحدثين بإسم الحكومة بشعار جديد "إتبرع ولو ببطة" ..

إدعى لى *_^

تأجيل الإمتحان .. كان قرار رخم جداً ..وليه يأجلوها أصلاً ؟؟ ما كنا زى دلوقت بنمتحن وعلى نص الشهر بنخلص وبنبقى تبع قائمة العاطلين عن العمل ،لكن السنة دى الإمتحان يوم 12/6 وهنفضل لآخر الشهر تبع قائمة المقهورين فى الأرض .

الحمد لله على كل حال ،وأدينا بنزاكر ونركز ونقول يارب روق الدكتور وهو بيصحح ورقتى ..يارب إجعلنى من الحبة بتوع التقديرات العالية .. آه الحبة ،أصل من رأيى إن الورق بيكون كووومة ،والكووومة بتتقسم بالبركة ،بتتقسم لتلت أو أربع حبات ،كل حبة على جنب ،وكل جنب بياخد تقدير موحد ،وإنت وحبتك بقى..

بس سبحان الله دايماً المادة اللى أخرج منها على أساس إنى هجيب إمتياز جداً .. بجيب مبلول ، والمادة اللى بخرج منها كاتبة كل اللى إتعلمتة من أول "زرع وحصد" لحد آخر محاضرة وبيكون الحل على طريقة كله على الله ..بجيب تقدير كويس جداً "وطبعاً دة مش أساس".

لكن بعد التمحيص والتنكيش والتفتيش إكتشفت إن النجاح بيكون بتلات طرق : إشترى الكتب "إكتب إسمك فى الليست" ،صفى نيتك ،دعا الوالدين وكل مين يعرفك ..

يبقى إدعواااا لى .. يجعل ورقتى فى كومة الحظ ... وبس.

وفاة "أسامة أنور عكاشة"

رحيل أكبر كتاب الدراما المصرية

سنفتقد إبداعه

التفاصيل

شىء من حتى

قرئتها منذ عام ..إنها رواية أعشقها كل العشق ،من أجمل ما قرأت فى حياتى ،أبهرنى الأسلوب وصدمتنى الفكرة فخدرتنى فما شعرت بشىء إلا لذة كلماتها ونشوة سطورها ،إنه حقاً العبقرى د/أحمد خالد توفيق ..وإنها حقاً لفانتازيا تستحق القراءة من جديد ..
حملوها من
هنا

وسهرة سعيدة ^_^

بشكرك :)

تنصير فتاة مسلمة عن طريق الإنترنت

عندما قرأت الخبر إجتاحنى شعور غريب بخيبة الأمل ،وإحساس أيضاً بالحزن لاأدرى ما هو السبب الحقيقى لخلق هذة المشاعر ،هل هى بسبب الغيرة على دينى؟! ،أم هى بسبب التعجب من التفاهات التى أصبحنا نراها تحيط بنا وكأنها الطبيعى ونحن من يسموننا الطبقة المعقدة؟!، أم بسبب البلاهه التى أصبحنا نتصف بها والتى لا تقتصر على الأمور الدنيوية فحسب ولكنها تشعبت لتشمل ديننا الإسلامى؟! ،وأتساءل أيضاً هل هذا هو الحب؟! وأى حب أو مشروع زواج هذا الذى يجعلنى أترك دينى ؟! حقيقة والله لا يسعنى إلا التساؤلات ..

الخبر هنا

جريدة اليوم السابع

كلمة أخيرة أتمنى لو أقولها للفتاة

"جاتك ستين نيلة"

شم الفسيخ

أعياد الربيع ..مسمى مبهج الحقيقة ،ريحة الفل والياسمين والأزهار ذات الروائح الجميلة بدأت تملى الشوارع وأنا بعشق الروائح دى ..ومين فينا مبيحبهاش ؟!! ،بس كوووول دة كوم ويوم شم النسيم لوحدة كوم مختلف.. كان من يومها بالليل ماما تقولى يلا يلا نامى بدرى علشان نصحى الصبح ونروح عند ماما ستو (جدتى يعنى.. كح كح ) علشان بنات خالاتك هيستنوكى من بدرى ،ياااااااااااااه كنت أجرى وأنام فى غمضة عين وأبقى نفسى الصبح ييجى دلوقت علشان ننزل بشنطتنا وكراكيبنا بتاعة اليوم كله ونروح عند ستو ،وكنا نوصل نلاقى العيلة كلها من خالاتى وبناتهم اللى فى سنى وولادهم اللى أصغر ،وخوالى كمان اللى كانوا فى ثانوى وكليات ويبدأ اليوم بإن نبدأ نحضر الفطار بنفسنا (وماأدراكم بنفسنا دى) يعنى نص البيض يتكسر من اللعب والتنطيط ، بس كانت خالتو تجمعنا حواليها وتقول كل واحد يقولى ألون له البيضة اللون اللى يحبه ..وكل واحد يختار لون ^_^ .

ونبدأ وجبه الفطار من بيض ملون وفول بالزيت واللمون وطعمية حراءة وجبن وأهم من دة كله كوبايات الشاى باللبن للأطفال ..وشاى بس للكبار اللى كنت ببقى هموت وأشربه (بس حاشا وماشا) ،وبعدها نروح نلعب لحد ما وجبة الغدا تخلص.

وبيكون اللعب (هادى جداً) من تنطيط فى البلكونة يتبعة زعيق وصريخ ورمى لكل ما وقعت عليه أيدينا فى الشارع تحت مسمى (ستو عايزة دة؟!!) وبعد كدة ندخل بقى جوا بعد تعليق (عيب يا ولاد الدوشة اللى عملتوها فى الشارع) ،ونكمل مسيرة الهجوم التترى (على رأى خوالى) جوا الشقه فى جميع النواحى والأماكن ،وبعدها يعلن عن تجهيز الأكل ويكون حيلنا إتهد وجعنااااااا جداً.

أحياناً بتكون الأكلة رنجة (مش فسيخ خالص) لعدم إقبال الجماهير على الفسيخ ،ومحدش ينسى طبعاً العيش السخن والبصل الأخضر واللمون ونتجمع كلنا على الغدا ،وبعد الغدا كلاكيت تانى مرة شاى بالنعناع .

وطبعاً إستخدام اللبان وكل ما يزيل آثار ما قمنا به من جرائم فى حق البشرية كان واجب قومى لازم نؤديه ،وبنكمل اليوم بعدها فى جو أسرى حلو أوى جوا بيت العيلة الجميل ،لحد ما مفعول الغدوة يظهر على شكل نوم عميييييييق وهدة حيل من اللعب والجرى ،وبعدها لايسع ستو إلا إنها تقول "بيتك بيتك" .

ودلوقت كل دة أصبح زكريات جميلة وأيام حلوة بنفتكرها ونضحك من قلوبنا ونقول ياترى كان حرام علينا إننا كنا بنحتفل ولا لاء؟؟

وأرجع وأقول النيه مش نيه إحتفال أكتر من إنه يوم سوا بنقضيه وبس.

ولا يبقى إلا الذكرى ..

ياترى عندكم ذكرى؟!!

إقرأ الخبر على الفيس بوك

صفحتنا على الفيس بوك .. شباب إعلام ..الإعلام بتاع بكرة وعلشان كدة لازم نهتم بإنهاردة

عندنا هتلاقى أخبار كل يوم ..ويوم بيوم ..من غير ما تدور ..هتتابع الدنيا ..وعندنا بس هتقرأ الخبر ^_^.

بس دوس هنا

هتلاقينا مستنينك

دايماً معانا..

جبت الصورة اللى كانا فيها زمان أنا وماما وإخواتى ، وكنا صغيرين ، وكانت ماما حاضنانا وبنضحك ،أنا بحب الصورة دى أوى أوى مسكتها وفضلت أكلم ماما وحكيت لها كل الحكاوى ورغيت معاها كتير وقلت لها :

كل سنة وإنتى معايا يا حبيبتى كل سنة وإنتى جنبى فى فرحتى بضحكتك اللى هى هى ضحكتى وحسه بيا وكل سنة وانتى جنبى لما أحس بحزن ولا حد يزعلنى على طول تيجى وتقولى لى متزعليش وتمسحى دمعتى ، كل سنة وانا حته منك وانا نسخة منك وانا كلى زيك كل سنة يا ماما وانا لسة بحبك.

يا ماما أنا كويسة أوى الحمد لله ،مبسوطة بجد لأنك مبتغيبيش عليا ودايماً تيجى فى معادك ، وعارفة يا ماما.. إنهاردة مبكتش زى السنين اللى عدت زى ما وعدتك أنا دعيت لك وبعت لك هديهتك لحد عندك أكيد أكيد وصلت لك ..

دراستى كويسة وحياتى الحمد لله كويسة برضاكِ عنى وكمان إخواتى كويسين أوى وبيزاكروا ولسه زى ما انتى عايزة ..طيبين ، بس إنتى إبقى زوريهم بيقولوا إنك وحشتيهم .

وياماما الهدية اللى ربنا اداها لنا بعد منك مفرحانا ، مخليا حياتنا بجد سعيدة ، أنا بحبها أوى ..تعرفى إنها شبهك فى حاجت كتير ..أيوة شبه حنيتك وطيبتك وكلامك .

وزى ما قلتى لى وفهمتينى ..أنا فعلاً مليش غيرها فى الدنيا هى أمى وأختى وصحبتى وكل حاجة حلوة ، وكفايه يا ست الكل إنها بتتحمل عصبيتى وشقاوة الولاد منتى عارفه ..

ولما تعبت يا ماما الفترة اللى فاتت ..إنتى جتينى و زورتينى ..فاكرة؟؟ ، كانت هى جنبى كل يوم طول النهار وسهرانة معايا طول الليل وخايفه عليا من قلبها والله ياما كانت بتعيط لتعبى ..زيك زمان ، واياميها عرفت قد إيه أنا بردوا بحبها .

وبنقعد نرغى ونتكلم وأحكى لها وتحكى لى زى ما كنا يا ماما بنعمل ..ودايماً هى اللى تفكرنا وتقول ماما وست الكل الله يرحمها ، شفتِ قد إيه يا أمى ربنا كرمنا !!

أنا بس قلت أطمنك عليا وكمان عايزة أتطمن عليكى ..يارب تبقى فرحانة ومبسوطة وفى مكان أحلى بكتير من اللى إحنا فيه ، ودة يا ماما يكون ثوابك من ربنا على صبرك وإيمانك بإنه رحيم وهيعوضك خير ..

إتطمنى علينا أوى أوى لإننا بجد مرتاحين ومعانا حنانك لسه والأمان اللى كنتى بتحسسينا بيه ، ربنا هدانا بأحلى هديه ،وأحلى أم فى الدنيا والله بدعى ربنا يخليها لينا ..لإنها كل فرحتنا .

وبابا يا ماما لسة حنين زى زمان وفاكرك دايماً ،وإمبارح كان عيد ميلاده ..أكيد إنتى عارفة ، عملنا له تورتة وحطينا شمعة وكان يوم جميل وغنينا له ،وكمان غنينا لماما وبعد دة كله قمت دعيت لك ..

وإنهاردة حبيت أكتب لك يا أعظم إنسانة أقولك ياماما إنتى والله دايماً معانا ..

وحشتينى أوى